Tjhiriya Abahlongakalelweko, Njengombana Kwenza UJesu

ULAZARU, ogade ahlala eBhethaniya wagula khulu. Abodadwabo, uMarta noMariya, bathumela umlayezo emnganinabo omkhulu uJesu. Kodwana uLazaru wahlongakala. Njengombana alele elibeni, abangani nabomakhelwana bavakatjhela uMarta noMariya “ukuzobadunduzela.” (Jwanisi 11:19) Emaswapheleni, uJesu wafika eBhethaniya wayokubona abangani bakhe abathandako. Ngokucabangela akutjhoko nakwenzako, singafunda okuthileko malungana nokutjhiriya abahlongakalelweko.

Ukuba Khona Kwakho Kutjengisa Bona Uyabakhathalela

Ukufika eBhethaniya, uJesu bekufuze akhambe amalanga amabili, ayame uMlambo iJordani anyuke umkhuphuka omazombezombe ukusuka eJerikho. Msinyana uMarta wayokuhlangabeza uJesu emaqintelweni womuzi. Ngokukhamba kwesikhathi, uMariya nakezwa bona uJesu ufikile, msinyana wayombona. (Jwanisi 10:40-42; 11:6, 17-20, 28, 29)  Ukuba khona kwakaJesu kwamambala kwaba ngokutjhiriyako kibodade abatlhuwilekwaba.

Namhlanjesi, ngokufanako ukuba khona kwethu kutjhiriya abatlhuwileko. UScott noLydia, abahlongakalelwa yindodanabo eneemnyaka esithandathu, uTheo, engozini, bayakhumbula: “Besitlhoga iinhlobo nabangani bona basisekele. Balunga esibhedlela phakathi kobusuku.” Bathini abanganaba? “Ngesikhatheso, besingafuni bona bakhulume. Ukuba khona kwabo bekutjho lukhulu—kwatjengisa bona bebasikhathalela.”

IBhayibhili ithi uJesu nekabona abalilela ukuhlongakalelwa nguLazaru, “ihliziyo yakhe yakgwatheka” begodu “walila iinyembezi.” (Jwanisi 11:33-35, 38) UJesu akhenge akuqale njengokungasi budoda ukulila phambi kwabantu. Gade azizwa njengabo begodu abarhawukela. Ngisiphi isifundo esisifundako? Nesivakatjhela abahlongakalelweko, akutlhogeki sizizwe sinamahloni ukulila nabalilako. (KwebeRoma 12:15) Ngakelinye ihlangothi, ungakateleli umuntu ohlongakalelweko bona alile. Abanye banganyula ukulilela ngemsitheleni.

Lalela Ngesirhawu

UJesu kungenzeka gade anawo amezwi wesikhuthazo kuMarta noMariya, kodwana wabalisa bakhulume qangi. (Jwanisi 11:20, 21, 32) Nekakhuluma noMarta, wambuza umbuzo, bese walalela.—Jwanisi 11:25-27.

Ukulalelisisa kutjengisa ukukhathalela kwamambala. Ukutjhiriya abahlongakalelweko, kufuze silalelisise. Singazibonisa siziinlaleli ezihle ngokubuza iimbuzo eyenza abahlongakalelweko baragele phambili ngokuveza amazizwabo. Nokho, tjheja bona ungabakateleli ukukhuluma nebafuna ukuthula. Kungenzeka badiniwe bafuna ukuphumula.

Abahlongakalelweko bangazizwa baphelelwe mamandla ngesinye isikhathi babuyelele izinto. Abanye bangawaveza amazizwabo. UMariya noMarta bathi kuJesu: “Kosi, ngathana gade ulapha, umfowethu ngangakafi!” (Jwanisi 11:21, 32) Wenzani uJesu? Walalelisisa ngesineke nangomusa. Akhenge abatjele bona kufuze bazizwe njani. Ngokunganakuzaza gade azwisisa bona abahlongakalelweko kungenzeka bezwa ubuhlungu.

Nengabe awuqiniseki bona uthini newuvakatjhele abahlongakalelweko, ungathoma ukucoca ngokuthi, “Ningathanda ukukhuluma ngakho?” Bese ulalelisisa ipendulo. Lalelisisa. Mqale ngemehlweni umuntu okhulumako bese ulinge ukuzwisisa indlela azizwa ngayo.

Kubudisi ukuzwisisa amazizo wabahlongakalelweko. ULydia wathi, “Iintlhogo zethu ziyatjhentjha. Ngesinye isikhathi besikhihla isililo phambi kweemvakatjhi. Besifuna bona abantu bazwisise. Abangani bethu benza abangakwenza ukuzwisisa amazizwethu.”

UJesu wakwenza ngokupheleleko lokhu. Gade asazi bona “ngiloyo naloyo uyabazi ubuhlungu nokutlhaga kwakhe.” (2 IMilando 6:29) UJesu wabaphendula ngeendlela ezingafaniko abodade ababilaba. UMarta waragela phambili nokukhuluma, ngalokho uJesu wacoca naye. Ngombana uMariya gade alila, uJesu akhenge akhulume khulu. (Jwanisi 11:20-28, 32-35) Singafundani esibonelwenesi? Kungaba bhedere ukulisa ohlongakalelweko bona kube nguye okhulumako. Ukuzimisela kwakho ukulalela  njengombana baveza amatlhuwabo kungabatjhiriya.

Amezwi Alaphako

UMariya noMarta nebasithi kuJesu: “Ngathana gade ulapha,” amezwabo akhenge amenze ahlabeke ngabakutjhoko. Ipendulo eqinisekisako kuMarta ngile: ‘Umfowenu uzakuvuka.’ (Jwanisi 11:23) Ngamezwi ambalwa layo, uJesu wamrhelebha bona aqale phambili begodu wamkhumbuza bona ithemba lisesekhona.

Newukhuluma nabahlongakalelweko, khumbula bona amezwi athembekileko nakhako angenza lukhulu, kunganandaba bona mancani kangangani. Amezwi wokutjhiriya angakhulunywa namtjhana atlolwe phasi. Njengombana iincwadi namakarada kungafundwa godu, kunganikela induduzo ehlala isikhathi eside. Ngemva kweenyanga ezilithoba indodakwakhe uBob ihlongakele, uKath godu wafunda woke amakarada awafumanako. Wathi: “Ngafumana bona angirhelebhe ngitjho nangaphezu kwangesikhatheso. Kulapho bengitlhoga khona ukutjhiriywa.”

Khuyini ongayitlola emlayezweni omfitjhani wokutjhiriya? Ungatlola ngehlokoleya—izinto ebenizihlanganyela namtjhana izinto ezihle egade izenza. UKath wathi: “Iingcoco ezimnandi ngoBob nangobuntu bakhe zingenza ngifune ukumomotheka nokulila ngesikhathi esifanako. Iindaba ezihlekisako ngaye zingenza ngigigitheke bese ngikhumbula iinkhathi ezimnandi ebesiba nazo. Amakarada amanengi aligugu nje abandakanya amavesi avela eBhayibhilini.”

Nikela Irhelebho Lamambala

Ukurhelebha umndeni wekhabo lakaLazaru, uJesu wenza into esingeze sakwazi ukuyenza. Wabuyisela uLazaru ekuphileni. (Jwanisi 11:43, 44) Kodwana singenza izinto esingakghona ukuzenza, njengokupheka ukudla, ukulungisela iimvakatjhi indawo, ukuvasa, ukutjheja abantwana abancani, ukwenza iimberegwana ethileko namtjhana ukurhelebha ngesikhwelo. Ngokunganakuzaza izenzo ezilula zokutjengisa abahlongakalelweko ithando bangazithabela.

Kuyazwakala bona abahlongakalelweko bangatlhoga isikhathi sokuba bodwa. Nanyana kunjalo, ungathatha amagadango wokuthoma wokunande ubathinta. Omunye umma owahlongakalelwako wathi: “Akunasikhathi esimediweko sokulila, akunasikhathi esibekiweko sokuba bhedere.” Abanye balinga ukukhumbula abahlongakalelweko ngamalanga aqakathekileko, njengelanga lomtjhado namtjhana ilanga lokufa. Ngokuzenza utholakale ngeenkhathi ezinjalo, ungaqalwa njengomngani oligugu ngesikhathi sobudisi.—Iziyema 17:17.

Indlela uJesu abatjhiriya ngayo beyibandakanya ithemba alifundisa abafundi bakhe nekasithi: “Umngani wethu uLazaru ulele, kodwana ngizakhamba ngomvusa.” (Jwanisi 11:11) UJesu waqinisekisa abalandeli bakhe bona ukuvuka kwabafileko kuzokwenzeka. Wabuza uMarta: “Uyakukholwa lokhu na?” Waphendula: “Iye, Kosi.”—Jwanisi 11:24-27.

Uyakholelwa bona uJesu uzokuvusa abafileko? Nengabe kunjalo, hlanganyela ithemba eliyigugweli nabahlongakalelweko. Basekele. Amezwi nezenzo zakho kuzobalethela induduzo ngesilinganiso esithileko.—1 KaJwanisi 3:18.

[UMebhe ekhasini 9]

(Emagameni ahlelwe ngokuzeleko, qala incwadi)

IPHERIYA

UMlambo IJordani

IJerikho

IBethaniya

ILwandle LeTswayi

IJerusalema

ISAMARIYA