پانچواں مشورہ

اپنی روحانی ضروریات پوری کریں

خدا کے کلام کی تعلیم یہ ہے:‏ ‏”‏خوش ہیں وہ جو اپنی روحانی ضروریات سے باخبر ہیں۔‏“‏—‏متی ۵:‏۳‏،‏ نیو ورلڈ ٹرانسلیشن۔‏

اِس مشورے پر عمل کرنا مشکل کیوں ہے؟‏ آج‌کل دُنیا میں بہت سے مذہب ہیں۔‏ یہ مذہب عبادت کرنے کے فرق‌فرق طریقے بتاتے ہیں۔‏ لیکن آپ یہ کیسے جان سکتے ہیں کہ کونسا مذہب خدا کی مرضی کے مطابق تعلیم دیتا ہے؟‏ بعض عالموں کا خیال ہے کہ خدا پر ایمان رکھنے اور اُس کی عبادت کرنے کا کوئی جواز نہیں ہے بلکہ یہ انسان کے لئے نقصان‌دہ ہے۔‏ ایک رسالہ میکلینز،‏ خدا پر ایمان نہ رکھنے والے ایک جانے مانے شخص کے نظریات کو اِن الفاظ میں بیان کرتا ہے:‏ ”‏مسیحیت یہ تعلیم دیتی ہے کہ پوری کائنات کو ایک ہستی نے پیدا کِیا ہے جس کی عبادت کی جانی چاہئے۔‏ لیکن سائنس اِس تعلیم کی حمایت نہیں کرتی جس کی وجہ سے انسان کُھل کر اپنی زندگی جی نہیں پاتا بلکہ جُرم اور تشدد کی طرف مائل ہو جاتا ہے۔‏“‏

آپ کیا کر سکتے ہیں؟‏ کائنات پر غور کریں جو خدا کی موجودگی کے ثبوتوں سے بھری پڑی ہے۔‏ (‏رومیوں ۱:‏۲۰؛‏ عبرانیوں ۳:‏۴‏)‏ آپ کے ذہن میں اہم سوال پیدا ہو سکتے ہیں جیسے کہ خدا نے انسان کو خلق کرکے زمین پر کیوں بسایا ہے؟‏ کیا انسان مرنے کے بعد کسی دوسرے عالم میں زندہ رہتا ہے؟‏ لوگ مصیبتوں کے بوجھ تلے کیوں دبے ہوئے ہیں؟‏ خدا مجھ سے کیا توقع کرتا ہے؟‏ ایسے سوالوں کا جواب حاصل کرنے کی پوری کوشش کریں اور یہ مت سوچیں کہ دوسرے کیا کہیں گے۔‏ جب آپ کو اِن سوالوں کے جواب مل جائیں گے تو آپ مطمئن ہوں گے اور ہر حال میں خوش رہیں گے۔‏

تاہم آنکھیں بند کرکے دوسروں کی بات کا یقین نہ کریں۔‏ خدا کی مرضی معلوم کرنے اور اُس کے مطابق چلنے کے لئے عقلمندی سے کام لیں۔‏ (‏رومیوں ۱۲:‏۱،‏ ۲‏)‏ اگر آپ خدا کے کلام کا مطالعہ کرنے کے لئے وقت نکالیں گے اور اُس کے مطابق زندگی گزاریں گے تو آپ کو بہت فائدہ ہوگا۔‏ مثال کے طور پر آپ بہت سے مسائل میں اُلجھنے سے بچ جائیں گے،‏ آپ کی فکریں کم ہو جائیں گی اور آپ زیادہ خوشی حاصل کریں گے۔‏ آپ کو اپنی کوششوں کا صلہ ضرور ملے گا۔‏ تمام قوموں سے تعلق رکھنے والے لاکھوں لوگ یہ دیکھ چکے ہیں کہ خدا اور اُس کی مرضی کے بارے میں علم حاصل کرنا بہت فائدہ‌مند ہے۔‏ آپ بھی ایسا کرنے سے فائدہ حاصل کر سکتے ہیں۔‏

جب آپ خدا کے کلام پر عمل کریں گے تو آپ خدا کی زیادہ عزت اور احترام کریں گے۔‏ اِس لئے جب یہوواہ کے گواہ آپ کے پاس آکر آپ کو پاک کلام کا مطالعہ کرنے کی دعوت دیں تو اُن کے ساتھ مطالعہ ضرور کریں۔‏ پاک کلام کا مطالعہ کرنے سے آپ بھی پولس رسول کی اِس بات سے متفق ہو جائیں گے کہ ”‏دینداری قناعت کے ساتھ بڑے نفع کا ذریعہ ہے۔‏“‏—‏۱-‏تیمتھیس ۶:‏۶‏۔‏

‏[‏صفحہ ۸ پر تصویر]‏

خدا کی مرضی معلوم کریں اور اُس کے مطابق چلیں