LELU, kudi bimfuanyi ne malu a balume ne bakaji miaba yonso: ku TV, mu filme nansha mu piblisite. Bidi bimueneka ne: anu baledi ne bana babu ke batu bamona diyukidilangana bua malu aa bu tshibindi. Michael, nsonga wa mu Canada, udi wamba ne: “Ndi ngela meji ne: baledi mbamanye mutubi bituenza buôwa ne bundu bua kuyukila nabu malu aa. Tshibi, bitu bipepele bikole bua kuayukila ne mulunda.”

Anu bu bana, baledi batu pabu imue misangu bumvua bundu bua kuyukila ne bana babu malu aa. Debra Haffner, mulongeshi wa malu a makanda a mubidi udi wamba mu mukanda wende kampanda ne: “Baledi ba bungi mbangambila ne: mbasumbila bana babu mikanda idi yakula bua bitupa bia lulelu ne mbabatekelayi mu nzubu yabu, kadi kabatu banji kuyukila nabu malu adimu to.” Mbienze bu badi bambila bana ne: “Tudi basue bua numanye mubidi wenu ne bitupa bia lulelu, kadi katuena basue anu kuyukila nenu bua malu aa to.”​—Beyond the Big Talk

Wewe muikale muledi, kuena ne bua kuela meji a nunku to. Mbimpe wewe nkayebe uyukile malu a bitupa bia lulelu ne bana bebe bua malu asatu adi alonda aa:

1. Bantu bakadi bumvuija malu a balume ne bakaji mushindu mukuabu. James, nsonga wa bidimu 20 udi wamba ne: “Bantu kabatshitu bamona dimanyangana anu bu bualu budi mua kuenzeka anu pankatshi pa mulume ne mukajende patupu to. Lelu, bantu bakadi bangatshilangana mukana anyi kunyima, bafundilangana bilele bia busenji ku Enternete nansha mu telefone.”

2. Bantu bakuabu badi mua kukunyangila bana ne malu a busenji anu patshidibu bapuekele. Mamu Sheila udi wamba ne: “Bana nebumvue malu a busenji anu padibu batuadija kuya mu kalasa ne kabakuikala ne muenenu muimpe wa malu a bitupa bia lulelu uudi musue to.”

3. Bana bebe badi ne nkonko ya kuela bua malu a balume ne bakaji, kadi mbapange mushindu wa kuyukila nebe. Ana, udi ne bidimu 15 wa mu Brésil udi wamba ne: “Mu bulelela, ntu mpanga mua kuashila baledi banyi muyuki udi utangila malu a balume ne bakaji.”

 Umanye ne: Nzambi mmukupesha wewe muledi mudimu wa kulongesha bana bebe malu a balume ne bakaji. (Efeso 6:4) Nansha nanku, bidi mua kukuenza wewe ne bana bebe bundu. Kadi bansonga ba bungi batu pabu ne lungenyi lua buena lua Danielle, udi ne bidimu 14 elu: “Tudi basue baledi betu batulongeshe malu a balume ne bakaji, kadi katuena basue kuamanyina kudi balongeshi anyi ku TV to.” Kadi mmushindu kayi uudi mua kuyukila ne bana bebe malu aa atu bantu bamona bu a bundu? *

Bu mudi bana mu bantu, badi batuadija kumvua malu a balume ne bakaji anu patshidibu bapuekele. Tshidi tshitambe kutonda ntshia ne: mu ‘matuku a ku nshikidilu’ aa, bantu babi mbatungunuke ne kuenza “malu mabi.” (2 Timote 3:1, 13) Diakabi, batu banyanga bana ba bungi kudi bantu bakulumpe.

Ke bualu kayi, mbimpe wewe muledi ulongeshe bana bebe anu patshidibu bapuekele. Mamu Renate wa mu Allemagne udi wamba ne: “Wewe muindile too ne pikalabu ne bidimu dikumi ne pamutu, kabakuyukila nebe badilekelele to, nebumvue bundu.” Tshidi ne bualu nkulongesha bana malu bilondeshile bidimu biabu.

Bua badi ne bidimu muinshi mua bisambombo:

Ubalongeshe nangananga mêna a bitupa bia lulelu ne ubakuate ku matshi ubambile ne: muntu nansha umue kena ne bua kubilenga to. Mamu Julia wa mu Mexique udi wamba ne: “Ngakatuadija kulongesha muananyi wa balume pavuaye ne bidimu bisatu, bualu mvua mumanye ne: balongeshi, bandeji anyi bana bakuabu bakulumpe bavua mua kunyangila muananyi. Uvua ne bua kumanya mushindu wa kudilama nkayende.”

Bua bana batshidi mu tulasa tupuekele:

Mu tshikondo etshi ke muudi mua kuenda kusakidila dimanya ku dikadi nadi bana bebe. Tatu Peter udi wamba ne: “Kumpala kua kuyukila ne bana, anji kumanya bikadibu bamanye ne umona ni mbasue kumanya malu makuabu. Kubayukidishi ku bukole to. Wewe muikala uyukila ne bana bebe kuonso eku, udi mua kuyukila nabu malu aa bipepele.”

Bua bana ba bitende:

Etshi ke tshikondo tshiudi mua kujadika bikale muanebe ukadi mumanye bimpe malu adi atangila bitupa bia lulelu. Ana utukadi batele kuulu eku udi wamba ne: “Mu kalasa muetu, bana ba balume ne ba bakaji batu basangila mu mpukampuka nansha kabayi balunda. Bu mundi muena Kristo, ndi njinga kumvua tshidi bualu ebu bimpe. Nansha mudi kuyukila malu a balume ne bakaji kuenza bundu, ndi anu ne bua kumanya tshidiwu umvuija.” *

Tshia kumanya: Bana ba bitende badi mua kubenga bua kuela nkonko bualu badi batshina ne: baledi babu badi mua kulua kubamona bu bana babi. Ke tshivua tatu Steven mumone pende. Udi wamba ne: “Muananyi wa balume utu umvua bundu bua kuyukila nanyi malu a balume ne bakaji. Kadi tuakamona ne: uvua utumona tuetu  bu bavua bamuangata bu muana mubi. Tuakamuambila ne: katuvua tubenga bualu tuvua tumumona bu muana mubi to, tuvua anu basue kumanya neukadi ne dimanya dikumbane didi mua kumuambuluisha bua kuepuka bilele bibi.”

Tshidibi, kuyukila ne muanebe bua malu a balume ne bakaji ngumue wa ku midimu mikole iudi wewe muledi nayi. Kadi diditatshisha diebe nediambuluishe bana bebe. Mamu Diane udi wamba ne: “Padi matuku ende apita, bundu budi buende bukepa ne kuyukila ne muana malu a balume ne bakaji kudi kulua mushindu wa kukolesha malanda enu.” Steven utukavua batele udi ujadika pende wamba ne: “Nuenu bikale ne tshibidilu tshia kuyukila mu dîku dienu pa malu onso, nebipepele bua wewe kuyukila ne bana bebe malu adi enza bundu bu mudi a bitupa bia lulelu. Bundu kabutu anu bujika to, kadi kuakula malu patoke kudi kulengeja nsombelu mu dîku dia bena Kristo.”