Yiba Ngothokozako
Ifihlo 3
Yiba Ngothokozako
KHUYINI OKUFUNDISWA YIBHAYIBHILI? “Nakisiphi isimo thokozani.”—1 KwebeTesalonika 5:18.
NGISIPHI ISITJHIJILO? Sibhodwe babantu abazikhakhazisako nabangathokoziko, izinto nathi esingazilingisa. (2 KuThimothi 3:1, 2) Ukungezelela kilokho, singazizwa sikateleleka bona singezelele izinto ezinengi ekuphileni kwethu esele kumatasatasa. Singazizwa sidisibezwa miraro namtjhana sibambeke ekulandeleleni iinkareko zethu bona singabi nesikhathi sokuthokoza ngalokho esele sinakho namtjhana ukuthokoza lokho abanye abasenzela khona.
KHUYINI ONGAYENZA? Ziphe isikhathi sokuzindla ngezinto ezihle ozithabelako nje. Kuyavunywa, ungazizwa ugandelelwa miraro. Cabangela isibonelo seKosi uDavidi. Ngezinye iinkhathi beyizizwa igandelelekile, ihliziywayo iphasi ngebanga leenlingo. Nanyana kunjalo, yathandaza kuZimu: “Ngizindle ngawo woke umsebenzakho; ngizimisele ukuhlala ngiwutjheja umsebenzi wezandla zakho.” (AmaRhalani 143:3-5) Naphezu kweenlingo, uDavidi wabulunga umoya wokuthokoza begodu wahlala anelisekile.
Cabanga ngalokho abanye abakurhelebha ngakho, bese uthokoze iimzamwabo. UJesu wabeka isibonelo esiveleleko kilokhu. Isibonelo, umnganakhe uMariya nekathela amafutha abizako ehloko neenyaweni zakhe, abanye babuza: “Kudlalelwani ngamafutha kangaka na?” * Abaphikisaba bacabanga bona amafutha bekufuze athengiswe bese imali inikelwe abakhwahlileko. UJesu waphendula: “Mliseni, nimtshwenyelani na?” Bese wangezelela: “Ungenzele into ehle.” (Markosi 14:3-8; Jwanisi 12:3) Kunokobana aqale lokho uMariya angakhenge akwenze, uJesu wathokoza lokho akwenzako.
Abanye bathokoza umndeni, abangani namtjhana ezinye iimbusiso abanazo kwaphela ngemva kobana sezibalahlekele. Ungagegeda into edanisako leyo ngokuqala izinto ezihle ozithabelako nje! Kubayini ungazitloli phasi izinto ozithabelako?
Njengombana ‘zoke iimphiwo ezihle’ zivela kuZimu, senza kuhle ngokutjengisa ukuthokoza kwethu kuye ngomthandazo. (KaJakobosi 1:17) Ukwenza njalo qobe kungasirhelebha bona sibe ngabathokozako begodu sihlawulele ukwaneliseka.—KwebeFilipi 4:6, 7.
[Umtlolo waphasi]
^ isig. 6 Ngekhulu lokuthoma, ukuthela amafutha ehloko yesivakatjhi bekusisenzo sokwamukela abayeni; ukuthela amafutha eenyaweni bekusisenzo sokuthobeka.
[Isithombe ekhasini 6]
Uyakuthokoza lokho abanye abakwenzela khona?