Thurûk 3

Lâwm Nachâng Hriatna Nei Reng Rawh

BIBLE-IN ENG NGE A ZIRTIR? “Engkimah lâwmthu hril fo rawh u.”—1 Thessalonika 5:18.

ENG NGE A HARSATNA? Mi chapo leh lâwm nachâng hre lo mite hual vêlin kan awm a, an rilru put hmang ang put ve mai chu a awlsam hle. (2 Timothea 3:1, 2) Chu bâkah, kan buai tawh sa nâk laiin tih tûr neih belh zêl lo thei lo dinhmuna ding nia inhriatna kan nei mai thei bawk. Buainain min chîm vâng emaw, mahni hmasâwnna tûr ûmna lama kan inhman lutuk vâng emawin kan thil neih tawh sate hlutna emaw, mi dangte thil min tihsak chunga lâwmna lantîrna hun emaw pawh kan nei lo thei a ni.

ENG NGE I TIH THEIH? Tûna thil ṭha i neih mêkte ngaihtuah nân hun hmang rawh. Buainain a chîm buai che nia inhriat châng pawh i nei ngei ang. Mahse, Lal Davida entîrna hi ngaihtuah ang che. Ani chuan lung chhiat châng leh harsatna avânga rilru mangan châng pawh a nei a. Chuti chung pawhin, Pathian hnênah heti hian a ṭawngṭai a ni: “I thiltih zawng zawngte chu ka ngaihtuah ṭhîn a: i kut hnathawhte chu ka chhût ṭhîn,” tiin. (Sâm 143:3-5) Harsatna a tâwk chung pawhin Davida chuan lâwm nachâng hriatna leh lungawina chu a nei reng a ni.

Nangmah ṭanpui nâna mi dangte thiltih chu ngaihtuah la, an ṭan lâkna avânga i lâwmzia hrilh ang che. Isua chuan he mi chungchângah hian entawn tûr ṭha tak a siam a ni. Entîr nân, a ṭhian Mari’n hriak man to tak maia a lû leh a ke a chulhsak khân ṭhenkhat chuan: “Eng atân nge hriak rimtui hi a tihboral mai mai ni?” an ti a. * Chutianga sawisêltute chuan hriak chu hralh a, a man chu mi rethei hnêna pêk zâwk tûr niin an ngai a ni. Mahse, Isua chuan: “Engmah tih suh a; engah nge in tihbuai ni?” tiin a chhâng a. “A tih theih tâwk a ti a ni,” tiin a sawi belh a ni. (Marka 14:3-8; Johana 12:3) Isua chuan Mari thil tih loh lam chu ngaihtuah lovin, a thil tih chunga a lâwmzia a sawi chhuak zâwk a ni.

Ṭhenkhat chuan an chhûngte emaw, ṭhiante emaw, a nih loh leh malsâwmna dang an dawnte chu an hloh hnuah chauh an hlutzia an hre chhuak ṭhîn. Chutiang dinhmun chu tûna thil ṭha i neih mêkte ngaihtuahna hmangin i pumpelh thei dâwn a ni! Engvângin nge tûna i lâwmna thlentu thilte chu ngaihtuahin, lehkhaa i ziah chhuah loh vang?

“Thil pêk ṭha . . . zawng zawng” hi Pathian hnên aṭanga lo kal a nih avângin, ṭawngṭaiin a hnênah lâwmthu kan sawi tûr a ni. (Jakoba 1:17) Chutianga kan tih ziahna chuan lâwm nachâng hriatna nei reng tûr leh lungawina nei tûrin min ṭanpui thei a ni.—Philippi 4:6, 7. (w10-E 11/01)

[Footnote]

[Phêk 6-naa milem]

Mite’n thil an tihsak che hian lâwmthu i hrilh ṭhîn em?