Goza 4

Hlawula Vanghana Va Wena Hi Vutlhari

I YINI LESWI BIBELE YI SWI DYONDZISAKA? “Loyi a fambaka ni vanhu vo tlhariha u ta tlhariha.”—Swivuriso 13:20.

HI XIHI XIPHIQO XA KONA? Vanghana va hina va nga hi endla hi eneriseka kumbe hi nga eneriseki. Ndlela leyi va swi langutaka ha yona swilo ni mabulo ya vona, swi nga khumba ndlela leyi hi byi langutaka ha yona vutomi.—1 Vakorinto 15:33.

Hi xikombiso, xiya rungula ra le Bibeleni ra vavanuna va 12 lava a va rhumiwe ku ya kambela tiko ra Kanana. Vo tala va vona “va [hambete] va tisela vana va Israyele xiviko xo biha xa tiko leri va nga ri kambela.” Nilokoswiritano, vambirhi va vona va vulavule kahle hi tiko ra Kanana, va ri vitana “tiko lerinene ngopfu.” Kambe lavan’wana va khume a va vulavulanga kahle hi tiko leri. Rungula ra kona ri ri: ‘Ntshungu hinkwawo wu tlakusa marito ya wona kutani vana va Israyele hinkwavo va sungula ku gungula.’—Tinhlayo 13:30–14:9.

Hilaha ku fanaka namuntlha, vanhu vo tala va “[gungula], va vilela hi swiavelo swa vona evuton’wini.” (Yudha 16) A swi olovi ku eneriseka loko u tshama ni vanghana lava nga enerisekiki.

I YINI LESWI U NGA SWI ENDLAKA? Swi kambisise kahle leswi wena ni vanghana va wena mi talaka ku bula ha swona. Xana va tala ku tinyungubyisa hileswi va nga na swona, kumbe va tshamela ku vilela hileswi va nga riki na swona? Xana wena u munghana wa njhani eka vona? Xana u endla leswaku va ku navela kumbe u va khutaza leswaku va eneriseka hileswi va nga na swona?

Xiya xikombiso xa Davhida, loyi a a ta va hosi ni xa Yonathani, n’wana wa Hosi Sawulo. Davhida a a hanya tanihi mubaleki emananga. Hosi Sawulo a a vona onge Davhida u lava ku n’wi tekela vuhosi kutani a a lava ku n’wi dlaya. Yonathani hi yena loyi a a ta va hosi leyi nga ta landzela, kambe u ve munghana lonkulu wa Davhida. Yonathani u swi xiyile leswaku Xikwembu xi hlawule Davhida leswaku ku va yena hosi leyi nga ta landzela naswona a a tiyimiserile ku seketela munghana wakwe.—1 Samuwele 19:1, 2; 20:30-33; 23:14-18.

U fanele u va ni vanghana vo tano, lava tikarhatelaka ku eneriseka naswona va ku navelelaka leswinene evuton’wini. (Swivuriso 17:17) Leswaku vanhu van’wana va navela ku va vanghana va wena, u fanele u eneriseka naswona u navelela van’wana leswinene.—Vafilipiya 2:3, 4.

[Xifaniso lexi nga eka tluka 7]

Xana vanghana va wena va endla leswaku u eneriseka kumbe u nga eneriseki?