4 kaq yachatsikï

Akrë alli kaq amïgokunata

BIBLIAQA KËNÖMI NIN: “Yachaqkunawan pureqqa yachaqmi tikranqa” (Proverbios 13:20).

¿IMATAQ LLAKISHQA KËMAN CHÄTSIKUN? Amïgontsikkunapa portakïnin y parlëninkuna kawënintsikchö allikunata ruranata qelanätsimanqantsikmi (1 Corintios 15:33).

Yarpärishun chunka ishkë israelïtakuna Canaán nishqan nación imanö kanqanta musyapakurir, marka mayinkunaman kutiyaptin ima pasanqanta. Chunka kaqqa, “musyapakoq ëwayanqan markapaq mana allita israelïtakunata willaya[nqantam]” Biblia nin. Pero ishkë kaqqa, Canaán nacionpaq allita parlarmi “tsë markakunaqa alläpa allim” niyarqan. Pero tsë chunka kaq musyapakoqkunanömi israelïtakunaqa mana allita pensayarqan. Tsënöpam llapan “wasata rimar qallëkuyarqan” (Números 13:30–14:9).

Kanan witsankunapis “nunacunaqa cayan wasa rimam, y manam pecunapaq ni ima allitsu” (Judas 16). Rasun kaqchöqa, imapis mana alli kanqanman pensaq amïgokunawan juntakurqa, noqantsikpis pëkunanö pensarmi qallëkushun.

¿IMATAQ KUSHISHQA KANAPAQ YANAPAMÄSHUN? Juntakunqantsikkuna imanö amigo kayanqanta musyanapaq, imakunapita más parlayanqanta alli rikanqantsikmi. Pensarishun, ¿imëkayoq kayanqampitaku imëpis gälakuyan? ¿Imankunapis pishinqampaqku imëpis parlakïkäyan? Y noqantsikqa, ¿wakinkuna envidiamänataku ashintsik, o tariyanqankunallawan kushishqa kawakuyänampaqku yanapakuntsik?

Davidwan Jonatanmi rasumpa amigo kë imanö kanqanta rikätsikuyarqan. Rey Saulpa tsurin karmi Jonatanqa teytampa rantin gobernanan karqan. Pero Diosqa, David gobernanantam munarqan, tsëmi Saúl wanutsita munaptin, Davidqa hirkakunapa qeshpir ëwakurqan. Pero ¿ima nirqantaq Jonatanqa? Manam chikirqantsu amïgon Davidta, antis Dios ninqannö kananta munarmi yanaparqan (1 Samuel 19:1, 2; 20:30-33; 23:14-18).

Alli amïgokunaqa imapis alli yarqapamänatam munayan y manam imapitapis shonqunkunachö chikipämantsiktsu (Proverbios 17:17). Pero tsënö amïgoyoq kanapaqqa, noqantsikpis alli amïgom kanantsik (Filipenses 2:3, 4).

[7 kaq päginachö dibüju]

¿Alli kaqta ruranapaqku amïgontsikkuna yanapamantsik?