Pembuzgani Awo Mbali Wawo Watayika Nga Umo Yesu Wakacitira

LAZARO, uyo wakakhalanga ku Betaniya, wakalwara comene. Ŵadumbu ŵake, Marita na Mariya, ŵakatuma ŵanthu kuti ŵakamanyiske mubwezi wawo Yesu za ulwari uwu. Kweni Lazaro wakafwa cifukwa ca ulwari uwu. Apo wakaŵikika mu dindi, ŵabwezi ndiposo ŵazengezgani ŵakiza kwa Marita na Mariya “mwakuti ŵaŵapembuzge.” (Yohane 11:19) Pamasinda Yesu wakafika ku Betaniya ndipo wakaluta kukawona ŵabwezi ŵake. Kusanda ivyo wakayowoya ndiposo kucita kutovwirenge kumanya umo nase tingapembuzgira awo mbali wawo watayika.

Para Mwalutako Mukulongora Kuti Mukuŵaghanaghanira

Kuti wakafike ku Betaniya, Yesu wakenda ulendo wa mazuŵa ghaŵiri, wakambuka Mlonga wa Yorodani ndiposo kukwera vikwera vya mu msewu wakufuma ku Yeriko. Yesu wakati wafika waka mu muzi uwu, Marita wakamucimbilira kuti wakamutawuzge. Pamasinda Mariya wati wapulika kuti Yesu wafika, nayo wakacimbira kuti wakamuwone. (Yohane 10:40-42; 11:6, 17-20, 28, 29) Nchakuwonekerathu kuti ŵanakazi aŵa ŵakapembuzgika comene kuwona kuti Yesu wiza.

 Mazuŵa ghano napo, ŵanthu awo ŵali na citima ŵangapembuzgika para tingaŵa nawo pa nyengo iyi. Scott na Lydia awo mwana wawo, zina lake Theo, wa vilimika vinkhondi na cimoza wakafwa pa ngozi, ŵakuti: “Tikakhumbanga ŵabali ndiposo ŵabwezi ŵithu ŵaŵe nase pafupi. Ŵakiza pakati pa usiku ku cipatala.” Kasi ŵabwezi aŵa ŵakayowoya vici? Scott na Lydia ŵakayowoyaso kuti: “Pa nyengo iyi kuti tikakhumbanga kuti ŵayowoye cilicose yayi. Kwiza waka kukalongora kuti ŵakutighanaghanira.”

Baibolo likuti Yesu “wakakweŵeka” wakati wawona ŵanthu ŵakulira nyifwa ya Lazaro ndipo “wakathiska masozi.” (Yohane 11:33-35, 38) Yesu wakawona kuti mbwana ucoko yayi kulira pamaso pa ŵanthu. Yesu wakamanya umo ŵanthu aŵa ŵakujipulikira ndipo nayo citima cikamukora. Kasi tikusambirapo vici? Para taluta ku ŵanthu awo mbali wawo watayika, tikwenera yayi kucita soni kulira na awo ŵakulira. (Ŵaroma 12:15) Ndipouli, munthu uyo mbali wake watayika tingamucicizganga yayi kuti walire. Ŵanji ŵakutemwa kulilira kwaŵekha.

Ŵategherezgani Comene Para Ŵakuyowoya

Yesu wakwenera kuti wakaŵa na mazgu ghakupembuzga ghakuti waphalire Marita na Mariya, kweni vikulongora kuti wakalindilira dankha kuti ndiwo ŵambe kuyowoya. (Yohane 11:20, 21, 32) Apo wakayowoya na Marita, wakamufumba fumbo na kutegherezga.—Yohane 11:25-27.

Para tikuŵategherezga comene tikulongora kuti tikuŵaghanaghanira nadi. Kuti tipembuzge awo mbali wawo watayika, tikwenera kuŵategherezga comene. Tingaŵa ŵategherezgi ŵawemi usange tingafumba mafumbo agho ghangawovwira kuti ŵayowoye ivyo vili ku mtima kwawo. Kweni citani mwamahara kuti muleke kuŵacicizga kudumbiskana nawo para ŵandakhumbe kuyowoya. Ŵangaŵa kuti vyalema ndipo ŵakukhumba kupumulapo.

Awo mbali wawo watayika ŵangatimbanizgika maghanoghano, ndipo nyengo zinyake ŵangayowoya vinthu mwakuwerezgawerezga. Ŵanyake ŵangayowoya mwambura kwenelera umo ŵakujipulikira. Mariya na Marita, waliyose wakaphalira Yesu kuti: “Fumu, muŵenge kuno mphanyi mudumbu wane wali kufwa cara.” (Yohane 11:21, 32) Kasi Yesu wakacitaci? Wakaŵategherezga comene na kuŵalongora lusungu. Wakaŵaphalirapo yayi umo ŵakeneranga kujipulikira. Nchakuwonekerathu kuti wakamanyanga kuti awo mbali wawo watayika vikuŵaŵinya comene.

Para mukumanya makora yayi ivyo mungayowoya ku munthu uyo mbali wake watayika, panji mungamba kuyowoya nayo mwa kumufumba kuti, “Kasi ningacezgapo namwe?” Pamanyuma tegherezgani comene ivyo wazgorenge. Tegherezgani comene para wakulongosora. Mulaŵiskani uyo wakuyowoya ndipo pulikiskani maghanoghano ghake.

Nchipusu yayi kupulikiska maghanoghano gha awo mbali wawo watayika. Lydia wakuti: “Tikasinthanga umo tikajipulikiranga. Nyengo zinyake tikaliranga kwambura kupembuzgika pamaso pa ŵanthu awo ŵiza kuzakatiwona. Tikakhumbanga waka kuti ŵatipulikiskenge. Ŵabwezi ŵithu ŵakayezgayezga kutipulikiska.”

Pa nkhani ya kupulikiska ŵanji, Yesu wakacitanga makora comene. Wakamanyanga kuti waliyose wali na “uheni wake na wake” panji kuti suzgo lake na lake. (2 Midauko 6:29) Pakuyowoyeskana na ŵadumbu ŵa Lazaro, Yesu wakayowoya nawo mwakuyana yayi. Marita wakalutilira kuyowoya, ntheura Yesu wakalutilira kudumbiskana nayo. Kweni cifukwa cakuti Mariya wakaliranga, Yesu wakayowoya kwa nyengo yitali yayi. (Yohane 11:20-28, 32-35) Kasi tingasambirakoci? Cingaŵa ciwemi kupeleka mpata kwa uyo mbali  wake watayika kuti ndiyo wayowoyenge comene. Ŵangapembuzgika comene usange mungaŵategherezga comene para ŵakuyowoya za citima ico ŵali naco.

Yowoyani Mazgu Ghakucizga

Apo Mariya na Marita ŵakaphalira Yesu kuti “muŵenge kuno,” Yesu wakaŵapa mulandu yayi, nesi kuŵakwiyira. Kweni mwakukhozga wakati kwa Marita: “Mudumbu wako wawukenge.” (Yohane 11:23) Na mazgu ghacoko waka agha, Yesu wakawovwira Marita kulindilira ivyo vicitikenge munthazi.

Pakuyowoya na awo mbali wawo watayika, kumbukani kuti nanga mungayowoya mazgu ghacoko waka, ghangaŵapembuzga comene cikuru ghakufumira pasi pa mtima. Tingapembuzga awo mbali wawo watayika mwa kuŵaphalira panji kuŵalembera mazgu ghakukhozga. Pakuti makalata na makadi ghangaŵazgikaso para pajumpha nyengo, ghangaŵapembuzga kwa nyengo yitali. Pati pajumpha myezi yinkhondi na yinayi kufuma apo mfumu wake, Bob wakatayikira, Kath wakaŵazgaso makadi ghose agho ŵanthu ŵakamutumira. Iyo wakuti: “Nkhawona kuti pa nyengo iyi ghakanovwira comene. Apa ndipo nkhapembuzgika nadi.”

Kasi mungalemba vinthu wuli kuti mupembuzge awo mbali wawo watayika? Mungalemba vinthu viwemi vyakukhwaskana na uyo wali kufwa, ivyo vikamucitikirani imwe lumoza na uyo wali kufwa panji nkharo yake yiwemi. Kath wakuti: “Nkhamwemweteranga ndiposo kuthiska masozi para naŵazga kalata panji kadi yakulongosora vinthu viwemi ndiposo nkharo yiwemi ya Bob. Para naŵazga nkhani zakusekiska zakukhwaskana na Bob nkhakondwanga ndiposo kukumbukira vinthu viwemi ivyo tikacitiranga lumoza. Ghanandi mwa makadi agho nkhutemwa kuŵazga ni agho muli mavesi gha mu Baibolo.”

Ŵawovwirani

Kuti wawovwire ŵabali ŵa Lazaro, Yesu wakacita vinthu ivyo ise tingacita yayi. Wakawuska Lazaro ku ŵakufwa. (Yohane 11:43, 44) Ndipouli, nase tingacita vinthu vinyake kuti tovwire awo mbali wawo watayika nga nkhuŵaphikira, kuŵacapira, kupeleka malo ghakugona ku awo ŵiza ku nyifwa, kupwelelera ŵana, kujipeleka kuti ŵatitumenge uko iwo ŵangaluta yayi panji kupeleka wovwiri wa thirasipoti. Awo mbali wawo watayika ŵangawonga comene vinthu ivyo tingaŵacitira nanga vingaŵa vicoko waka, cikuru tacita mwakufumira pasi pa mtima.

Nchakupulikikwa kuti nyengo zinyake awo mbali wawo watayika ŵangakhumba kuŵa na nyengo yakuŵira paŵekha. Ndipouli, mungayezgayezga kucita mwamahara kuti muyowoyenge nawo nyengo na nyengo. Mama munyake wakuti: “Palije utali weneco wa nyengo iyo yikujumphapo kuti citima cimare.” Ŵanji ŵakutemwa kucema munthu uyo munyake wa mu nthengwa wali kutayika kuti ŵacezge nayo pa zuŵa ilo wakatolerana na uyo wali kufwa panji ilo wakafwira. Para mungaŵacema pa nyengo zanthena izi, mungalongora kuti ndimwe mubwezi wakovwira pa nyengo ya suzgo.—Zintharika 17:17.

Cipembuzgo ico Yesu wakapeleka ndicoso wakasambizga ŵasambiri ŵake, apo wakati: “Lazaro mubwezi withu waya kukapumura, kweni ine nkhuya kwenekura kukamuwuska mu tulo.” (Yohane 11:11) Yesu wakasimikizgira ŵanthu awo ŵakamulondezganga kuti ŵakufwa ŵazamuwuka nadi. Wakafumba Marita kuti: “Kasi ukugomezga ici?” Marita wakazgora kuti: “Enya, Fumu.”—Yohane 11:24-27.

Kasi mukugomezga kuti Yesu wazamuwuska ŵakufwa? Usange ni nthena, ŵaphaliraniko awo mbali wawo watayika za cilindizga ici. Ŵawovwirani. Ivyo mukuyowoya ndiposo kucita vingaŵapembuzga nadi.—1 Yohane 3:18.

[Mapu pa peji 18]

(Mu magazini yakusindikizga ndimo vikuwoneka makora)

PEREYA

Mlonga wa Yorodani

Yeriko

Betaniya

Nyanja ya Mcere

Yerusalemu

SAMARIYA