Kintu 4

Tonga Balunda na Ñeni

I BIKA BIFUNDIJA BIBLE? “Nanga ne bantu bañeni, nobe ukekala wañeni.”—Nkindi 13:20.

I BIKA BIKOLEJA? Balunda netu bakabweja nansha kutyepeja kuloelelwa kwetu. Mwikadila ne mīsambo yabo bidi na lupusa pa muswelo otumona būmi.—1 Kodinda 15:33.

Tala kimfwa, nsekununi ya mu Bible ya bantu 12 bājokele kobādi bakabele ntanda ya Kenani. Bavule bādi ke “bashotolola mwanda mubi wa ntanda’ya yo bakabelele.” Nansha nankyo bantu babidi bānenene biyampe ntanda ya Kenani, beitela bu “ntanda milumbuluke’tu byamalwa.” Inoko mwikadila mubi wa tubedi-bedi dikumi wāsambakana mu bantu. Nsekununi inena’mba, “kitango kyonsololo kadi kyatulula diwi dyabo ke bayoyokota,” penepo “bāna ba Isalela bonso beunigila.”—Umbadilo 13:30–14:9.

Dyalelo nadyo, bantu bavule “bēuningauninga bakukataja” pa mwanda wa būmi bwabo. (Yude 16) I bikomo kulama kuloelelwa shi tupwene na balunda kebatondwapo.

I BIKA BYOKALONGA’PO? Bandaula mīsambo yowisamba na balunda nobe. Lelo balunda nobe betendelanga pa bintu byobadi nabyo? Lelo bedilakenanga pa bintu byobabudilwe? Le wi mulunda wa muswelo’ka kobadi? Le uloñanga bukomo mwanda wa balunda nobe babile byodi nabyo’ni nansha wibakankamikanga basangele byobadi nabyo?

Tala kimfwa kyāshile Davida, wādi utengele kubikala, ne Yonafane mwana Mulopwe Solo. Davida wādi unyemakana mu ntanda. Mulopwe Solo wāmwene Davida bu walwana penepa kakimbe kumwipaya. Nansha Yonafane byaādi ubwanya kupyana bulopwe, wāikele ke mulunda wa Davida wa pa mutyima. Yonafane wāyukile amba Leza ye mutonge Davida apingakene mulopwe ne wādi uloelelwe kukwatakanya mulunda nandi.—1 Samwele 19:1, 2; 20:30-33; 23:14-18.

Nobe usakilwa balunda ba uno muswelo, balonga bukomo bwa kuloelelwa ne batele mutyima ku tumweno tobe. (Nkindi 17:17) Na bubine, pa kukoka balunda ba uno muswelo, usakilwa kulombola ngikadilo ya muswelo umo onka.—Fidipai 2:3, 4.

[Kifwatulo pa paje 7]

Le balunda nobe babwejanga’ni, batyepejanga kuloelelwa kobe?