Berrotel el Tekoi 4

Bo Mungil el Melilt er a Resechelim

NGERA NGOLISECHAKL A BIBLIA? “Mosuub er a re mellomes a rengrir el chad me bo le mellomes a rengum.”​—Osisechakl 13:20.

NGERANG A OMELSEMAI? A resechelid a sebechir el smisichii a ungilbesul el rolel a klengar er kid me a lechub e te mengitechut er ngii. A omerellir me a cheldechedecherir a kmal ngar ngii a lerellii er a osenged el kirel a klengar.​—1 Korinth 15:33.

Ka molatk er a cheldecheduch er a Biblia el kirir a 12 el chad el mlo ourabek er a beluu er a Kanaan. A ruumesingd er tir er sera lluut e “te mle ua isei el omerk er a diak le meral chais er a delongelir a re chad er a Israel el kirel sel beluu el blo lourabek er ngii.” Me nguaisei, engdi a reterung er tir a millekoi a klemerang el tekoi el kirel ngii el beluu el kmo, “Sel beluu el blo dourabek er ngii a kot el ungil beluu.” Engdi sel mekngit el uldesuir tirke el bebil a kmal mle mesisiich el mlo sebechel el mengesuseu a uldesuir a rechad el mlo uchul me “ng tal kesus el mo tutau el langel a re chad er a klengiterreng.” Me a cheldecheduch a melemolem el ouchais el kmo, a rechad er a Israel a “milengeremrum er a Moses ma Aron.”​—Ulecherangel 13:30–14:9.

Me ngdi osisiu er a chelecha el taem, a rebetok el chad a di “mengeremrum e oumekikngiterreng el di oltirakl a ikel ngibes” er a klengar er tir. (Judas 16) Misei a uchul me ngkmal meringel el de kiei el ousechelei er a rechad el tir a kiei el di ngesonges a rengrir er aike el ngar ngii er tir.

NGERA SEBECHED EL MERUUL ER NGII? Ka bo mungil merriter aike el tekoi el blechoel el mosaod lobengterir a resechelim. Me tirke el sechelim, te blechoel el ousimang el di mesaod aike el ngar ngii er tir, me a lechub e te blechoel el di mengeremrum el kirel a klalo el diak er tir? E kau, ke kuk sechelirir el kirel a ngerang? Ke blechoel el osiik a rolel e ngsebechir el mo mechechei er kau, me a lechub e ke melisiich er tir el mo kiei el ungilbesul er a rengrir er aike el ngar ngii er tir?

Ka di molatk er a kerebil a David, el ngii a di kmedu el mo mucheluch el king, me a Jonathan el ngelekel a King el Saul. A David a di kiliei el omart er ngii er a chereomel, e le a King el Saul a mle soal el omekoad er ngii. Me alta e a Jonathan a locha mle sebechel el mo ongingil el chad el nguu a deruchall er a kleking, engdi ngii a kmal mlo kmeed el sechelil a David. Ngmlo sebechel el melechesuar el kmo a Dios a mla ngiltii a David el mo king, e dirrek el di mle ungilbesul er a rengul el melisiich er a sechelil el kirel tia el deruchall el di kmedung e ngmo nguu.​—1 Samuel 19:1, 2; 20:30-33; 23:14-18.

Kau a dirrek el ousbech er a resechelim el tir a kiei el ungilbesul er a rengrir aike el ngar ngii er tir, e blechoel el melatk a tekoi el dirrek el ungil el kirem. (Osisechakl 17:17) Me nguaisei, engdi a lsekum e ngsoam el osiik er choua itirka el sechelei, e ngkmal kirem el omuchel el meleketek aika el ungil blekeradel er a chelsel a klengar er kau.​—Filipi 2:3, 4.

[Siasing el ngar er a 7 el llel]

A resechelim, te melisiich er a ungilbesul el rolel a klengar er kau me a lechub e te mengitechut er ngii?