QOFA 5

Ayyaanaaban Neessi Koshshiyaabaa Kuntta

GEESHSHA MAXAAFAY TAMAARISSIYOY AYBEE? “Bantta ayyaanan hiyyeesa gididoogaa eriyaageeti anjjettidaageeta.”—Maa. 5:3.

XUBE GIDIYAABI AYBEE? SHaˈan qoodettiya dumma dumma haymaanooteti deˈoosona; hegeetuppe daroti ayyaanaaban neessi koshshiyaabaa kunttiyoogaa xeelliyaagan dumma dummabaa tamaarissoosona. Tumaa tamaarissiyaageenne Xoossaa ufayssiyaagee awugaakko waatada erana danddayay? Issi issi keehippe erettida xaafeti Xoossaa ammaniyoogeenne ayyo aqiyoogee bessennaba, ubba qohiyaaba yaagoosona. Makilins geetettiya maxeetee, “Saynisiyan gidin nu qofan gidin, akeekana danddayennabay deˈees giyo Kiristtaane timirttee, . . . appe hari baynna nu deˈuwaa xaasayees, qassi nuuni makkalanau koyanaadan oottees” yaagidi, Xoossi baawa giya issi erettida bitaniyaa qofaa qanttan qonccissiis.

AY OOTTANA DANDDAYAY? Xoossay deˈiyoogau naqaasha gidiyaabata pilgga. (Roo. 1:20; Ibr. 3:4) Kaallidi deˈiya keehippe koshshiya oyshatu malau zaaruwaa koyiyoogaa ooninne digganaadan paqqadoppa: Nuuni ha saˈan deˈiyoy aybissee? Hayqqi simmin deˈoy deˈii? Metoynne tuggay daridoy aybissee? Xoossay taappe koyiyoy aybee? Ha oyshatuyyo aliya zaaruwaa demmiyoogee ubbatoo ufayttidi deˈanau keehippe koshshiyaaba.

Gidoppe attin, harati neessi yootiyoobaa coˈˈu gaada ammanoppa. Xoossaa ufayssiyaabaa shaakkada eranau neeni ne “akeekaa abbiyaa” goˈettanaadan Xoossaa Qaalay minttettees. (Roo. 12:1, 2, NW) Neeni hegau baaxetiyo baaxiyaa Xoossay anjjana. Geeshsha Maxaafaa xannaˈanau wodiyaa immiyaabanne a zoriyaa oosuwan peeshshiyaaba gidikko, metuwaappe haakkanau, darin unˈˈettennan agganaunne ne deˈuwan keehi ufayttanau danddayaasa. Neeni ha qaalatun ammanettana danddayaasa. Dumma dumma hanotan diccida, miilooniyan qoodettiya asay Xoossaabaanne a halchuwaabaa tumaa tamaariyoogan goˈettiis.

Geeshsha Maxaafan deˈiya eratetta zoriyaa oosuwan peeshshiyoogan neeni goˈettiyo wode kaseegaappe aaruwan Xoossau aqaasa. Yihoowa Markkatuura Geeshsha Maxaafaa xannaˈanaadan shoobbiyo shoobiyaa ayssi ekkikkii? Neeni hegaadan oottiyaaba gidikko, kiitettida PHauloosi, “Taayyo de7⁠iyaabai tau gidana giya ura Xoossaa milatiyoogee dureyees” yaagido qofaa maayaasa.—1 Xim. 6:6.

[Sinttaa 8n deʼiya misiliyaa]

Xoossaa ufayssiyaabay aybakko shaakkada era