Kundejenu Anafwishi Neyi Chayikundejeleñayi Yesu

LAZARU wakuBetani, wadiña hakafwilu. Ahelindi Mata niMariya, atemesheli antemesha kudi ibwambu dindi Yesu wadikundiliyi nindi. Ilaña Lazaru wafwili. Chelili anamujiki dehi, amabwambu niantuñi nawu enjili nakunoñola Mata niMariya kulonda ‘ayikundeji.’ (Yowanu 11:19) Yesu chashikiliyi kuBetani wayili nakutala ibwambu dindi. Neyi tudiza yuma yahosheli niyakoñeliyi, tukwiluka chitwatela kukundeja anafwishi.

Kuyihempula Kwamwekeshaña Nawu Mwayakamena

Hakwila nawu Yesu yashiki kuBetani, wendeli lwendu lwamafuku ayedi, kwawuka Kaloña Yodana nikukanduka nyikolu munjila yafuma kuYeriku yalunkuñu. Mata wamukinkililili Yesu nakumwimusha henohu kanda yeñili mumukala. Mariya chachitiyiliyi nawu Yesu nenzi dehi, niyena wayili lufuchi nakumutala. (Yowanu 10:40-42; 11:6, 17-20, 28, 29) Hampinji yahempwiliyi  Yesu awa antu avwalika ivumu dimu afwishili wayikundejeli hama.

Nimakonu, tunateli kukundeja antu anafwishi neyi tuyihempula. Scott naLydia afwishili mwanawu weyala wayaaka yitanu nachimu, wejina daTheo mumaposu, anukaña nawu: “Twakeñeleña kwikala hamu nachisaka niamabwambu kulonda atukwashi. Enjili mukachi kawufuku kuchipatela.” Kuduhu mazu ahosheluwu awa mabwambu? “Haniyi mpinji hitwakeñeleña netu ahoshuhu mazu adi ejimaku. Chatuhempwiluwu chamwekesheli nawu atwakameneni.”

Bayibolu yahosha nawu Yesu chamweniyi antu amudilileña Lazaru, ‘watiyili kukala’ niyena ‘wadilili.’ (Yowanu 11:33-35, 38) Yesu hatoñojokeli nindi akumusekesha neyi yadila hakachi kawantuku. Welukili chiyatiyileñawu hakufwisha. Tukudizilaku chumanyi? Neyi tunayi nakuhempula antu anafwishi hitwatela kutiya nsonyi yakudila hamu nawakwakudilaku. (Aroma 12:15) Hanu dinu, bayi muleñela muntu wunafwisha yatachiki kudilaku. Amakwawu anateli kudilila kumbadi.

Tiyililenu naWushona

Yesu watela wadiña namazu akukundeja Mata niMariya, ilaña wayilekeli asambili kuhosha. (Yowanu 11:20, 21, 32) Chahanjekeleñayi naMata, wamwihwili lwihu nawa watiyilili chahosheliyi.—Yowanu 11:25-27.

Kutiyilila chinakuhoshawu kwamwekeshaña nawu mwayakamena antu chikupu. Hakwila nawu tukundeji anafwishi twatela kutiyilila nakanañachima. Tunateli kumwekesha netu tunakutiyilila chinakuhoshawu, neyi twihulaña malwihu akuleñela antu anafwishi atwalekuhu kushimuna yuma yinakutoñojokawu. Hela chochu, neyi hiyanakukeña kuhoshaku, bayi muyikanjikijaku. Hadaha anazeyi anakukeña kunooka.

Antu anafwishi anateli kuluwankana nawa mpinji yikwawu anateli kufuntila funtilahu nsañu yoyimu. Amakwawu ahoshaña nsañu yidi kumuchima wawu nakutalumoka. Mariya niMata amulejeli Yesu nawu: “Eyi Mwanta, neyi eyi wadiñi kunu, mutenowu mana kwami hanafuku.” (Yowanu 11:21, 32) Yesu welilidi? Watiyilili mumesu awunda nawa nawushona. Hayilejeli chiyatela kutoñojokawuku. Chakadi nikujina welukili nindi muntu neyi nafwishi kumuchima kwamukataña nankashi.

Neyi muneluki wanyi chakukundeja muntu wunafwishi wumunahempuli, munateli kutachika kuhanjeka nindi kuhitila mukumwihula nenu, “Munakukeña tuhanjekuhu haniyi nsañu?” Tiyililenu chikwakulayi, nawa shenuku maana kumazu anakuhoshayi. Mutalenuña muntu hamesu nawa fwilenu kwiluka chinakutiyayi.

Kwiluka yuma yinakutoñojokayi muntu wunafwishi kwakala. Lydia walumbulwili nindi: “Chihahitili mpinji yitoñojoka yetu yahimpikili, mpinji yikwawu twakañenyeña kuumika nawa twadilileña mukachi kawantu enjileña nakutuhempula. Twakeñeleña antu kuhosha mazu akutukolesha. Amabwambu jetu azatili nañovu hakwiluka chitwatiyileña.”

Yesu welili mwenimu chaloña. Welukili nindi muntu wudi wejima wukweti ‘chipupu mumuchima niyihuñu.’ (2 Kushindulula 6:29) Yesu wayakwili munjila yashiyashana ana antu ayedi avwalika ivumu dimu. Mata watwalekeluhu nakuhosha, dichi Yesu wahanjekeli nindi. Chineli Mariya wadilileña, Yesu hahosheli nindi mpinji  yayilehuku. (Yowanu 11:20-28, 32-35) Chumanyi chitukudizila kuchakutalilahu chaYesu? Chikuwaha neyi muntu wunafwishi yatachikilahu kuhosha. Neyi mutiyilila chinakuhoshayi muntu wunaneñi hadaha munateli kumukundeja hama.

Hoshenu Mazu Akuyikolesha

Chelili Mariya niMata amuleji Yesu nawu: ‘Neyi eyi wadiñi kunu,’ hayihosholeli hela kuhila namazu ahosheluwuku. Yesu wamulejeli Mata nindi: “Mana kweyi wukusañuka mukufwa.” (Yowanu 11:23) Nanawa mazu antesha, Yesu wamukwashili Mata kutalila chuma chikumwekana nawa wamulejeli nindi wukusañuka.

Neyi munakuhosha nawantu anafwishi, anukenu nenu, mazu amawahi akukolesha, anateli kuyikwasha chikupu. Tunateli kusoneka hela kuhosha mazu akukundeja. Chineli nyikanda hela kaadi anateli kuyitaña cheñi, yinateli kuyikundeja hadi mpinji yayilehi. Chelili munahiti dehi tukweji tutanu natuwana kufuma hafwiliyi mfumwindi Bob, Kath watañili cheñi makaadi ejima amutemesheleluwu. Wahosheli nindi: “Ankwashili chikupu hayina mpinji nawa akundejeli.”

Nsañwinyi yimwatela kusoneka hamukanda wawihi wakukundeja? Munateli kusoneka yuma yayiwahi yimwamwanukilañahu muntu wafwa, yuma yimwadiluñishileña hamu hela chililu chimwakomokeli mudi yena. Kath wahosheli nindi: “Mazu amawahi ahosheleñawu hadi Bob niyililu yindi anzañalesheleña hampinji yoyimu andilishileña. Mpanji yakusehesha yahosheleñawu hadi Bob yansehesheleña nawa nanukileña mpinji yayiwahi yitwadiluñishileña. Nakeña nankashi makaadi mwekala mavasi amuBayibolu.”

Yizatilenuku Nyidimu

Hakukwasha chisaka chaLazaru, Yesu wakoñeli chuma chitwatela kubula kwila. Wamusañwili Lazaru. (Yowanu 11:43, 44) Ilaña tunateli kuzata yuma yinesekani nañovu jetu chidi neyi kuloñesha yakudya, kukeñela antu anenzi hachipenji hakukama, kumukoselaku yakuvwala, kumuhembelaku anyana, kuyilandila yuma hela kuyisendaku mumotoka. Neyi tumwekesha kukeña munyidimu yamuchidiwu anafwishi akusakilila nankashi.

Kafwampi, antu anafwishi akeñaña mpinji yakwikala nkawawu. Hela chochu, munateli kuwana njila yakuhanjekelamu nawu. Mama yawantu wumu wafwishili wahosheli nindi: “Hikwekala mpinji yatanjikawu nawu diyatela kuleka muntu kudila hela yatela kutiyayi chiwahuku.” Amakwawu akeñaña kwanuka mwini kwawu hefuku dalema, chidi neyi ifuku dadisumbwiluwu hela ifuku dafwiliyi mwinikwawu. Neyi mwikalaña nawu hampinji yamuchidiwu, mukwikala ibwambu damuntu hampinji yakala.—Yishimu 17:17.

Yesu wayikundejeli cheñi atumbanji twindi kuhitila mukuyileja hakuchiñeja nindi: “Ibwambu detu Lazaru nayi dehi mutulu; ami hinukuya nakamuhindwishi mutulu.” (Yowanu 11:11) Yesu wayilejeli chikupu atumbanji twindi nindi afu amba kasañuka. Wamwihwili Mata nindi: “Eyi wunetiyi mwenimu?” Yena wamwakwili nindi: “Eña Mwanta.”—Yowanu 11:24-27.

Komana mwakuhwelela nenu Yesu wamba kasañula afu? Neyi dimu mwatela kulejaku anafwishi iku kuchiñeja kwalema. Yizatilenuku nyidimu yinateli kuyikwasha. Nawa mazu imukuhosha hela nyidimu yimukuyizatila yikuyikundeja chikupu.—1 Yowanu 3:18.

[Jimapu jidi hefu 18]

(Neyi munakukeña kumona ntanjikilu yejima talenu mumukanda)

PERIYA

Kaloña Yodana

Yeriku

Betani

Ijiya daMuñwa

Yerusalema

SAMARIYA