Aike el Tekoi el Mo Uchul a Deurreng er a Telungalek

Mongedecheduch er a Rengelekiu el Kirel a Tekoi er a Durs

A ngeasek el Alicia * a melekoi el kmo: “ A lebebil er a taem e ngsoak el mo medengei a bebil el tekoi el kirel a durs, engdi ak melatk el kmo a lsekum a kuker a ker el kirel aika el tekoi, e a rechad er a blik a mo omdasu el kmo alta e ngngar ngii a mekngit el tekoi el kuruul.”

A Inez el delal a Alicia a melekoi el kmo: “Ngkmal soak el dengchokl el mengedecheduch er a ngelekek el kirel a tekoi er a durs, engdi ngkmal di blechoel el mechesang er a betok el tekoi er a klengar er ngii. Me ngkmal meringel el kbetik er a techall el mengedecheduch er ngii.”

CHELECHA el taem e ngkmal sebeched el mes a betok el tekoi el kirel a durs el okiu a TV me a mubi, e dirrek el sebeched el mes el llechukl er a meklou el babier me a chesbocheb el ngar er a tkul a rael er a buai. Me nguaisei, engdi ngngar er a chelsel a delengchokl e ngdirk ua lemekull el tekoi a omesodel a tekoi er a durs er a delongelir a ruungalek me a rengelekir. A 16 a rekil el Michael er a beluu er a Canada a melekoi el kmo: “Ulekum a rechad er a blik a mo medengei el kmo ak kmal imis el merur el mesaod a tekoi er a durs el obengterir. Ngbai beot a dosaod aika el tekoi el obengterir a resechelid.”

Oumesingd el taem e a ruungalek el chad a dirrek el meringel er tir el omuchel el mesaod a tekoi er a durs el mo er a rengelekir. Ngar er a babier el Beyond the Big Talk el lulluches er ngii a Debra W. Haffner, el ngii a olisechakl er a rechad el kirel a domekerreu a bedenged e ngkmo: “A rebetok el chad el oungalek a ouchais er ngak el kmo te mla mechar a babier el mesaod el kirel a tekoi er a durs me a dirrek sel lemengodech a bedengel a ngalek, e ngmai el kmed er a delemerab er a rengelekir e dirkak a ta el losaod er ngii.” Ngika el Haffner a melekoi el kirel tia el omeruul el kmo ngdi ua dedu er a rengalek el kmo: “Ngsomam a obo mungil medengei a tekoi el kirel a ngeldechel a bedengiu me a dirrek el tekoi er a durs, engdi ngdiak el somam el mesaod aika el tekoi el obengkemiu.”

A lsekum e ke oungalek el chad e ngkmal kirem el mo kerekikl a osengem el kirel a kakerous el tekoi. Ngkmal klou a ultutelel el bo mongedecheduch er a rengelekem el kirel a tekoi er a durs. Me bo dosaod aika el edei el meklou a ultutelel el tekoi:

1. A osengel a beluulechad el kirel a durs a kmal mla mo ngodech. A 20 a rekil el James a melekoi el kmo “A rechad a mla mo omes er a belkul a durs el kmo ngdikea di letekoi er a cheliuaiu er a delongelir a rebechiil el chad. Chelechang e ngmla mo er ngii a rolel a durs el ousbech a ngered me a chemedach er kid me a dirrek el okiu a internet, me a dirrek el dengua.”

2. A rengelekiu a ulterekokl el mo remenges aike el cheleuid el tekoi el kirel a durs er sel taem el dirk lemekekerei. A chedil el Sheila a melekoi el kmo: “Te mo remenges a betok el tekoi el kirel a durs sel lomuchel el ngar er a skuul, me aike el tekoi el bo lesuub a kmal diak el oltirakl aike el tekoi el mle soam el osisecheklii el kirel.”

3. A rengelekiu a kmal betok a ker el sorir el oker el kirel a durs engdi ngdiak el sorir el omuchel el mesaod el obengkemiu. A 15 a rekil el Ana er a beluu er a Brazil a melekoi el kmo: “Ngkmal diak kudengei el kmo ak mekerang e omuchel el mesaod a tekoi er a durs el obengterir a rechad er a blik.”

 Me nguaisei, engdi a omesodel a tekoi er a durs el obengterir a rengeleked a tedebechel a ngerachel el bla loterekokl a Dios el mo er a ruungalek. (Efesus 6:4) Ngklemerang, ngulterekokl el mo meringel er a ruungalek me a dirrek el rengalek el mesaod er tia el tekoi er a durs. Me nguaisei, engdi a rebetok el ngeasek a kongei el ua lolekoi a 14 a rekil el Danielle el kmo, “Kemam a somam el mesuub a tekoi er a durs el lolisechakl er kemam a rechad er a blimam el diak el sensei me a lechub a TV.” Me a leuaisei, e ke mekerang a omongedecheduch er a rengelekem el kirel tia el klou a ultutelel, e dirrek el meringel a omesodel el tekoi? *

Mesaod a Tekoi el Ultuil er a Rekrir

A rengalek a kmal di mekekerei e suub a tekoi el kirel a durs, engdi a lsekum e te kiei er a mesechesechel a chereomel, e nglocha mo diak a techellir el mo remenges aika el tekoi. Me a lmuut el tang, kid el kiei er a chelsel a “uriul sils” a uchul, me a rechad el meruul a mekngit a “mengal mora mekngit.” (2 Timoteus 3:1, 13) Me ngkmal klengiterreng, e le a rebetok el ngalek a mla metemall er a mekngit el rolel a durs el remeklou el chad a meruul el mo er tir.

Me ngkmal klou a ultutelel el kirem el mereched el lolisechakl er a rengelekem er chelecha el taem el dirk lemekekerei. A chedil el Renate er a beluu er a Dois a melekoi el kmo: “A lsekum e ke mengiil er tir el mo meklou e melasem el olisechakl er tir, e ngulterekokl el mo meringel er tir el louchais er kau a betok el tekoi, el ngeldechel a okurulel a bedengir a dirrek el rulleterir el mo meringel er tir el bleketakl el mesaod aika el tekoi.” Me a klou a ultutelel el tekoi a kired el mo medengei el kmo kede olisechakl er a rengalek er a tekoi er a durs el ultuil er a rekrir me a klemedengei er tir er a tekoi.

Mo er tirke el ngalek er a headstart: Mkerekikl el olisechakl er a ngalek el kirel a ngklel aike el klekedellel a bedenged, e mosisecheklii el kmo ngmekull el diak el kirel a chad el merutech aikaikid el klekedellel a bedengel. A chedil el Julia er a beluu er a Mexico a melekoi el kmo: “Ak ulemuchel el olisechakl er a ngelekek er a dirk el edei a rekil. E le ak medengei el kmo ngsebechel a sensei me a chad el mo obang me a lechub e ngklou el ngalek el mo tomellii a uchul me ak mirruul el uaisei. Ngkmal kirel a ngalek el mo medengei el kmo ngmekerang e mo sebechel el di ngii el omekerreu er ngii er a remekngit el chad.”

MOLASEM ER TIANG: Mosisecheklii a ngelekem el mo bekeu el mesaod er ngii er a ngii di el chad el melasem el ousekool aike el klekedall er a bedengel el lodengei el kmo ngmekull el diak el kirel el merutech. El ua itiang, ngsebechem el osisecheklii a ngelekem el mo mesisiich a ngerel el melekoi el kmo: “Lak muaisei! Chelechang e ak mo subedii a delak me a demak!” Molisiich er a rengul a ngelekem el kmo ngkot el ungil el tekoi sel le blechoel el ouchais er kau, el mo lmuut er a taem el chad a mengesuseu er ngii el lomsang a kall me a lechub e ngklalo me a lechub e ngomekdakt er ngii. *

Mo er tirke el ngar er a skuul er a Elementary: Mousbech er tia el techall el kilungii a klemedengei er a ngelekem el kirel a betok el tekoi el mo uchul a klungiolel. A chedam el ngklel a Peter a melekoi el kmo: “A uchei er a omongedecheduch, e molasem el mo medengei el kmo ngua ngerang a klemedengei er a ngelekem, e dirrek el momes er ngii e bo modengei el kmo ngsoal el mo medengei a lmuut el betok me a lechub e ngdiak. Lak morrimel er ngii el mo mesaod aika el tekoi. Cherengel a taem el mobengkel e mongedecheduch er ngii, e ngulterekokl el mekekokil el mo beot er ngii el louchais er kau aike el mera el ngar er a uldesuel.”

MOLASEM ER TIANG: Lak el sal mo kemanget a omesodiu el kirel aika el tekoi. (Duteronomi 6:6-9) Omoruul el uaisei, e ngmo diak momekberaod er a rengelekiu er a betok el tekoi. Me a lmuut el tang, cherengel a taem el lemukeroul a ngalek, e ngmukeroul a klemedengei er ngii er a tekoi el di mo ultuil er a okurulel.

Mo er a rengeasek: Chelechang e ngmocha taem el kirem el ulterekokl a rengum el kmo a ngelekem a mla mo er ngii a ungil el klemedengei er ngii el kirel a bedengel me a uldesuel me aike el melemalt el rolel a tekoi er a durs. A 15 a rekil el Ana a melekoi el kmo, “A resechal me a redil er a skulek a mla mo meruul a tekoi er a durs. Ngak el Kristiano a uchul me ngkirek el mo klou a klemedengei er ngak el kirel aika el tekoi. Ak medengei el kmo aika el tekoi er a durs a meringel er ngak el mesaod el kirel, engdi ak medengei el kmo ngkmal kirek el mo ungil a klemedengei er ngak el kirel.” *

Bo mkerekikl: A rengeasek a locha mo diak el oker a ker el dektir el omdasu el kmo a rechad er a blirir a mo omdasu el kmo ngngar ngii a mekngit el loruul. Tiang a dilubech el mo er a ta el chedam el Steven, el dilu el kmo: “A ngelekam el sechal a kmal mle chetil el mesaod a tekoi er a durs. A uriul e aki mlo medengei el kmo ngulemdasu el  kmo aki oltelechakl er ngii el kmo ngmeruul a mekngit el tekoi. Aki mileketeklii el mo er ngii el kmo ngmle somam el mesaod aika el tekoi el dimlak el belkul a kmo aki oltelechakl er ngii er a kmu ngngerang; ngbai di mle somam el olisechakl er ngii el mo meduch el omekerreu er ngii er a ngii di el mekngit el rolel a durs.”

MOLASEM ER TIANG: Ngungil a lak momuchel el oukerrekeriil er a ngelekem el ousbech a kmal betok el ker el kirel a tekoi er a durs, e bai momuchel el oker er ngii el kmo ngua ngerang a osengel ngii me a resechelil er a skuul el kirel aika el tekoi. El ua itiang, ngsebechem el melekoi el kmo: “A ruumesingd el chad er chelechang a omdasu el kmo a rolel a durs el ousbech a ngered a diak a ngera el letemellii. Ngua ngera osengir a resechelim el kirel tia el tekoi?” Choua ikaikid el ker a kmal sebechel el rullii a ngeasek el ngelekem el mo beot er ngii el ouchais aike el mera el ngar er a uldesuel me a dirrek el osengel el kirel aika el tekoi.

Bo Bekeu e Lak Ko Merur

Ngklemerang el tekoi, ngkmal meringel er a ruungalek el mo mengedecheduch er a rengelekir el kirel a tekoi er a durs, engdi ngkmal klou a ultutelel el kirir a ruungalek el chad el meruul er ngii. A chedil el Diane a melekoi el kmo: “Cherengel a taem e tia el rrenged el mesaod aika el tekoi er a durs a di merael el mo diak, e bai okiu aika el temem el mengedecheduch er a ngelekem, e ngkmal okesengii a deleuill er kau me ngii.” A Steven el dulsaod er ngii er a uchei a melekoi el kmo: “Ngmo beot er kid el mengedecheduch er a rengeleked el kirel aika el tekoi er a durs a lsekum e kede oterekeklii a taem el kirel a omesodel a ngii di el tekoi er a delongeled el telungalek.” Ngdirrek el dochelii el kmo: “A rrenged a kmal diak el sebechel el mo diak, engdi a ungil el rolel a cheldecheduch er a delongeled a klou a ultutelel el kirel a ungil, e mesisiich el deleuill er a chelsel a telungalek el Kristiano.”

[Aike el Footnote]

[Baks el ngar er a 20 el llel]

DI LEKAU LOKER ER KAU . . .

Monguiu aika el tekingir a rengeasek el meliuekl er a beluulechad, e di lekau el oker er kau aike el ker.

• A Ana er a beluu er a Brazil a kmo: “A rechad er a blik a sorir a kunguiu aike el suobel el mesaod el kirel a durs er a chebechiil e bo kungedecheduch er tir el kirel a lsekum e ngngar ngii a kerik. Engdi ak bai oureng el kmo ulekum e te bai mengedecheduch er ngak el kirel aika el tekoi.”

Ngera uchul me komdasu el kmo ngklou a ultutelel el kired el meruul a lmuut el betok el tekoi el diak di sel doldurech er a rengeleked el mo menguiu a babier el mesaod a tekoi el kirel a durs?

• A Ken el buik er a Canada a melekoi el kmo: “Ak medengei a kmal betok el tekoi el kirel aike el mekikiongel el rolel a durs el kumdasu a demak a kmal diak lodengei. Ngulterekokl el kmal kibetiekl oleko ak mo oker er ngii el kirel.”

Ngera el tekoi a locha lemedakt a rengelekem el mesaod leko er kau el kirel a uldesuir?

• A 19 a rekil el buik el Masami er a Siabal a melekoi el kmo: “Sel taem er a kuker er a rechad er a blik el kirel a tekoi er a durs e ngkmal ngilasech a rengrir el uleker er ngak el kmo, ‘Ngera me koker aika el tekoi? Ngngar ngii a omoruul er ngii el mekngit?’”

Sel loker a ker er kau a ngelekem el kirel a tekoi er a durs, e a rolel a omonger er ngii, ngrullii el mo meringel a rolel a cheldecheduch er a delongeliu me a lechub e ngmo beot?

• A 19 a rekil el Lisette er a beluu er a France a melekoi el kmo: “A kuureng el ulekum a rechad er a blik a subedak el kmo te dirrek el uleker a osisiu el ker er sera leua klungek, e dirrek el subedak el kmo ngdirrek el sebechek el oker aika el osisiu el ker el mo er tir.”

Ke mekerang e rullii a ngelekem el mo beot er ngii el mesaod aika el tekoi er a durs el obengkem?

• A 21 a rekil el Gerald er a beluu er a France a melekoi el kmo: “A delak a oker a ker er ngak el kirel a tekoi er a durs, el kmal ungil a delecherul a ngerel. Ak mo melechesuar el kmo tiang a kmal klou a ultutelel el omeruul, e le ngrullii a ngalek me ngdiak lomdasu el kmo ke oukerrekeriil er ngii.”

Ngua ngerang a delecherul a ngerem sel mongedecheduch er a ngelekem el kirel a tekoi er a durs? Omomdasu, e ngkirem el mo ngodechii a rolel a omongedecheduch el mesaod aika el tekoi?