Bin 4

Mmel’eg e Fager Rom u Fithik’ e Gonop

MANG E BE FIL E BIBLE? “Mpachegem ngak e piin ni yad ba gonop me yog e gonop ngom.”​—Proverbs 13:20.

MANG E MAGAWON RIY? Pi fager rodad e rayog ni ngar k’aringed gadad ni nge fel’ u wan’dad e tin bay rodad, maku rayog ni ngar k’aringed gadad ni ngad adaged ni ngad yoornaged boch e tin bay rodad. Ngongol rorad nge thin rorad e rayog ni nge thilyeg rogon ni gad be lemnag e par rodad.​—1 Korinth 15:33.

Am lemnag e n’en ni be yog e Bible u murung’agen fa 12 i pumoon nni ranod ra damitgad nga Kanaan. Ragag i yad e ur weliyed “u fithik’ e girdi’ nu Israel i yan bogi n’en nde riyul’ ni murung’agen e re nam nem ni kar lekged.” Yugu aram rogon ma bay l’agruw i yad nni rognew ni fare nam nu Kanaan e “ba nam nrib fel’.” Machane i rung’ag e girdi’ e thin ni yog fa ragag nem e damit. Be gaar e Bible: “Me yor yu Israel ni polo’ e nep’ ni kari kireban’rad. Ma yad be non nib togopluw ngak Moses nge Aron.”​—Numbers 13:30–14:9.

Ku arrogon e ngiyal’ ney ni boor e girdi’ ni “yad ma gun’gun’ ma yad be yin’ e kireb nga daken boch e girdi’.” (Jude 16) Ba mo’maw’ ni nge fel’ u wan’um e tin bay rom ni faan ga ra m’ag fager ko girdi’ nder fel’ u wan’ e tin bay rok.

MANG E RAYOG NI NGAM RIN’? Mu fal’eg i lemnag e n’en ni gimed ma weliy e fager rom. Ma uf e pi fager rom ko tin bay rorad, fa yugu yad ma gun’gun’nag e tin dariy rorad? Me gur e gab miti mang fager? Ga ma guy rogon ni nge awan’ e fager rom ngom, fa ga ma pi’ e athamgil nga lanin’rad ni nge fel’ u wan’rad e tin bay rorad?

Mu lemnag e n’en ni rin’ David, ni ir e ra mang pilung, nge Jonathan ni fak Saul ni Pilung. Ba n’uw nap’an ni i mil David ya ke dabuy Saul ni Pilung daken ma baadag ni nge li’ nge yim’. Yugu aram rogon ni Jonathan e susun e nge mang e bin migid e pilung, ma kari fel’ e thin rorow David. Ma manang ni Got e ke dugliy David ni nge mang e bin migid e pilung, mab m’agan’ ngay ni nge ayuweg e fager rok.​—1 Samuel 19:1, 2; 20:30-33; 23:14-18.

Ba t’uf ni nge yog e fager ngom ni aram rogon nib fel’ u wan’ e tin bay rok ma ma guy rogon ni nge rin’ ban’en nra fel’ rogom riy. (Proverbs 17:17) Machane, faanra nge yog e fager ngom ni aram rogon, ma susun e ngki m’ug e pi fel’ngin ney ko ngongol rom.​—Filippi 2:3, 4.

[Picture on page 7]

Ma guy e pi fager rom rogon ni nge fel’ u wan’um e tin bay rom, fa yad ma guy rogon ni ngam adag ni nge yoor boch e tin bay rom?