Napaxtikatsininanaw
PULAKTUTU
Napaxtikatsininanaw
BIBLIA WAN: «Xlipaks kalimastatit mpaxkatsinit» (1 Tesalonicenses 5:18).
¿TUKU XLAKATA? Latamanin xalak kakilhtamaku tlankajwa kamakgkatsikan, ni paxtikatsininankgo chu uma tayat kinkapasayan (2 Timoteo 3:1, 2). Nachuna akxni lhuwa tuku kilitlawatkan, nialh lu xlakaskinka naʼakxilhaw tuku kgalhiyaw o ni nakapaxtikatsiniyaw tuku kinkalimakgtayakgoyan amakgapitsin.
¿TUKU KILITLAWATKAN? Nalakapastakaw lhuwa tuku tlan nema kgalhiyaw. Pero max namin kilhtamaku namakgkatsiyaw pi nialhla tuku tlawayaw xlakata lu lhuwa taʼakglhuwit kgalhiyaw, chuna la akgspulalh mapakgsina David. ¿Tuku makgtayalh? David wanilh Dios: «Akit kkalilakpuwantawila wakg mintaskujut nima katlawanita» (Salmo 143:3-5). Maski tuwa tuku xtitaxtuma, putum kilhtamaku xmasta tapaxtikatsinit, uma makgtayalh xatapaxuwan nalatama.
Wa xlakata, lu xlakaskinka nalakpuwanaw tuku tlawakgonit amakgapitsin kimpalakatakan chu nakapaxtikatsiniyaw. Jesús chuna tlawalh. Akxni María, tiku xtalalin tantumawakalh chu akmawakalh xataparaxla aceite, lhuwa tiku lisitsikgolh chu wankgolh: «¿[Tuku xlakata] paxkat tlawalh yuma xatalakkaxtlaw xamuklhun?» o xamuksun aceite. * Xlakpuwankgo pi tlakg tlan xtistaka chu xkamaxkika tumin tiku lakglimaxkgen. Pero Jesús kawanilh: «Kamakgaxtakgtit. ¿[Tuku xlakata] makgalipuwanatit?». Chu alistalh na wa: «Wa [...]tlawanit xla, lantlata makakchalh» (Marcos 14:3-8; Juan 12:3). Jesús ni wa akxilhli tuku ni xtlawanit María, wata lu xlakaskinka akxilhli wantuku xtlawanit chu paxtikatsinilh.
Lu nitlan, pero lhuwa latamanin kaj akxni makgatsankgakgo tuku xkgalhikgo aku katsikgo pi lu tlan tuku xkgalhikgo, la xfamilia chu xʼamigos. Wa xlakata lu talakaskin pi putum kilhtamaku lu xlakaskinka nakaʼakxilhaw. Lu tlan xwa nalakpuwanaw o natsokgwiliyaw tuku kgalhiyaw nema lipaxtikatsininanaw.
Nachuna xlakaskinka pi akxni natlawayaw oración napaxtikatsiniyaw Dios xlakata kinkamaxkiyan «xlipaks wa ntlan tatakin» o tamaskiwin (Santiago 1:17). Komo chuna nalismaniyaw, nikaj tlakg napaxtikatsininanaw wata tlakg nalipaxuwayaw tuku kgalhiyawa (Filipenses 4:6, 7).
[Notas nema wilakgo kpágina]
^ párr. 6 Kxapulana siglo akxni wi tiku xmakgamakglhtinankan kʼakgtum chiki xtalismani pi xkaʼakmawakakan aceite. Akxni María tantumawakalh aceite Jesús na limasiyalh pi xtataktuju.
[Epígrafe xla página 6]
¿Kapaxtikatsiniyaw tuku tlawakgo amakgapitsin kimpalakatakan?