Sekreto 3

Sea Gradisidu

KIKO BEIBEL TA SIÑA? “Sea gradisidu den tur kos.”​—1 Tesalonisensenan 5:18.

KIKO TA E PROBLEMA? Nos ta rondoná pa hende arogante i ingrato òf malagradesí, i nos por pega ku e aktitutnan ei. (2 Timoteo 3:​1, 2) Ademas, nos por sinti nos obligá di agregá mas i mas aktividat na nos bida ku ta bastante okupá kaba. Nos por bira asina kargá ku nos problemanan òf asina okupá atendiendo loke ta interesá nos, ku nos no tin tempu pa apresiá loke nos tin kaba òf pa gradisí hende pa loke nan ta hasi pa nos.

KIKO BO POR HASI? Traha tempu pa meditá riba e kosnan bon ku bo ta disfrutá di dje aktualmente. Ta bèrdat ku tal bes bo ta sinti ku problema ta hoga bo. Pero konsiderá e ehèmpel di Rei David. Tabatin biaha ku el a sinti su mes aplastá bou di su pruebanan i komo si fuera su spiritu a desmayá den dje. Pero tòg el a bisa Dios den orashon: “Mi ta meditá riba tur bo obranan; mi ta reflekshoná riba e obra di bo mannan.” (Salmo 143:​3-5) Apesar di e pruebanan ku David tabata pasa aden, el a keda gradisidu i satisfecho.

Pensa riba loke hende a hasi pa yuda bo, i gradisí nan pa nan esfuerso. Hesus tabata masha bon ehèmpel di esaki. Por ehèmpel, ora su amiga Maria a basha un zeta karu riba su kabes i su pia, tabatin hende ku a kritiká esei, i nan a puntra: “Pakiko e perfume akí a wòrdu dispidí?” * Segun nan, mester a bende e zeta i duna hende pober e plaka. Ma Hesus a kontestá nan: “Lag’é; pakiko boso ta molesti’é?” Anto el a sigui bisa: “El a hasi loke e tabata por.” (Marko 14:​3-8; Juan 12:3) En bes di konsentrá riba loke Maria no a hasi, Hesus a ekspresá apresio pa loke sí el a hasi.

Lamentablemente, tin hende ta apresiá nan famia i amigunan òf otro bendishon ku nan tin despues ku nan pèrdè esakinan. Bo por evitá e situashon tristu ei si bo reflekshoná riba e kosnan bon ku aworakí bo ta disfrutá di dje! Pakiko no pensa riba e kosnan ku bo ta gradisidu p’e òf asta pone nan riba papel?

Siendo ku “tur bon regalo” originalmente ta bini di Dios, ta bon pa nos ekspresá nos gratitut na dje den orashon. (Santiago 1:17) Si nos hasi esei riba un base regular, esaki por yuda nos mantené un aktitut gradisidu i bira hende ku ta satisfecho ku loke nos tin.​—Filipensenan 4:​6, 7.

[Nota]

[Plachi na página 6]

Bo ta gradisí hende pa loke nan ta hasi pa bo?