Homotša Bao ba Hwetšwego, Bjalo ka ge Jesu a Dirile

LATSARO, modudi wa Bethania, o ile a babja kudu. Dikgaetšedi tša gagwe, Mareta le Maria, di ile tša roma motho gore a ye go tsebiša mogwera wa tšona wa kgaufsi e lego Jesu. Eupša Latsaro o ile a bolawa ke bolwetši bjoo. Ge a robetše ka lebitleng, bagwera le baagišani ba ile ba etela Mareta le Maria “e le gore ba ba homotše.” (Johane 11:19) Mafelelong, Jesu o ile a fihla Bethania gomme a ya go bona bagwera ba gagwe ba rategago. Ka go hlahloba seo a se boletšego le go se dira, re ka ithuta se sengwe mabapi le kamoo re ka homotšago bao ba hwetšwego.

Go ba Gona ga Gago go Bontšha Gore o na le Taba

Gore Jesu a fihle Bethania, o be a swanetše go sepela leeto la matšatši a e ka bago a mabedi, a tshele Noka ya Jorodane gomme a rotoge ka tsela ya manyokenyoke yeo e tšwago Jeriko. Kapejana Mareta o ile a ya go dumediša Jesu ka ntlenyana ga motse. Ka morago, ge Maria a kwele gore Jesu o gona, le yena o ile a kitimela go yo mmona. (Johane 10:40-42; 11:6, 17-20, 28, 29) Ka ntle le pelaelo, go ba gona ga Jesu go ile gwa homotša dikgaetšedi tše tšeo di bego di nyamile.

 Ka mo go swanago, le lehono go ba gona ga rena go ka homotša bao ba nyamilego. Scott le Lydia, bao ba hwetšwego ke morwa wa bona, Theo, wa nywaga e tshelelago ka kotsi, ba gopola ka gore: “Re be re nyaka thekgo ya ditho tša lapa le bagwera. Ba ile ba tla sepetlele bošego-gare.” Bagwera ba ba ile ba re’ng? “Ka nako yeo re be re sa nyake mantšu. Go ba gona ga bona go be go bolela go gontši—ba be ba e-na le taba.”

Beibele e re ge Jesu a bona bao ba bego ba llela Latsaro, o ile “a huduega” gomme “a ntšha megokgo.” (Johane 11:33-35, 38) Jesu o be a sa nagane gore go lla pele ga batho ga go swanele banna. O ile a kwa bohloko bjoo ba bo kwago le go kwešiša tahlegelo ya bona. Re ithuta’ng go se? Ge re etela bao ba hwetšwego, ga se ra swanela go ikwa re lewa ke dihlong tša go lla le bao ba llago. (Baroma 12:15) Ka lehlakoreng le lengwe, o se ke wa ikwa o gapeletšega go dira gore motho yo a hwetšwego a lle. Ba bangwe ba ka kgetha go dira bjalo ka thopeng.

Theetša ka Kwelobohloko

Jesu a ka ba a be a e-na le mantšu ao a ka a botšago Mareta le Maria, eupša go bonala a ile a ba dumelela gore ba bolele pele. (Johane 11:20, 21, 32) Ge a be a bolela le Mareta, o ile a botšiša potšišo gomme a theetša karabo.—Johane 11:25-27.

Go theetša ka kelohloko go bontšha go tshwenyega ka batho e le ka kgonthe. Gore re kgone go homotša bao ba hwetšwego, re swanetše go theetša ka kelohloko. Re ka itlhatsela re le batheetši ba babotse ka go botšiša dipotšišo tšeo di dirago gore bao ba hwetšwego ba ntšhe sa mafahleng. Lega go le bjalo, ela hloko gore o se ke wa ba gapeletša go bolela le ge ba nyaka go ikhomolela. Ba ka fo ba ba lapile gomme ba nyaka go khutša.

Bao ba llago ba ka no se sa ikwa gomme ba bušeletša dilo tšeo ba di bolelago. Ba bangwe ba ka bolela kamoo ba ikwago ka gona. Maria le Mareta ba ile ba botša Jesu gore: “Morena, ge nkabe o be o le gona, kgaetšedi ya-ka nkabe a se a hwa.” (Johane 11:21, 32) Jesu o ile a dira’ng? O ile a theetša ka go se fele pelo le ka kwelobohloko. O ile a phema go leka go ba botša gore ba ikwe bjang. Ka ntle le pelaelo o be a kwešiša gore ba ka ba ba ikwa ba nyamile kudu e bile ba e-kwa bohloko.

Ge o sa tsebe gore o ka re’ng ge o etetše yoo a hwetšwego, o ka thoma poledišano ka go botšiša gore, “Na o ka rata go bolela ka seo se diragetšego?” Ke moka o theetše karabo ka kelohloko. Theetša ka kelohloko seo o se botšwago. Lebelela motho yo o bolelago le yena gomme o leke go kwešiša maikwelo a gagwe.

Ga go bonolo go kwešiša maikwelo a motho yo a hwetšwego. Lydia o hlalosa ka gore: “Dinyakwa tša rena di ile tša fetoga. Ka dinako tše dingwe re be re palelwa ke go itshwara gomme re lla kudu pele ga baeng. Re be re nyaka gore ba bangwe ba be le pono e nepagetšego. Bagwera ba rena ba ile ba katanela go kwešiša maikwelo a rena.”

Jesu o ile a dira se ka mo go phethagetšego. O be a tseba gore batho bohle ba na le “kôtlô ya dipelo tša bôná.” (2 Koronika 6:29) Jesu o arabile madume a dikgaetšedi tše ka tsela e sa swanego. Mareta o ile a tšwela pele a bolela, ka gona Jesu o ile a bolela le yena. Ka baka la gore Maria o be a lla, Jesu o ile a homola nako e telele. (Johane 11:20-28, 32-35) Re ka ithuta’ng mohlaleng wa gagwe? E ka ba gabotse go dumelela bao ba hwetšwego gore ba laole poledišano. Go ikemišetša  ga gago go ba theetša ge ba dutše ba hlalosa manyami a bona go ka ba homotša kudu.

Mantšu a Fodišago

Ge Maria le Mareta ba botša Jesu gore: “Ge nkabe o be o le gona,” ga se a ka a ba latofatša goba go kgopišwa ke seo ba se boletšego. Karabo ya gagwe e kgothatšago go Mareta e bile gore: “Kgaetšedi ya gago o tla tsoga.” (Johane 11:23) Ka mantšu ao a mmalwa, Jesu o ile a mo thuša go lebelela pele le go mo gopotša gore go na le kholofelo.

Ge o bolela le bao ba llago, gopola gore mantšu a tšwago pelong le a agago a ka bolela go gontši, go sa šetšwe gore ke a mmalwa gakaakaang. Mantšu a kgothatšago a ka bolelwa goba a ngwalwa. Ka ge mangwalo gotee le dikarata di ka balwa gantši, di ka nea khomotšo ka nako e telele. Dikgwedi tše senyane ka morago ga lehu la monna wa gagwe Bob, Kath o ile a bala gape dikarata tšeo a di hweditšego. O itše: “Ke lemogile gore di nthušitše kudu ka nako yeo. Ke ile ka homotšega ka yona nako yeo.”

O ka akaretša mantšu afe lengwalong le lekopana la khomotšo? O ka ngwala ka bao ba hwilego—ka selo seo le se dirilego le le gotee goba seka seo se bego se go kgahla sa motho yoo. Kath o re: “Mantšu a botho mabapi le Bob le semelo sa gagwe a dirile gore ke nyake go myemyela le go lla ka nako e tee. Dikanegelo tšeo di segišago mabapi le yena di be di dira gore ke sege le go gopola bophelo bja rena bjo re bo thabetšego re le gotee. Dikarata tše dintši tšeo ga bjale ke di tšeelago godimo di be di e-na le ditemana tša Beibele.”

Nea Thušo e Šomago

Ge Jesu a thuša lapa labo Latsaro, o dirile seo rena re ka se kgonego go se dira. O ile a tsoša Latsaro bahung. (Johane 11:43, 44) Eupša re ka dira dilo tšeo re ka kgonago go di dira tše bjalo ka go apea dijo, go nea baeng ba bona marobalo, go ba hlatswetša diaparo, go hlokomela bana, go ba yela mabenkeleng, goba go ba nea senamelwa ge ba e-ya mafelong a itšego. Ka ntle le pelaelo, ditiro tše bonolo tšeo di bontšhago lerato di tla thabelwa ke bao ba hwetšwego.

Ke mo go kwešišegago gore bao ba nyamilego ba ka nyaka nako ya go ba noši. Lega go le bjalo, o ka gata mogato wa pele wa go ikgokaganya le bona. Mma yo mongwe yo a hwetšwego o re: “Ga go nako ya go fetša go lla, goba letšatši la go ikwa o le kaone.” Ba bangwe ba leka go gopola bao ba hwetšwego matšatšing ao a lego bohlokwa go bona, a bjalo ka segopotšo sa letšatši la lenyalo goba sa letšatši la lehu. Ka go itira yo a hwetšagalago ka dinako tšeo, o ka ba mogwera yo a tšeelwago godimo dinakong tše thata.—Diema 17:17.

Khomotšo yeo Jesu a bego a e nea e be e akaretša kholofelo yeo a bego a ruta barutiwa ba gagwe mabapi le yona, ya gore: “Latsaro mogwera wa rena o ile go khutša, eupša ke ya moo go yo mo tsoša borokong.” (Johane 11:11) Jesu o ile a kgonthišetša balatedi ba gagwe gore go tla ba le tsogo ya bahu. O ile a botšiša Mareta gore: “Na o dumela se?” O ile a araba ka gore: “Ee, Morena.”—Johane 11:24-27.

Na o a dumela gore Jesu o tla tsoša bahu? Ge e ba go le bjalo, boledišana le bao ba hwetšwego ka kholofelo ye. Ba nee thekgo ka ditsela tše di šomago. Ke moka mantšu a gago le ditiro di tla ba nea tekanyo e itšego ya khomotšo.—1 Johane 3:18.

[Mmapa go letlakala 9]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

PEREA

Noka ya Jorodane

Jeriko

Bethania

Lewatle la Letswai

Jerusalema

SAMARIA