5 YANAPAKUY

Maskanam Dios necesitasqanchikta

BIBLIAM NIN: “Mayna kusisqam ‘Diostam necesitani’ niqkunaqa”, nispa (Mateo 5:3).

¿IMAM SASACHAWANCHIK? Waranqantin religionkunam munasqankuman hina Diosta yupaychanku. Chaymi achka runakuna tapukunku, ¿imaynatam Diosta yupaychana?, nispa. Wakin reqsisqa runakunam ninku Diospi creespa yupaychayqa yanqa otaq runakunapa mana allinninpaq kasqanta. Diospi mana iñiq reqsisqa runapa nisqanmantam huk revista nin: “Diospi iñiyqa [. . .] vidanchiktam yanqachan hinaspam maqanakuyman tanqawanchik”, nispa.

¿IMATAM RURACHWAN? Dios kasqanmanta yachananchikpaqmi averiguana (Romanos 1:20; Hebreos 3:4). Manam imawanpas harkachikunachu kay tapukuykunapa kutichiyninta tarinapaqqa: “¿Imanasqataq kaypi kachkanchik? ¿Wañukuspa maypipas kawsachwanraqchu? ¿Imanasqataq llumpay ñakariy kan? ¿Imatam ruranay Diosta agradanaypaq?”, nispa. Kusisqa kanapaqqa kay tapukuykunatam kutichina.

Arí, manam lliw niwasqanchiktachu creenanchik. Bibliam niwanchik yachayninchikta servichikunapaq, chaynapi Diospa munasqanta yachanapaq (Romanos 12:1, 2, NM). Chaypaqqa, kallpanchakunapaschá kanqa Bibliata estudianapaq hinaspa consejonkuna kasukunapaqpas, ichaqa allinninchikpaqmi kanqa. Harkawasunmi sasachakuykunamanta, manataqmi imamantapas llumpaytaqa llakikusunchu, hinaspam aswan kusisqa kawsakusun. Chayqa manamá yanqa rimayllachu. Tukuy hinastinmanta millonnintin runakunam yanapachikuchkanku Diosmantawan munayninmanta cheqapta yachaspanku. Chaypaqmi leewaq kay revistapa 26-29 paginankunapi willakuykunata.

Chaymantapas, Jehová Diosta kasukuptinchik vidanchikpi yanapawasqanchikta qawaspam astawan kuyasun. ¿Haykapipas Jehová Diospa testigonkuna nisurqankichu paykunawan Bibliata estudianaykipaq? Chayta ruraspaqa yaqapaschá apostol Pablo hina piensanki, paymi kaynata nirqa: “Diosta servispaqa qori-qollqeta hinam tarirunchik kapuqninchikwan contentakuyta yachaspanchikqa”, nispa (1 Timoteo 6:6).

[8 kaq paginapi dibujo]

Yachay Diospa agradonpaq imakuna kasqanta