Maging Mapagpahalaga
Sekreto 3
Maging Mapagpahalaga
ANG ITINUTURO NG BIBLIYA: “May kaugnayan sa lahat ng bagay ay magpasalamat kayo.”—1 Tesalonica 5:18.
ANG HAMON: Napaliligiran tayo ng mga taong mayabang at walang utang-na-loob, at puwede tayong mahawa sa kanila. (2 Timoteo 3:1, 2) Bukod diyan, baka hindi na nga tayo magkandaugaga sa trabaho, marami pa tayong gustong gawin. Baka sa dami ng ating problema o pinagkakaabalahan, wala na tayong panahon upang pahalagahan ang mga tinataglay natin o pasalamatan ang ginagawa ng iba para sa atin.
ANG PUWEDE MONG GAWIN: Maglaan ng panahon para pag-isipan ang mabubuting bagay na tinatamasa mo ngayon. Totoo, baka hirap na hirap ka na sa mga problema. Pero isaalang-alang ang halimbawa ni Haring David. Kung minsan, para siyang dinudurog sa dami ng pagsubok. Magkagayunman, nanalangin siya sa Diyos: “Binubulay-bulay ko ang lahat ng iyong mga gawa; kusang-loob kong itinutuon ang aking pansin sa gawa ng iyong mga kamay.” (Awit 143:3-5) Sa kabila ng mga pagsubok, naging mapagpahalaga at kontento si David.
Isipin ang mga naitulong sa iyo ng iba, at pasalamatan ang kanilang pagsisikap. Namumukod-tangi ang halimbawa ni Jesus sa bagay na ito. Halimbawa, nang ibuhos ng kaniyang kaibigang si Maria ang mamahaling langis sa kaniyang ulo at paa, nagtanong ang ilan: “Bakit nangyari ang pag-aaksayang ito ng mabangong langis?” * Iniisip nila na dapat sana’y ipinagbili ang langis at ang pera ay ibinigay sa mahihirap. Pero sinabi ni Jesus: “Pabayaan ninyo siya. Bakit ninyo siya ginugulo?” Idinagdag pa ni Jesus: “Ginawa niya ang magagawa niya.” (Marcos 14:3-8; Juan 12:3) Sa halip na magtuon ng pansin sa hindi ginawa ni Maria, nagpasalamat si Jesus sa kaniyang ginawa.
Napahahalagahan lamang ng ilan ang kanilang mga kapamilya, kaibigan, o iba pang mga pagpapala kapag wala na ang mga ito. Para hindi iyan mangyari sa iyo, pahalagahan ang mabubuting bagay na tinatamasa mo ngayon! Bakit hindi pag-isipan o isulat ang mga bagay na ipinagpapasalamat mo?
Yamang ang “bawat mabuting kaloob” ay galing sa Diyos, makabubuting pasalamatan natin siya sa panalangin. (Santiago 1:17) Kapag regular natin itong ginagawa, tutulong ito sa atin na maging mapagpahalaga at kontento.—Filipos 4:6, 7.
[Talababa]
^ par. 6 Noong unang siglo, ang pagbubuhos ng langis sa ulo ng bisita ay tanda ng pagiging mapagpatuloy; ang pagbubuhos naman ng langis sa paa ay tanda ng kapakumbabaan.
[Larawan sa pahina 6]
Pinasasalamatan mo ba ang ginagawa ng iba para sa iyo?
Magugustuhan Mo Rin
GUMISING!
Pananaw—Malaki ang Nagagawa!
Makatutulong ba sa iyo ang karunungan ng Bibliya para maging mas masaya?
ANG BANTAYAN—EDISYON PARA SA PAG-AARAL
“Kay Rami ng Iyong mga Gawa, O Jehova!”
GUMISING!
Magpakita ng Pagpapahalaga
Karaniwan nang gumaganda ang pagsasama ng mag-asawa kapag pareho nilang tinitingnan at sinasabi sa isa’t isa ang magaganda nilang katangian. Paano ka magiging mapagpahalaga?
