QOFA 4

Laggeta Eratettan Doora

GEESHSHA MAXAAFAY TAMAARISSIYOY AYBEE? “Aadhdhida eranchcha asatuura hemettiya asi aadhdhida eranchcha gidees.”—Lee. 13:20.

XUBE GIDIYAABI AYBEE? Nu laggeti oottiyoobay nuuyyo deˈiyaaban nuuni ufayttanaadan woy ufayttennaadan oottana danddayees. Eta qofaynne haasayay deˈuwaa nuuni xeelliyo hanotaa laammiyoogee attenna.—1 Qor. 15:33.

Leemisuwau, Kanaane biittaa wochi simmida 12 asatubaa Geeshsha Maxaafay yootiyoobaa qoppa. Etappe daroti “yuuyi wochchido biittaabaa Israa7⁠eela asaayyo . . . iita oduwaa odidosona.” Gidikkokka, he asatuppe naaˈˈati Kanaane biittay “keehi daro lo77⁠o” giidi kehabaa yootidosona. SHin biittaa wochidaageetuppe tammu asati yootido iita qofay asaa ubbaa gakkiis. He taarikee, ‘maabaray ubbay bantta qaalaa xoqqu oottidoogaanne Israaˈeela asay ubbay zuuzummidoogaa’ yootees.—Qoo. 13:30–14:9.

Hegaadankka ha wodiyan daro asati “zuuzummoosonanne harata amassaloosona.” (Yih. 16) Banttau deˈiyaaban mule ufayttenna asatuura laggetidi, deˈiyaaban ufayttidi deˈiyoogee metiyaaba.

AY OOTTANA DANDDAYAY? Neeni ne laggetuura haasayiyoobaa yuushsha qoppa. Ne laggeti darotoo banttau deˈiyaaban ceeqettiyoonaa, woy banttau baynnaban zuuzummiyoonaa? Neeni shin etau ay mala laggee? Ne laggeti nebaa qaaqqatanaadan denttettayiyye, eti banttau deˈiyaaban ufayttanaadan minttettay?

Kawo gidanau deˈiya Daawitanne Kawuwaa Saaˈoola naˈaa Yonaataana leemisuwaa qoppa. Daawiti bete gididi bazzuwan deˈiis. Kawuwaa Saaˈooli ba kawotettaassi hirggissiyaabadan qoppidi, Daawita woranau koyiis. Kaallidi kawotanau maatay deˈiyoy Yonaataana gidikkokka, i Daawitayyo mata laggetuppe issuwaa gidiis. Kawotettaa laattanaadan Xoossay sunttidoy Daawita gidiyoogaa Yonaataani ammanidi, bau deˈiyaaban ufayttidi ba laggiyaa kaafiis.—1 Sam. 19:1, 2; 20:30-33; 23:14-18.

Bau deˈiyaaban ufayttiyaanne neessi loˈˈobaa amottiya hegaa mala laggee neeyyo koshshees. (Lee. 17:17) Hegaa mala laggeta demmanau neeni ne huuphe he eeshshaa bessana koshshees.—Pili. 2:3, 4.

[Sinttaa 7n deʼiya misiliyaa]

Ne laggeti neeyyo deˈiyaaban neeni ufayttanaadan oottiyoonaayye ufayttennaadan oottiyoonaa?