Sekreto 4

Skohe Bo Amigunan na un Manera Sabí

KIKO BEIBEL TA SIÑA? “Esun ku anda ku hende sabí lo ta sabí.”​—Proverbionan 13:20.

KIKO TA E PROBLEMA? Sea nos amigunan ta yuda nos pa ta hende satisfecho den bida òf nan ta stroba nos den esei. Nan aktitut- i kòmbersashonnan sigur lo tin un efekto riba nos manera di mira bida.​—1 Korintionan 15:33.

Por ehèmpel, konsiderá e relato bíbliko di 12 hòmber ku a bini bèk for di un biahe di eksplorashon na Kánaan. Mayoria di nan “a duna e yunan di Israel un mal reportahe di e tera ku nan a spioná.” Apesar di esei, dos di nan a papia bon di Kánaan i a yam’é “un tera sumamente bon.” Pero e mal aktitut di e otro dies spionnan a plama entre e pueblo. Anto segun e relato, ‘henter e kongregashon a halsa bos, i tur e yunan di Israel a kuminsá murmurá.’​—Numbernan 13:​30–14:9.

Awe tambe, hopi hende ta “kana murmurá semper i ta mal kontentu ku tur kos.” (Hudas 16, BPK) Ta difísil pa keda kontentu ku loke bo tin ora bo ta den kompania di amigunan ku nunka no ta satisfecho den bida.

KIKO BO POR HASI? Analisá e kòmbersashonnan ku bo tin ku bo amigunan. Bo amigunan hopi biaha ta broma tokante loke nan tin, òf semper nan ta keha tokante loke nan no tin? I ki klase di amigu abo ta pa nan? Bo ta hasi tur sorto di kos pa bo amigunan bira yalurs riba bo, òf bo ta animá nan pa keda satisfecho ku loke nan tin?

Tuma e ehèmpel di David ku Jonatan. David, kende mester a bira rei, tabata biba komo fugitivo den desierto. Rei Saul tabata sinti ku David a menasá su posishon komo rei, i p’esei e kier a mata David. Ma Jonatan, yu di Saul, a bira un di David su mihó amigunan, apesar ku bou di sirkunstansianan normal ta é lo a bira e siguiente rei. Jonatan a rekonosé ku Dios a nombra David pa bira e siguiente rei, i el a keda kontentu di por apoyá su amigu.​—1 Samuel 19:​1, 2; 20:​30-33; 23:​14-18.

Bo tambe tin mester di e tipo di amigunan ei; amigu ku ta hasi esfuerso pa keda satisfecho ku loke nan tin i ku tin bo bienestar na pechu. (Proverbionan 17:17) Klaru ku pa bo atraé amigunan asina, bo mes tambe tin ku desplegá e kualidatnan ei.​—Filipensenan 2:​3, 4.

[Plachi na página 7]

Bo amigunan ta yuda bo keda satisfecho den bida òf nan ta stroba bo den esei?