Konsol bann ki dan dey parey Zezi ti fer

LAZAR, en zonm ki ti reste Betani, ti tonm gravman malad. Son bann ser, Mart ek Mari ti anvoy bann mesaze kot Zezi zot zanmi pros. Me i ti mor avek son maladi. Son lekor ti deza dan latonm kan bann zanmi ek vwazen Mart ek Mari ti vin vizit zot pour “konsol” zot. (Zan 11:19) Finalman Zezi ti ariv Betani pour vin vwar son bann bon zanmi. Nou pou kapab aprann konsol bann ki dan dey par egzamin sa ki i ti dir e fer.

Ou prezans i montre ki ou enterese

Pour ariv Betani, Zezi ti’n bezwen travers Larivyer Zourden e an sortan Zeriko i ti bezwen mont en semen apik ki ti annan en kantite kontour. Sa vwayaz ti pran li apepre de zour. Mart ti vitman al akeyir Zezi an deor sa vilaz. Plitar, kan Mari ti tande ki Zezi ti la, li osi i ti degaze pour al vwar li. (Zan 10:40-42; 11:6, 17-20, 28, 29) Prezans Zezi ti vreman en sours rekonfor pour sa de ser ki ti dan sagrinasyon akoz lanmor zot frer.

 Pareyman ozordi, nou kapab konsol bann ki dan dey par nou prezans. Scott ek Lydia ti perdi zot garson Theo, ki ti annan si-z-an, dan en aksidan. Zot rapel: “Nou ti bezwen soutyen nou bann fanmir ek zanmi. Zot ti vin deswit kot lopital dan milye lannwit.” Ki sa bann zanmi ti dir? “Zot pa ti bezwen dir nanryen a sa moman. Zot prezans ti montre ki zot ti enterese avek nou.”

Labib i dir ki kan Zezi ti vwar bann dimoun pe plere akoz lanmor Lazar, i “ti emosyonnen” e i “ti plere.” (Zan 11:33-35, 38) Zezi pa ti onte pour plere devan lezot. I ti santi zot douler e i ti konpran ki i vedir pour perdi en dimoun ki ou kontan dan lanmor. Ki leson nou aprann? Kan nou pe vizit bann dimoun ki dan dey, nou pa bezwen santi nou anbarase pour pler avek bann ki pe plere. (Romen 12:15) De lot kote, pa esey fer sa dimoun ki dan dey plere. Serten i prefer pour pler an prive.

Ekout avek konpasyon

Petet Zezi ti annan detrwa parol lankourazman pour dir avek Mart ek Mari, me aparaman i ti les zot koz premye. (Zan 11:20, 21, 32) Me kan i ti koz avek Mart, i ti demann li en kestyon, apre i ti ekoute.—Zan 11:25-27.

Kan nou ekout atantivman, sa i montre ki nou vreman konsernen. Nou bezwen ekout byen pour nou kapab konsol bann ki dan dey. Nou kapab demontre sa kalite par demann kestyon ki ankouraz sa bann ki dan dey pour eksprim zot plis. Par kont, veye ki ou pa fors zot pour koze si zot zis anvi reste trankil. Petet zot zis fatige oubyen bezwen repoze.

Bann dimoun ki dan dey i kapab santi zot dekonserte e parfwa zot tant pour repet menm keksoz. Serten i eksprim tou zot santiman. Mari ek Mart ti dir avek Zezi: “Senyer, si ou ti la, mon frer pa ti a’n mor.” (Zan 11:21, 32) Ki Zezi ti fer? I ti ekout avek pasyans. I ti evite dir zot ki mannyer zot ti merit santi. San dout, i ti konpran ki zot ti pe santi en gro douler.

Si ou pa asire ki ou pour dir kan ou vizit en dimoun ki dan dey, ou kapab konmans par demann li: “Ou ti a kontan koz lo la?” Apre donn li tou ou latansyon kan i pe reponn. Ekout sa ki i pe dir ou atantivman. Get sa dimoun e esey konpran son santiman.

Pour esey konpran santiman en dimoun ki dan dey pa fasil. Lydia ti eksplike: “Nou bann bezwen ti sanze. Parfwa nou pa ti kapab tenir me nou ti plere asodlarm devan bann ki ti’n vin vizit nou. Nou ti zis anvi ki lezot i koz avek nou lo bann keksoz pozitif. Nou bann zanmi ti fer zot mye pour konpran nou santiman.”

Zezi ti fer sa parfetman. I ti konnen ki sakenn i annan “son fleo ek son soufrans.” (2 Kronik 6:29) Zezi ti reponn sa de ser dapre lafason ki zot ti akeyir li. Mart ti kontinyen koze, alor Zezi ti fer konversasyon avek li. Me akoz Mari ti pe plere, Zezi pa ti koz pour lontan avek li. (Zan 11:20-28, 32-35) Ki nou kapab aprann atraver son legzanp? Petet i pli bon si nou les sa dimoun ki dan dey koz lo sa ki i anvi. Si ou pare pour ekout zot ler zot eks prim zot sagrinasyon, sa pou rekonfort zot en kantite.

Parol ki fer dibyen

Kan Mari ek Mart ti dir avek Zezi, “si ou ti la,” Zezi pa ti esey blanm personn oubyen i pa ti ofanse akoz sa ki zot ti’n dir li. I ti reponn Mart avek lasirans: “Ou frer pou resisite.” (Zan 11:23) Zis avek sa detrwa mo, Zezi ti ed li pour vwar pli lwen e i ti fer li rapel ki i ti annan lespwar.

Kan nou koz avek bann dimoun ki dan dey, nou bezwen mazinen ki bann parol senser e pozitif, menm si i zis detrwa mo, i kapab annan en gran lefe. Nou kapab swa dir oubyen ekrir sa bann parol rekonfortan. Vi ki nou touzour kapab relir bann let ek kart, zot kapab anmenn rekonfor menm bokou letan apre ki sa dimoun in mor. Nef mwan apre lanmor son msye Bob, Kath ti relir tou kart ki i ti’n gannyen. I ti dir: “Mon’n remarke ki zot ti ed mwan bokou plis a sa moman e se la ki mon ti santi mwan vreman ganny rekonforte.”

Ki bann pti mo kondoleans ki ou kapab ekrir? Ou kapab ekrir lo en leksperyans ki ou ti gannyen avek sa dimoun ki’n mor oubyen lo en kalite ki ou ti apresye dan li. Kath i dir: “Bann bon keksoz ki zot ti dir lo Bob ek son personnalite ti fer mwan anvi sourir e an menm tan plere. Bann keksoz ki zot ti rakonte lo li ti fer mwan riye e rapel sa lavi ere ki nou ti annan ansanm. Plizyer sa bann kart ki annan bokou valer pour mwan i annan bann verse Labib ladan.”

Ofer led pratik

Pour ed fanmir Lazar, Zezi ti fer sa ki nou pa kapab fer, i ti redonn Lazar lavi. (Zan 11:43, 44) Me nou, nou kapab ofer led pratik ki dapre nou kapasite parey prepar en repa, ofer en landrwa reste pour bann ki vin vizit sa fanmir, okip zot lenz, pran swen avek zanfan, al fer konmisyon oubyen fer laranzman transpor pour zot. San dout bann pti aksyon ki demontre lanmour i kapab ganny byen apresye par sa bann ki dan dey.

Nou kapab konpran ki bann dimoun ki dan dey i kapab bezwen en pe letan tousel. Kantmenm sa, ou kapab pran linisyativ pour gard kontak avek zot. En manman ki dan dey i dir: “Napa okenn moman ki ou kapab dir ki ou nepli dan sagrinasyon oubyen en dat ki ou kapab dir ou santi ou pli byen.” Serten dimoun i esey mazin sa dimoun ki dan dey lo bann dat enportan parey lanniverser maryaz oubyen dat ki sa lanmor ti arive. Si ou la pandan sa bann moman parey ou pou vin en bon zanmi ki toultan la dan bann moman difisil.—Proverb 17:17.

Rekonfor ki Zezi ti ofer ti enkli sa lespwar ki i ti donn son bann disip: “Nou zanmi Lazar pe dormi, me mon pe al lev li dan son sonmey.” (Zan 11:11) Zezi ti rasir son bann disip ki pou annan en rezireksyon. I ti demann Mart: “Eski ou krwar sa?” Mart ti reponn: “Wi, Senyer.”—Zan 11:24-27.

Eski ou krwar ki Zezi pou resisit bann dimoun mor? Si wi, partaz sa zoli lespwar avek bann ki dan dey. Ofer zot sipor dan en fason pratik. Ou parol ek aksyon pou anmenn serten rekonfor.—1 Zan 3:18.

[Map lo paz 9]

PERE

Larivyer Zourden

Zeriko

Betani

Lanmer Mor

Zerizalenm

SAMARI