Ia Iai Pea se Agaga Lotofaafetai
Auala e 3
Ia Iai Pea se Agaga Lotofaafetai
O LE Ā LE AʻOAʻOGA A LE TUSI PAIA? “Ia faafetai i mea uma lava.”—1 Tesalonia 5:18.
AISEĀ E FAIGATĀ AI? Ua siʻomia i tatou i tagata faamaualuluga ma lē lotofaafetai, o uiga e faigofie ona tatou faataʻitaʻi i ai. (2 Timoteo 3:1, 2) E ono omia foʻi i tatou e faia le tele o isi mea e ui i le pisi o o tatou olaga. E mafai ona matuā lofitūina i tatou i faafitauli pe pupū atu i le saʻilia o mea e mananaʻo i ai, ma leai ai se taimi e talisapaia ai mea ua tatou maua pe faafetai atu i mea ua faia e isi mo i tatou.
O LE Ā E TE FAIA? Ia mafaufau i mea lelei ua e maua i le taimi nei. Ae atonu o loo lofitūina oe i faafitauli. Ae seʻi manatu i le faataʻitaʻiga a le tupu o Tavita. Sa iai taimi na nutimomoia ai lona loto ma faanoanoa ona o faigatā. E ui i lea, na tatalo o ia i le Atua: “Na ou mafaufau loloto ai i au galuega uma lava; na ou naunau foʻi e mafaufau pea i galuega a ou aao.” (Salamo 143:3-5) E ui i faigatā, ae na tumau pea ona lotofaafetai ma lotomalie Tavita.
Mafaufau i mea ua faia e isi e fesoasoani ai iā te oe, ma faafetai atu iā i latou. Na faataatia e Iesu se faaaʻoaʻoga lelei i lenei tulaga. O se faataʻitaʻiga, ina ua liligi e lana uō o Maria le suāuu taugatā i luga o lona ulu ma ona vae, na fai ane nisi: “Aiseā ua maʻimau ai lenei suāuu manogi?” * Na manatu na tagata faitio sa tatau ona faatau atu le suāuu, ona foaʻi atu lea o tupe i tagata matitiva. Na tali atu Iesu: “Tuu ai pea o ia. Aiseā e tou te faalavelave ai i le fafine?” Ona ia toe fetalai atu lea: “Ua ia faia le mea na te mafaia.” (Mareko 14:3-8; Ioane 12:3) Nai lo o le taulaʻi atu i le mea e leʻi faia e Maria, na lotofaafetai Iesu i le mea na ia faia.
E faatoʻā talisapaia e nisi le aiga ma uō pe a maliliu, faapea foʻi isi faamanuiaga pe a mavae atu. E mafai ona e ʻalofia lenā iʻuga faanoanoa e ala i le manatunatu i mea lelei ua e maua i le taimi nei! Aiseā e te lē manatua ai pe tusi i lalo mea e te lotofaafetai ai?
Talu ai “o meaalofa lelei uma” e mai i le Atua, ua talafeagai ai ona tatou faafetai atu iā te ia i le tatalo. (Iakopo 1:17) O le faia faapea e lē aunoa, e fesoasoani iā i tatou ia iai pea se agaga lotofaafetai ma lotomalie.—Filipi 4:6, 7.
[Faaopoopoga i lalo]
^ pala. 6 I le uluaʻi senituri, o le liligi o le suāuu i le ulu o se mālō, o se faailoga o le talimālō, ma o le liligi o le suāuu i vae e faaalia ai le lotomaulalo.
[Ata i le itulau 6]
Pe e te talisapaia mea ua faia e isi mo oe?
E te Ono Fiafia Foʻi
ALA MAI!
Ia Iai se Vaaiga Saʻo
Pe e mafai ona fesoasoani le atamai o loo i le Tusi Paia iā te oe ina ia maua le fiafia?
LE OLOMATAMATA—LOMIGA MO SU‘ESU‘EGA
“Ieova e, ua Matuā Tele Au Galuega”
ALA MAI!
Auala e Faaalia ai le Talisapaia
Pe a fai e se tane ma se avā se taumafaiga e mātau ma faailoa atu uiga lelei o le tasi i le isi e masani ona faaleleia le la faiā. O le ā e mafai ona fesoasoani iā te oe e atia‘e le talisapaia?