ŊMƐNƐ lɛ, bɔlɛnamɔ he saji ebu yɛ TV nɔ, sinii amli, kɛ jarayeli nibii ahe adafitswai amli. Etamɔ nɔ ni fɔlɔi kɛ amɛbii ateŋ sanegbaa mli pɛ abuɔ enɛ akɛ eji musu. Oblanyo ko ni atsɛɔ lɛ Michael ni jɛ Canada lɛ kɛɛ akɛ: “Miná ni kulɛ fɔlɔi le bɔ ni ewa kɛ bɔ ni eyɔɔ hiɛgbele akɛ wɔkɛ amɛ aaawie bɔlɛnamɔ he. Ewaaa akɛ wɔkɛ wɔnanemɛi aaagba enɛ he sane.”

Bei pii lɛ, ewa kɛha fɔlɔi akɛ amɛaaje sane ni tamɔ nɛkɛ lɛ he wiemɔ shishi tamɔ bɔ ni ewa kɛha gbekɛbii lɛ nɔŋŋ. Yoo ko ni tsɔɔ gbɔmɔtsoŋ hewalɛnamɔ he nii ni atsɛɔ lɛ Debra W. Haffner lɛ kɛɛ yɛ ewolo ni ji Beyond the Big Talk lɛ mli akɛ: “Fɔlɔi babaoo ekɛɛ mi akɛ amɛheɔ woji ni wieɔ bɔlɛnamɔ he loo woji ni wieɔ mɛi ni eshɛ amɛblahiiaŋ loo amɛblayeiaŋ ahe amɛhaa amɛbii lɛ, ni amɛshiɔ amɛfɔ̃ɔ amɛbii ni shɛko amɛblahiiaŋ loo amɛblayeiaŋ lɛ atsu mli, ni no sɛɛ lɛ amɛkɛ amɛ ewieee he dɔŋŋ.” Haffner kɛɛ akɛ, nɔ ni fɔlɔi lɛ taoɔ akɛɛ gbekɛbii lɛ nɔŋŋ ji akɛ: “Wɔmiitao ni nyɛle nyɛgbɔmɔtso lɛ kɛ bɔlɛnamɔ he nii; wɔsumɔɔɔ ni wɔkɛ nyɛ wieɔ he.”

Kɛ fɔlɔ ji bo lɛ, esaaa akɛ ofeɔ onii yɛ nɛkɛ gbɛ nɔ. Yɛ anɔkwale mli lɛ, ehe miihia waa ni bo diɛŋtsɛ okɛ obii lɛ awie bɔlɛnamɔ he. Susumɔ yiŋtoi etɛ ahewɔ ni enɛ he hiaa lɛ he okwɛ:

1. Nɔ ni je lɛ buɔ lɛ akɛ bɔlɛnamɔ lɛ etsake. James ni eye afii 20 lɛ kɛɛ akɛ: “Jeee wu kɛ ŋa ni miiná bɔlɛ lɛ pɛ ji nɔ ni mɛi buɔ lɛ bɔlɛnamɔ. Bianɛ lɛ, ayɛ bɔlɛnamɔi krokomɛi, tamɔ nuutso loo yoohe ni alɛmɔɔ, nuutso ni akɛwoɔ wamɔhe, kɛ bɔlɛnamɔ he saji ni mɛi kɛmajeɔ amɛhe yɛ Intanɛt lɛ loo mobail foŋ nɔ.

2. Obii lɛ baanyɛ anu bɔlɛnamɔ he saji ni ejaaa kɛjɛ amɛgbekɛbiiashi. Mami ko ni atsɛɔ lɛ Sheila lɛ kɛɛ akɛ: “Kɛ amɛbɔi skulyaa nɔŋŋ lɛ, amɛbaanu bɔlɛnamɔ he saji, ni atsɔɔŋ amɛ nɔ ni obaasumɔ ni amɛle.”

3. Obii lɛ yɛ bɔlɛnamɔ he saji ni amɛbaasumɔ ni amɛbi bo, shi amɛnyɛɛɛ amɛwo sanegbaa lɛ nɔ. Oblayoo ko ni atsɛɔ lɛ Ana ni eye  afii 15 ni jɛ Brazil lɛ kɛɛ akɛ: “Yɛ anɔkwale mli lɛ, mileee bɔ ni mafee ni mikɛ mifɔlɔi awie bɔlɛnamɔ he saji ahe.”

Eji anɔkwale akɛ, obii lɛ ni okɛ amɛ aaawie bɔlɛnamɔ he lɛ fata nitsumɔ ni Nyɔŋmɔ kɛwo odɛŋ akɛ fɔlɔ lɛ he. (Efesobii 6:4) Yɛ anɔkwale mli lɛ, ebaanyɛ efee bo kɛ obii lɛ fɛɛ hiɛgbele. Shi miishɛɛ sane ji akɛ, oblahii kɛ oblayei babaoo kɛ Danielle ni eye afii 14 lɛ baakpã gbee akɛ, “Wɔmiisumɔ ni wɔfɔlɔi atsɔɔ wɔ bɔlɛnamɔ he saji—shi jeee tsɔɔlɔi krokomɛi loo TV nɔ nifeemɔi.” Belɛ, te ooofee tɛŋŋ okɛ obii lɛ awie sane ni he hiaa shi ewiemɔ yɔɔ hiɛgbele nɛɛ he lɛ? *

Gbekɛbii nuɔ bɔlɛnamɔ he saji kɛjɛɔ amɛbibii amli tɔ̃ɔ, ja amɛkɛ mɛi ebɔɔ kwraa. Nɔ ni ehiii fe fɛɛ ji akɛ, yɛ “naagbee gbii” nɛɛ amli lɛ, gbɔmɛi fɔji ewo wu “yɛ efɔŋ mli.” (2 Timoteo 3:1, 13) Dɔlɛ sane ji akɛ, onukpai komɛi buleɔ gbekɛbii babaoo yɛ bɔlɛnamɔ akɔnɔ fɔŋ hewɔ.

No hewɔ lɛ, ehe miihia ni otsɔɔ obii lɛ bɔlɛnamɔ he nii kɛjɛ amɛgbekɛbiiashi tɔ̃ɔ. Mami ko ni atsɛɔ lɛ Renate ni jɛ Germany lɛ kɛɛ akɛ: “Kɛ́ omɛ kɛyashi beni amɛmiihe amɛshɛ amɛblahiiaŋ loo amɛblayeiaŋ dã lɛ, ekolɛ ebaafee amɛ hiɛgbele akɛ amɛkɛ bo aaawie enɛ he.” Oti lɛ ji ni otsɔɔ obii lɛ anii yɛ afii abɔ ni amɛye lɛ naa.

Kɛha gbekɛbii ni shɛko praimeri skul:

Tsɔɔmɔ amɛ bɔ ni atsɛɔ fɔmɔnii lɛ ahaa, ni oma nɔ mi oha amɛ akɛ esaaa akɛ amɛhaa mɔ ko mɔ ko taa he. Mami ko ni atsɛɔ Julia ni yɔɔ Mexico lɛ kɛɛ akɛ, “Mibɔi mibinuu lɛ nitsɔɔmɔ beni eye afii etɛ lɛ. Le ni mile akɛ tsɔɔlɔi, mɛi ni kwɛɔ gbekɛbii, loo gbekɛbii ni amɛdara fioo lɛ baanyɛ aye lɛ awui lɛ hao mi waa. Esa akɛ ele bɔ ni eeefee ebu ehe kɛjɛ mɛi kpɔji ahe.”

Kɛha gbekɛbii ni eshɛ praimeri skul:

Kɛji gbekɛbii lɛ shɛ afii nɛɛ lɛ, ŋɔɔ hegbɛ lɛ kɛtsɔɔ amɛ nibii krokomɛi fiofio ofata nɔ ni otsɔɔ amɛ momo lɛ he. Tsɛ ko ni atsɛɔ lɛ Peter lɛ tsɔɔ akɛ, “Dani okɛ amɛ baawie nɔ ko he lɛ, kwɛmɔ akɛ mɛni amɛle yɛ he dã, ni okwɛ kɛji amɛbaasumɔ ni amɛle babaoo. Kɛ́ amɛsumɔɔɔ ni amɛwie lɛ, kaanyɛ amɛnɔ. Sane lɛ diɛŋtsɛ kɛ ehe baaba kɛji okɛ obii lɛ fɔɔ sane gbaa.”

Kɛha oblahii kɛ oblayei:

Nɛkɛ beaŋ ji be ni esa akɛ okwɛ akɛ obi lɛ le nibii babaoo ni kɔɔ bɔlɛnamɔ he, nibii ni kɔɔ tsakemɔi ni ebaana yɛ egbɔmɔtsoŋ kɛ henumɔŋ, kɛ bɔ ni esa akɛ eba ejeŋ eha lɛ he. Ana ni eye afii 15 ni wɔtsi etã kɛtsɔ hiɛ lɛ wie akɛ, “Oblahii kɛ oblayei ni yɔɔ miskul lɛ kɛ amɛhe woɔ bɔlɛnamɔ mli. Misusuɔ akɛ, akɛ Kristofonyo lɛ, esa akɛ male bɔlɛnamɔ he saji babaoo. Yɛ bɔ ni eyɔɔ hiɛgbele akɛ aaawie he lɛ fɛɛ sɛɛ lɛ, eji nɔ ko ni esa akɛ male ehe sane.” *

Kadimɔ: Ekolɛ oblahii kɛ oblayei lɛ biŋ saji ejaakɛ amɛmiishe gbeyei akɛ amɛfɔlɔi lɛ baasusu akɛ amɛkɛ amɛhe miiwo jeŋba gbonyo mli. Nakai ji bɔ ni tsɛ ko ni atsɛɔ lɛ Steven lɛ na. Ekɛɛ akɛ: “Wɔbinuu lɛ shashaoɔ shi akɛ ekɛ wɔ aaawie bɔlɛnamɔ he. Shi sɛɛ mli lɛ, nɔ  ni wɔna ji akɛ, eefee lɛ akɛ wɔmiisusu akɛ ekɛ ehe miiwo jeŋba gbonyo ko mli. Wɔfee lɛ faŋŋ wɔha lɛ akɛ, jeee susumɔ ko ni wɔhiɛ yɛ ehe lɛ hewɔ ni wɔkɛ lɛ susuɔ sane nɛɛ he lɛ; wɔmiitao wɔná nɔmimaa akɛ ele bɔ ni eeefee edamɔ jeŋba gbohii ni ekɛbaakpe lɛ naa.

Eji anɔkwale akɛ, ebaanyɛ efee hiɛgbele akɛ fɔlɔi kɛ amɛbii aaawie bɔlɛnamɔ he hiɛ kɛ hiɛ. Shi sɛɛnamɔ babaoo yɛ nakai feemɔ he. Mami ko ni atsɛɔ lɛ Diane lɛ kɛɛ akɛ: “Yɛ be ko sɛɛ lɛ, ohiɛ gboŋ dɔŋŋ ejaakɛ bɔlɛnamɔ he saji ni okɛ obi lɛ wieɔ lɛ baawaje wekukpaa ni kã okɛ lɛ teŋ lɛ.” Steven ni wɔtsi etã kɛtsɔ hiɛ lɛ hu kɛ lɛ kpãa gbee. Ekɛɛ akɛ: “Kɛ́ onyɛɔ okɛ oweku lɛ mlibii lɛ gbaa nɔ fɛɛ nɔ he sane lɛ, ewaaa akɛ nyɛaawie bɔlɛnamɔ he saji ahe ni ohiɛ gbooo,” ni ekɛshi sɛɛ akɛ: “Hiɛgbele lɛ fɛɛ etãaa, shi sanegbaa kpakpa he hiaa waa ejaakɛ ewajeɔ Kristofoi aweku.”—w10-E 11/1.