Ibqaʼ Żomm Attitudni t’Apprezzament
It-3 Sigriet
IL-BIBBJA X’TGĦALLEM? “Roddu ħajr f’kollox.”—1 Tessalonikin 5:18.
X’INHI L-ISFIDA? Aħna ninsabu mdawrin b’nies li huma mkabbrin u ingrati, u dawn l-attitudnijiet jistgħu jeffettwawna. (2 Timotju 3:1, 2) Iktar minn hekk, nistgħu nitħajru ndeffsu iktar u iktar attivitajiet fil-ħajja mgħaġġla li diġà għandna. Nistgħu tant niġu mtaqqlin bil-problemi jew medhijin insusu wara l-interessi persunali tagħna stess li ma jkollniex ħin biex napprezzaw dak li diġà għandna jew biex nesprimu apprezzament għal dak li jagħmel ħaddieħor għalina.
X’TISTAʼ TAGĦMEL? Warrab il-ħin biex timmedita fuq l-affarijiet tajbin li qed tgawdi issa. M’għandniex xi ngħidu, għandu mnejn tħossok mifni bil-problemi. Iżda kkunsidra l-eżempju tas-Sultan David. Kultant hu ħassu mfarrak, u qalbu mifnija bil-provi. Iżda hu xorta talab lil Alla: “Immeditajt fuq l-attività kollha tiegħek; minn qalbi bqajt nikkunsidra xogħol idejk.” (Salm 143:3-5) Minkejja l-provi li għadda minnhom, David xorta baqaʼ jżomm attitudni t’apprezzament u baqaʼ kuntent.
Aħseb ftit dwar x’għamlu oħrajn biex jgħinuk, u esprimi apprezzament għall-isforzi tagħhom. Ġesù ħalla eżempju li jispikka f’dan ir-rigward. Pereżempju, meta Marija ferrgħetlu fuq rasu u fuq saqajh żejt li kien jiswa ħafna flus, xi wħud staqsew: “Għala dan il-ħela taʼ żejt ifuħ?” a Dawn il-kritiċi ħassew li ż-żejt kellu jiġi mibjugħ u l-flus jingħataw lill-foqra. Ġesù wieġeb: “Ħalluha. Għala qed tipprovaw taqilgħulha l-inkwiet?” Imbagħad hu kompla jgħid: “Hi għamlet dak li setgħet.” (Marku 14:3-8; Ġwanni 12:3) Minflok ma ffoka fuq dak li Marija m’għamlitx, Ġesù esprima l-apprezzament tiegħu għal dak li għamlet.
Xi wħud japprezzaw il-familja, il-ħbieb, jew barkiet oħrajn li jkollhom biss wara li jkunu tilfuhom. Int tistaʼ tevita din il-konsegwenza taʼ niket billi tirrifletti fuq l-affarijiet tajbin li qed tgawdi issa! Għala ma żżommx amment jew tniżżel bil-miktub l-affarijiet li tħossok grat għalihom?
Peress li “kull rigal perfett” fl-aħħar mill-aħħar jiġi mingħand Alla, nagħmlu tajjeb li nesprimu l-gratitudni tagħna lejh fit-talb. (Ġakbu 1:17) Jekk nagħmlu dan b’mod regulari nistgħu niġu megħjunin nibqgħu nżommu attitudni t’apprezzament u nikkultivaw il-kuntentizza.—Filippin 4:6, 7.
[Nota taʼ taħt]
a Fl-ewwel seklu, it-tferrigħ taż-żejt fuq ras xi mistieden kien ġest taʼ ospitalità; it-tferrigħ taż-żejt fuq is-saqajn kien att taʼ umiltà.
[Stampa f’paġna 6]
Tesprimi int apprezzament għal dak li jagħmlu oħrajn għalik?