Amubaumbulizye Bakafwidwa Mbuli Mbwaakacita Jesu

LAZARO, wakali kukkala ku Betaniya, wakaciswa kapati. Bacizyi bakwe, nkokuti Marta a Mariya, bakatuma bantu kuli Jesu mweenzinyina. Pele Lazaro wakafwa. Kali mucuumbwe, beenzinyina abasimukobonyina bakali kuswaya Marta a Mariya kutegwa ‘babaumbulizye.’ (Johane 11:19) Lino Jesu naakasika ku Betaniya wakaunka kukubona beenzinyina. Kwiinda mukulanga-langa nzyakaamba akucita, tulakonzya kwiiya mbotukonzya kuumbulizya bantu bafwidwa.

Kuba Ambabo Kutondezya Kuti Mulababikkila Maano

Jesu wakeenda mazuba obilo, kuzabuka Mulonga wa Jordano alimwi akwiinda nzila yakali kuzwa ku Jeriko yamalundu kutegwa asike ku Betaniya. Marta wakamulundukila Jesu kuyoomutambula katananjila mumunzi. Mpoonya Mariya naakamvwa kuti Jesu wasika, awalo wakafwambaana kuyoomubona. (Johane 10:40-42; 11:6, 17-20, 28, 29) Kusika  kwa Jesu kwakabaumbulizya ncobeni bacizyi bobilo bakali mubuumba.

Mazuba aano, kujanika kuŋanda yamalila kulakonzya kubaumbulizya aabo balila. Ba Scott aba Lydia ibakafwidwa mwana musankwa wamyaka iili cisambomwe yakuzyalwa, Theo, muntenda yamumugwagwa, bakaamba kuti: “Twakali kuyanda bamukwasyi abeenzuma kuti batuumbulizye. Bakaboola kucibbadela akati kamasiku.” Ino ncinzi ncobakaamba beenzinyina aaba? “Aciindi eeci, tiitwakali kuyanda kuti baambe cili coonse. Kuba andiswe kwakatondezya kuti balatubikkila maano.”

Bbaibbele lyaamba kuti Jesu naakababona bantu bakali kulila Lazaro, “wakapenga” alimwi “yakamweenda misozi.” (Johane 11:33-35, 38) Jesu wakalila nokuba kuti musankwa. Wakeetezyegwa alimwi awalo wakasweekelwa. Ino twiiya nzi? Twaunka kuswaya baabo bafwidwa, tatweelede kufwa nsoni kulila abaabo balila. (Baloma 12:15) Kunze lyaboobo, tatweelede kumupa kulila muntu wafwidwa. Bamwi tabayandi kubonwa kuti balalila.

Amubaswiilile Nobaambaula

Jesu ambweni wakali kuyanda kubaumbulizya ba Marta a Mariya, pele wakasaanguna kuswiilila nobakali kwaambaula. (Johane 11:20, 21, 32) Naakabandika a Marta, wakamubuzya mubuzyo, mpoonya wakaswiilila.—Johane 11:25-27.

Kuswiilila kutondezya kuti tulababikkila maano. Kutegwa tubaumbulizye bantu bafwidwa, tweelede kubaswiilisisya. Tulakonzya kuba baswiilizi babotu kwiinda mukubuzya mibuzyo iikonzya kupa kuti muntu wafwidwa aambe mbwalimvwa. Pele tamweelede kubasungilizya kwaambaula ikuti kabatayandi. Ambweni balikatede alimwi bayanda kupumuna.

Bantu bafwidwa zimwi ziindi inga tabaciyeeyi kabotu alimwi inga kabainduluka nzyobaamba kale. Bamwi balatondezya mbobalimvwa kwiinda mumicito. Mariya antoomwe a Marta bakaambila Jesu kuti: “Mwami, ikuti nowakaliko kuno, mukwesu naatakafwa.” (Johane 11:21, 32) Ino ncinzi Jesu cakacita? Wakaswiilila cakukkazyika moyo. Tanaakabaambila mbobakeelede kulimvwa. Wakalizyi kuti ulakonzya kubapa kubijilwa.

Ikuti naa tamuzyi ncomukonzya kwaamba mwaswaya muntu wafwidwa, mulakonzya kutalisya mubandi kwiinda mukubuzya kuti, “Sena mulayanda kubandika?” Mwamana mweelede kuswiilila naingula. Amumulange alimwi akumvwa mbwalimvwa.

Kubamvwisya bantu bafwidwa mbobalimvwa tacili cuuba-uba. Ba Lydia balapandulula kuti, “Zyintu nzyotwakali kuyanda zyakacinca. Zimwi ziindi twakali kwaalilwa kulijata kulila akati kabeenzu. Twakali kuyanda kuti bamwi kabatubikkila maano. Beenzuma bakali kutweetelela.”

Jesu wakacita oobu munzila iili kabotu. Wakalizyi kuti umwi aumwi ulizyi “mapenzi aamumoyo wakwe.” (2 Makani 6:29) Jesu tanaakabaingula munzila iikozyenye bacizyi bobilo. Marta wakazumanana kwaambaula, aboobo Jesu wakaambaula anguwe. Akaambo kakuti Mariya wakali kulila, Jesu tanaakaambaula anguwe kwaciindi cilamfwu.  (Johane 11:20-28, 32-35) Ino ncinzi ncotukonzya kwiiya kucikozyanyo eeci? Cilainda kubota ikuti mwamuleka wafwidwa kuzumanana kubandika. Kubaswiilila ciindi nobaambaula kulakonzya kubaumbulizya.

Majwi Aaponya

Mariya a Marta nibakaambila Jesu kuti: “Nowakali kokuno,” taakwe naakabapa mulandu naa kunyema. Wakasyomezya Marta kuti: “Imunyoko ulabuka.” (Johane 11:23) Majwi aayo masyoonto ngaakamwaambila, Jesu wakamugwasya kuba abulangizi.

Nomubandika abantu bafwidwa, amuyeeye kuti majwi masyoonto aali kabotu alakonzya kubakulwaizya. Mulakonzya kubaumbulizya kwiinda mukubandika ambabo naa kubalembela. Akaambo kakuti balakonzya kwaabala magwalo naa makkaadi ciindi aciindi, alakonzya kubaumbulizya kwaciindi cilamfwu. Nikwakainda myezi iili fwuka kabafwide balumi babo ba Bob, ba Kath bakaabala alimwi makkaadi ngobakatambwide. Bakaamba kuti: “Ndakajana kuti akandigwasya kapati eeco ciindi. Nceciindi nindakaumbulizyigwa.”

Ino ncinzi ncomukonzya kwaamba mukagwalo katondezya kuti muluuside? Mulakonzya kulemba kujatikizya muntu wakafwa—cintu cakamucitikila antoomwe naa bube mbomwakali kuyanda mulinguwe. Ba Kath baamba kuti: “Majwi mabotu kujatikizya ba Bob akapa kuti ndiyande kuseka akulila aciindi comwe. Makani aajatikizya mbabo akandipa kuti ndiseke akuyeeya zyintu zibotu zyakali kucitika nitwakali amwi. Makkaadi ngondiyandisya lino alijisi atupango twamu Bbaibbele.”

Amubagwasye

Kugwasya mukwasyi wa Lazaro, Jesu wakacita cintu swebo ncotutakonzyi kucita. Wakamubusya Lazaro. (Johane 11:43, 44) Nokuba boobo, tulakonzya kucita zyintu nzyotukonzya, mbuli kubajikila, kutambula beenzu baboola kudilwe, kubawasyila, kulanganya bana, kuula ziyandika naa kwaaba mootokala wanu kuti baubelesye. Micito misyoonto iicitwa caluyando bayooilumba bantu bakafwidwa.

Bajisi malila inga bayandika ciindi cakuba balikke. Nokuba boobo, mulakonzya kujana ciindi cakuba ambabo. Mukaintu umwi wakafwidwa wakaamba kuti, “Kunyina ciindi cibikkidwe muntu ncaelede kulila naa kuleka kulila.” Bamwi balabatamba bakafwidwa ciindi nobasekelela, mbuli buzuba nobakakwatana. Kwiinda mukuba ambabo muziindi zili boobu, mulakonzya kuba balongwe beni-beni muziindi zyamapenzi.—Tusimpi 17:17.

Luumbulizyo Jesu ndwaakapa lulabikkilizya abulangizi mbwakaambila basikwiiya bakwe kuti: “Lazalo mulongwe wesu uloona, pele ndilaunka kuyoomubusya.” (Johane 11:11) Jesu wakasyomezya basikumutobela kuti bafwide bayoobuka. Wakabuzya Marta kuti: “Sena ulaasyoma makani aaya?” wakaingula kuti: “Inzya Mwami.”—Johane 11:24-27.

Sena mulasyoma kuti Jesu uyoobabusya bafwide? Ikuti naa mulasyoma, amubaambile bulangizi oobu aabo bakafwidwa. Amubacitile nzyobayandika. Majwi aanu anzyomutikabacitile ziyoobaumbulizya.—1 Johane 3:18.

[Maapu iili apeeji 26]

(For fully formatted text, see publication)

PEREYA

Mulonga wa Jordano

Jeriko

Betaniya

Lwizi Lwamunyo

Jerusalemu

SAMARIYA