Muletasha
Icalenga 3
Muletasha
BAIBOLO ITILA: “Muli fyonse muletootela.”—1 Abena Tesalonika 5:18.
UBWAFYA: Apo twaikala na bantu bamatutumuko na bashitasha, iyi mibele kuti yatwambukila. (2 Timote 3:1, 2) Kabili, limbi kuti twapatikishiwa ukulundapo imilimo na imbi pa iingi iyo twakwata. Amafya kuti yatufulila sana nelyo limbi kuti twalapoosa fye amano ku fyo tufwaya ica kutila twafilwa no kulamona ukuti ifyo twakwata fyalicindama nelyo twalafilwa no kutasha bambi pa fyo batucitila.
IFYO MWINGACITA: Sangeni inshita ya kutontonkanya pa fisuma ifyo mwakwata. Ca cine, kuti mwakwata amafya ayengi nga nshi. Lelo tontonkanyeni pa fyo Imfumu Davidi yacitile. Inshita shimo yalepelelwa nga nshi pa mulandu wa mafya. Lelo yapepele kuli Lesa ati: “Ntontonkanya pa micitile yenu yonse; Nabika umutima wandi pa fyo iminwe yenu yacitile.” (Amalumbo 143:3-5) Te mulandu na mafya Davidi alepitamo, aletasha kabili alitwalilile ukuteka umutima.
Muletontonkanya pa fyo bambi bamwafwa, kabili mulebatasha. Yesu aletasha sana bambi. Ku ca kumwenako, ilyo cibusa wakwe Maria amwitiile amafuta pa mutwe na pa makasa, bamo baipwishe ati: “Mulandu nshi balaonawila ifi aya mafuta?” * Balya abalesuusha baleti nga caliweme ukushitisha yalya mafuta no kupeela indalama ku bapiina. Yesu abaswike ati: “Mulekeni umwine. Nga cinshi mulemusakamikila?” Kabili atile: “Abombele apapelele amaka yakwe.” (Marko 14:3-8; Yohane 12:3) Yesu tabikile amano ku fyo Maria ashacitile, lelo amutashishe pa fyo acitile.
Bamo besamukumona ukuti kanshi ulupwa lwabo, ifibusa, nelyo ifintu fimbi ifisuma ifyo bakwete fyalicindeme ilyo bashala fye. Nga tamulefwaya ica musango uyu ukumucitikila, kuti cawama ukulamona ifyo mwakwata pali nomba ukuti fyalicindama! Kanshi cikankaala nga nshi ukulamona ifyo mwakwata ukuti fyalicindama, napamo no kufilemba pa kutila mulefitontonkanyapo.
Apo “ica bupe conse icisuma” cifuma kuli Lesa, tufwile ukulamutasha ukupitila mwi pepo. (Yakobo 1:17) Ukucita ifi lyonse kukatwafwa ukuba no mutima wa kutasha kabili kukatwafwa no kuteka umutima.—Abena Filipi 4:6, 7.
[Futunoti]
^ para. 6 Pali ilya nshita, ukwitila amafuta pa mutwe wa mweni cali cilangililo ca kuti napokelelwa; ukwitila amafuta pa makasa ya mweni na co cali cilangililo ca kuicefya.
[Icikope pe bula 6]
Bushe mulatasha pa fyo bambi bamucitila?
Nalimo Kuti Mwatemwako ne fi
LOLENI!
Ifyo Mutontonkanya Kuti Fyalenga Mwaba ne Nsansa Nelyo Iyo
Bushe Baibolo kuti ya mwafwa ukuba ne nsansa?
ULUPUNGU LWA KWA KALINDA—ULWA KUSAMBILILAMO
“Ifyo Yafule Milimo iyo Mwacita, mwe Yehova!”
LOLENI!
Ifyo Mwingalalanga Ukuti Mulatasha
Nga ca kuti abalume nelyo abakashi babikako amano no kutasha abena mwabo pa mibele iisuma iyo bakwata, icupo cabo cilaba bwino. Finshi fingamwafwa ukulatasha?