Ol Stamba Rod Blong Mekem Famle i Hapi

Yu Mas Toktok Wetem Pikinini Blong Yu Long Saed Blong Ol Fasin Blong Man Wetem Woman

Yangfala Alicia * i talem se: “Samtaem mi wantem save nomo sam samting long saed blong fasin blong man wetem woman. Be mi harem se sipos mi askem papa mama blong mi long saed ya, bae oli tingting nogud long mi.”

Inez, mama blong Alicia i talem se: “Mi wantem tumas blong toktok wetem gel blong mi long saed blong ol fasin blong man wetem woman, be hem i bisi tumas, hem i gat plante samting blong mekem. I hadwok blong faenem wan taem we i stret blong storian wetem hem.”

TEDE ol program long televisin, ol muvi, mo ol pablisiti tu, oli stap soemaot bodi blong man wetem woman long klia ples. Ating wan ples nomo we samting ya i tabu yet blong tokbaot, hemia insaed long famle. Wan yangfala long Kanada, nem blong hem Michael, i talem se: “Ol papa mama oli mas save se mifala i fraet tumas mo mifala i sem bigwan blong tokbaot samting ya wetem olgeta. I isi moa blong tokbaot samting ya wetem wan fren.”

Plante taem, ol papa mama tu oli fraet blong tokbaot samting ya. Wan woman we nem blong hem Debra W. Haffner, we hem i stap tijim man long fasin blong lukaotgud long bodi, i raetem wan buk (Beyond the Big Talk) mo hem i talem se: “Plante papa mama oli talem long mi se, oli pem wan buk we i tokbaot fasin blong man we i go wetem woman no wan buk we i tokbaot bodi blong man mo woman, ale oli putum buk ya long rum blong pikinini nomo, blong pikinini i save ridim. Olsem nao, oli ting se i no nid blong tokbaot samting ya bakegen wetem ol pikinini blong olgeta.” Misis Debra i talem se taem papa mama i mekem samting ya, i olsem we oli stap talem long pikinini se: “Mifala i wantem we yu yu save bodi blong yu mo fasin blong man wetem woman, be mifala i no wantem tokbaot.”

Sipos yu yu wan papa no wan mama, yu no mas mekem olsem. Yu mas traem blong toktok wetem pikinini blong yu long saed ya. Hemia wan samting we i impoten tumas. I gud yu tingbaot tri risen from wanem yu mas mekem olsem:

1. Ol fasin blong man tede oli no moa olsem bifo. James we i gat 20 yia blong hem, i talem se: “Bifo, ating ol papa mama oli tokbaot fasin blong man we i slip wetem woman, se hemia taem hasban i slip wetem woman blong hem. Be tede i gat plante narafala fasin blong man i go wetem woman. I gat ol fasin blong yusum maot no as blong pleplei wetem ol tabu haf blong bodi blong man no woman, i gat ol doti pija mo toktok long Intenet mo long mobaelfon tu.”

2. Nating se pikinini blong yu i smol yet, be bambae hem i harem ol giaman stori long saed ya. Wan mama we nem blong hem Sheila, i talem se: “Taem pikinini blong yu i stat blong go long skul, hem i stat tu blong harem ol storian long saed blong man wetem woman. Be ol stori we pikinini blong yu i harem, oli defren olgeta long samting we yu yu wantem hem i save long saed ya.”

 3. Pikinini blong yu i gat plante kwestin long saed ya be bambae hem i no save askem stret long yu. Ana i gat 15 yia blong hem, mo hem i stap long Brasil. Hem i talem se: “Blong talem stret, mi mi no save nating se mi mas mekem olsem wanem blong tokbaot samting ya wetem papa mama blong mi.”

Ol papa mama. God i givim wok ya long yufala. Yufala i mas tijim ol pikinini blong yufala blong oli save wanem fasin blong man wetem woman we i stret, mo wanem fasin we i no stret. (Efesas 6:4) I tru, hemia wan samting we i no isi long yu blong tokbaot mo i no isi tu long olgeta. Be ating plante yangfala oli gat sem tingting we Danielle i gat. Danielle we i gat 14 yia blong hem, i talem se: “Mifala i wantem we papa mama nao i toktok wetem mifala long saed blong ol samting ya. Mifala i no wantem lanem samting ya long wan tija no long wan program long televisin.” ?Ale, olsem wanem blong tokbaot samting ya wetem pikinini blong yu, nating se i no isi long yu? *

Yu Mas Givim Save We i Stret Wetem Yia Blong Pikinini

Ol pikinini blong yumi oli no stap kalabus long haos, taswe taem oli smol yet, oli harem ol toktok finis long saed blong man we i slip wetem woman. Be samting we yumi wari moa long hem, hemia se yumi stap long ol ‘las dei,’ mo ol man nogud tede oli stap “gohed blong mekem i mowas olgeta.” (2 Timoti 3:1, 13) Sore tumas, plante man oli spolem ol pikinini, oli mekem nogud wetem olgeta.

Taswe i impoten tumas we yu mas stat tijim ol pikinini blong yu taem oli smol yet. Wan mama long Jemani, nem blong hem Renate, i talem se: “Sipos yu wet gogo oli kasem 13 yia blong olgeta, i let finis. Bambae oli no moa wantem talemaot ol tingting blong olgeta long yu from we, taem pikinini i kasem yia olsem, bodi blong hem i stat jenis finis mo hem i sem blong tokbaot olkaen samting ya.” Yes, yu mas givim save long pikinini we i stret wetem yia blong hem.

Taem pikinini i smol yet: Pikinini i mas save stret nem blong ol tabu haf blong bodi blong hem. Yu mas talem long hem, mo yu mas talem klia long hem tu se nara man i no gat raet blong tajem ol tabu haf blong bodi blong hem. Wan mama long Meksiko, nem blong hem Julia, i talem se: “Taem smol boe blong mi i gat tri yia blong hem, mi stat toktok wetem hem long saed ya. Mi wari tumas se maet wan tija, no wan woman we bambae i lukaot long hem, no wan pikinini we i bigwan moa long hem, bambae i spolem hem. Mi wantem we hem i save wanem blong mekem blong blokem ol strenja blong oli no mekem i nogud long hem.”

TRAEM MEKEM OLSEM: I gud yu traem trenem pikinini blong yu blong hem i save wanem blong mekem, sipos wan bigman i wantem holem ol tabu haf blong bodi blong hem. Maet yu save tijim pikinini blong yu blong i tok strong long man olsem, se: “!Yu no mekem olsem! !Bae mi ripotem yu long papa (long mama)!” Yu mas talem gud long pikinini blong yu, se hem i mas ripotem man we i mekem olsem, nating sipos man ya i switim hem wetem wan presen. Mo nating sipos man ya i talem wan samting blong mekem pikinini i fraet, be pikinini i no mas fraet blong ripotem hem. *

Taem pikinini i go long praemeri skul: Hemia i taem blong ademap smol save bakegen long samting we pikinini i save finis. Wan papa we nem blong hem Peter, i talem se: “Bifo we yu mekem wan bigfala toktok long saed ya, traem faenemaot smol se pikinini i gat wanem save finis, mo traem faenemaot sipos hem i wantem save moa long saed ya no nogat. I nogud yu fosem hem blong yutufala i tokbaot samting ya. Sipos oltaem yu stap spenem taem blong storian wetem pikinini blong yu, ating bambae hem i tokbaot samting ya hem wan nomo long wan taem we i stret long hem.”

TRAEM MEKEM OLSEM: I gud yu storian plante taem wetem pikinini blong yu, we yu mekem ol storian ya oli sot nomo, i bitim we yu sidaon wetem pikinini blong yu wan taem nomo, ale yu mekem wan bigfala toktok blong talem evri samting we yu ting se hem i mas save. (Dutronome 6:6-9) Long rod ya bambae pikinini blong yu i no harem olsem se yu stap toktok tumas. Yu mas tingbaot tu se taem oli stap gruap, save blong olgeta tu i stap kam antap, ale samting we oli no naf yet blong kasem save long hem, be bambae oli naf blong kasem biaen.

Taem pikinini i stap jenis i kam yang man no yang woman: Hemia i taem blong meksua se pikinini blong yu i gat naf save long wok blong bodi, filing, mo gudfala fasin tu blong man wetem woman. Ana, we yumi tokbaot hem finis, i talem se: “Ol gel long skul blong mi oli slip wetem man finis, oli tingbaot samting ya  olsem wan pleplei nomo. Mi mi wan Kristin, mo mi ting se mi mas gat save blong halpem mi blong lukaotgud long saed ya. Nating se hem i wan samting we yumi sem blong tokbaot, be mi mas gat save long hem.” *

Woning: Ol yangfala oli no laekem tumas blong askem kwestin long saed ya from we oli fraet se papa mama blong olgeta bambae i tingting nogud long olgeta. Wan papa we nem blong hem Steven, i luksave samting ya. Hem i se: “Mitufala i wantem tokbaot samting ya wetem boe blong mitufala be mitufala i luk we hem i sem tumas. Biaen mitufala i faenemaot se hem i harem nogud from we hem i ting se mitufala i tingting nogud long hem se hem i stap mekem fasin nogud. Ale, mitufala i talem gud long hem se, mitufala i tokbaot samting ya wetem hem from we mitufala i wantem meksua se hem i save wanem we hem i mas mekem, blong agensem ol rabis fasin we oli stap gohed raonabaot long hem. Be i no from we mitufala i ting se hem i stap mekem wan samting we i nogud.”

TRAEM MEKEM OLSEM: Maet i moa gud we yu no askem tingting blong hem stret, be yu traem askem hem se ol narafala yangfala long skul blong hem oli ting wanem long saed blong wan fasin we plante man oli stap mekem. Maet yu talem se: “Plante man tede oli ting se fasin blong yusum maot blong pleplei wetem ol tabu haf blong bodi blong man no woman, i oraet nomo. I no sem mak olsem taem man mo woman i slip tugeta. ?Sam yangfala long skul blong yu oli gat tingting olsem?” Olkaen kwestin  olsem maet bambae oli mekem we yangfala blong yu i talemaot tingting blong hem.

Yu Mas Winim Fasin Blong Sem

Papa mama, ating yu harem se wok ya blong toktok wetem pikinini blong yu long saed blong fasin blong man wetem woman, i no wan isi wok nating. Be sipos yu winim, bambae yu karem gudfala frut from. Wan mama we nem blong hem Diane, i talem se: “Sloslo, taem ol yia oli pas, mi luk se samting ya i no wan samting we mi sem blong tokbaot. Storian olsem i givim janis long mi blong mi kam olsem wan gudfala fren blong pikinini blong mi.” Steven, we yumi tokbaot hem finis, i talem wan samting we i sem mak long toktok blong Diane. Hem i se: “Sipos pikinini blong yu i harem se insaed long famle, hem i save tokbaot eni samting nomo wetem yu, we bae yu no kros long hem from, ale bambae i no hadwok tumas long hem blong tokbaot ol samting ya tu we maet yumi sem blong tokbaot. I tru ating bambae yumi sem yet blong tokbaot sam samting. Be fasin ya we papa mama mo pikinini oli toktok tugeta, i wan samting we i impoten tumas long wan Kristin famle.”

[Ol futnot]

[Bokis/Tok blong pija long pej 12]

SAM SAMTING WE I GUD YU TINGBAOT . . .

I gud yu ridim ol toktok ya blong sam yangfala we oli blong ol defdefren kantri. Nao i gud yu tingbaot ol kwestin we oli kam biaen.

• “Papa mama blong mi oli talem se mi mas ridim sam buk we oli eksplenem gud wanem wok blong bodi blong man wetem woman. Ale sipos mi gat sam kwestin, mi save go askem long tufala. Be mi mi no laekem blong mekem olsem. Mi laekem moa sipos tufala i toktok stret wetem mi long saed ya.”—Ana, Brasil.

?From wanem yu ting se i impoten tumas blong toktok stret wetem pikinini blong yu, i bitim we yu givim wan buk nomo long hem blong ridim?

• “Mi harem plante stori finis long saed blong ol narakaen fasin we man i save mekem wetem woman. Ating sam long ol samting ya, papa blong mi i no save nating long olgeta. Sipos mi go askem hem long saed ya, ating bambae hem i sek nogud.”—Ken, Kanada.

?Wanem sam samting we yu ting se maet i mekem pikinini blong yu i fraet blong kam toktok wetem yu?

• “Mi gat wan kwestin long tingting blong mi we mi fraet blong askem. Be biaen, mi askem kwestin ya long papa mama blong mi. Nao tufala i tok long mi, tufala i se, ‘?From wanem yu askem samting ya? ?Wan samting i hapen long yu?’” —Masami, Japan.

?Taem pikinini blong yu i askem wan samting long yu, wanem fasin blong yu we i save mekem se, nekis taem, bambae hem i fraet blong toktok wetem yu, no, nekis taem, bambae hem i glad blong toktok wetem yu?

• “Mi save harem gud sipos papa mama blong mi, tufala i talem long mi se taem tufala i yangfala, tufala tu i gat kwestin olsem mi. Olsem nao bae mi harem se i stret nomo we mi tu mi gat kwestin long saed ya.” —Lisette, Franis.

?Taem pikinini blong yu i toktok wetem yu long saed blong bodi blong man wetem woman, yu save mekem wanem blong hem i no sem?

• “Mama blong mi i askem sam kwestin long mi blong save tingting blong mi. Mi harem save long voes blong hem se hem i kea long mi. Mi ting se i impoten tumas blong mekem we pikinini i harem gud. I nogud pikinini i harem olsem se oli stap jajem hem se hem i stap mekem sam fasin nogud.”—Gerald, Franis.

?Taem yu toktok, pikinini blong yu i harem save long voes blong yu se yu kea long hem no i harem se yu stap jajem hem? ?Yu ting se yu mas jenisim fasin blong yu long saed ya?