3 YANAPAKUY

Agradecekunam

BIBLIAM NIN: “Tukuy imamantayá Diosman graciasta qoychik”, nispa (1 Tesalonicenses 5:18).

¿IMAM SASACHAWANCHIK? Runakunam hatun tukuq hinaspa mana agradecekuq kanku, chayna kasqankutam qatipakuyta qallaykuchwan (2 Timoteo 3:1, 2). Chaymantapas, tukuy rurayninchikkunawanmi qonqaruchwan imayna kayninchikta otaq manapas agradecekuchwanñachu hukkuna ñoqanchikpaq imapas rurasqankuta.

¿IMATAM RURACHWAN? Yuyaymanananchikmi allin kaqkunapi. Arí, wakinpiqa yaqapaschá llumpay sasachakuykuna kasqanrayku manapas atipayta atisunchu, chaynam Davidpas tarikurqa. ¿Imatam pay rurarqa? Diostam mañakurqa: ‘Llapa rurasqaykikunapim yuyaymanani. Atiynikiwan rurasqaykikunapim piensani’, nispa (Salmo 143:3-5). Imayna tarikuspanpas, agradecekuqmi karqa chaymi yanapaq kusisqa kawsakunanpaq.

Chaynaqa yuyaymanasunyá ñoqanchikpaq hukkuna rurasqanpi hinaspayá agradecekusun. Chaynatam Jesuspas rurarqa. Maria achka qollqepa chanin aceiteta Jesuspa umanmanwan chakinman talliykuptinmi, runakuna piñakuspa nirqaku: “Imanasqataq kay achka qollqepa chanin miski asnaq aceitetaqa usurachin”, nispa. * Nirqakum chay aceiteta rantikuruspa wakchakunaman qollqe qoykariy allin kasqanta. Ichaqa Jesusmi nirqa: “Upallaychik. ¿Imanasqataq llakichinkichik kay warmita? [...] Kay warmiqa tukuy atisqantam rurarun”, nispa (Marcos 14:3-8; Juan 12:3). Jesusqa manam Mariapa mana rurasqantachu qawarqa, aswanqa agradecesqam karqa rurasqanmanta.

Achka runakunam familianku otaq amistadninku wañukuptin chayraq chaninchanku. Chaymi haykapipas chaninchananchik. Ichapas listata rurachwan imakunamanta agradecekusqanchikta qellqaspa otaq umallanchikpi yuyaymanaspa.

Chaymantapas manam qonqananchikchu mañakuspa Dios agradecekuyta, paymantam “chaskinchik llapa ima allin kaqkunataqa” (Santiago 1:17). Sapa kuti chayta ruraspaqa manam agradecekuqllachu kasunchik, aswanqa kusisqam tarikusun imapas kapuqninchikwan (Filipenses 4:6, 7).

[Willakuy]

[6 kaq paginapi dibujo]

¿Agradecekunchikchu hukkuna ñoqanchikpaq imapas rurasqankumanta?