Oinsá atu família moris kontente

Koʼalia ba Ita-nia oan kona-ba buat seksuál nian

Feto joven ida naran Alicia, * hatete: “Dala ruma haʼu hakarak hatene kona-ba buat seksuál nian, maibé haʼu sente katak se haʼu husu ba haʼu-nia inan-aman kona-ba neʼe, sira sei hanoin katak haʼu halo buat neʼebé sala.”

Alicia nia inan naran Inez, hatete: “Haʼu hakarak duni atu tuur no koʼalia ho haʼu-nia oan-feto kona-ba buat seksuál nian, maibé nia la iha tempu. Susar tebes atu buka tempu diʼak hodi bele koʼalia ho nia.”

OHIN loron, mundu neʼe nakonu ho buat seksuál nian. Ita bele haree no rona buat seksuál nian iha televizaun, filme sira no mós iha iklan sira. Maski ema koʼalia nakloke deʼit kona-ba buat seksuál nian iha fatin oioin, maibé iha família laran, inan-aman barak la brani atu koʼalia kona-ba neʼe ho oan sira. No joven barak mós sente la brani atu koʼalia kona-ba neʼe ho sira-nia inan-aman. Porezemplu, joven ida husi rai-Kanadá, naran Michael, hatete: “Haʼu sente katak haʼu-nia inan-aman la hatene katak nuʼudar joven, ami sente la diʼak no moe atu koʼalia ho sira kona-ba seks. Fasil liu atu koʼalia deʼit ho kolega.”

Baibain, buat neʼebé susar liu ba inan-aman mak atu komesa koʼalia kona-ba buat seksuál nian. No joven sira mós sente hanesan neʼe. Iha livru Beyond the Big Talk, neʼebé esplika kona-ba oinsá atu koʼalia ba oan kona-ba buat seksuál nian, profesora naran Debra W. Haffner hatete: “Inan-aman barak fó-hatene mai haʼu katak sira sosa livru neʼebé esplika kona-ba buat seksuál nian ka kona-ba moris joven nian, tau deʼit iha oan joven nia kuartu, no sira rasik nunka koʼalia kona-ba neʼe.” Haffner hatete katak kuandu inan-aman halo nuneʼe, ida-neʼe hanesan sira fó-hatene ba sira-nia oan: “Ami hakarak ó hatene kona-ba ó-nia isin no kona-ba seks, maibé ami lakohi koʼalia kona-ba neʼe ho ó.”

Se Ita mak inan-aman neʼebé sente hanesan neʼe, karik diʼak atu muda Ita-nia hanoin. Tuir loloos, importante tebes atu Ita rasik mak koʼalia ho Ita-nia oan kona-ba buat seksuál nian. Tanbasá? Hanoin toʼok razaun tolu tuirmai neʼe:

1. Ema barak nia haree kona-ba buat seksuál nian la hanesan uluk. James, ho tinan 20, hatete: “Ohin loron kuandu ema koʼalia kona-ba seks, sira la hanoin deʼit kona-ba relasaun seksuál entre laʼen no feen. Agora seks inklui hahalok seksuál ho ibun ka kidun; hahalok seksuál liuhusi internét, ka hodi haruka mensajen kona-ba seks iha telemovel.”

2. Maski Ita-nia oan sei kiʼik, karik sira rona informasaun neʼebé la loos kona-ba neʼe. Inan ida, naran Sheila, hatete: “Sira sei rona kona-ba buat seksuál nian kuandu sira komesa eskola, no sira-nia haree kona-ba seks sei la hanesan ho Ita-nia haree.”

3. Maski Ita-nia oan iha pergunta kona-ba seks, maibé karik sira lakohi komesa koʼalia kona-ba neʼe  ho Ita. Joven feto husi rai-Brazíl ho tinan 15, naran Ana, hatete: “Tuir loloos, haʼu la hatene oinsá mak haʼu bele komesa koʼalia kona-ba seks ho haʼu-nia inan-aman.”

Tuir loloos, responsabilidade neʼebé Maromak fó ba Ita nuʼudar inan-aman, inklui mós koʼalia kona-ba buat seksuál nian ba Ita-nia oan. (Efeso 6:4) Loos, koʼalia kona-ba buat hanesan neʼe bele halo Ita no Ita-nia oan sente ladún diʼak, maibé presiza duni atu koʼalia ba malu kona-ba neʼe. Joven barak sente hanesan ho Daniela, joven ida ho tinan 14, neʼebé hatete: “Ami hakarak hatene kona-ba seks husi ami-nia inan-aman rasik, laʼós husi mestre sira ka programa ruma iha televizaun.” Se nuneʼe, oinsá mak Ita bele koʼalia ho Ita-nia oan kona-ba buat importante neʼe, maski Ita sente moe? *

Tuir oan sira-nia tinan

Maski labarik sei kiʼik, maibé kuandu sira bá eskola ka halimar ho labarik seluk, sira sei rona kona-ba buat seksuál nian. Liután neʼe, Bíblia hatudu katak iha “loron ikus” sira-neʼe ema aat sei sai “aat liu”. (2 Timoteo 3:1, 13) No buat neʼebé triste tebes mak iha labarik barak neʼebé sai vítima ba ema boot neʼebé abuza sira iha dalan seksuál.

Tan neʼe, importante atu Ita komesa esplika ba Ita-nia oan kona-ba buat seksuál nian maski sira sei kiʼik. Inan ida husi rai-Alemaña, naran Renate hatete: “Se Ita hein toʼo oan sira tama tempu joven, karik sira sente moe atu koʼalia kona-ba neʼe tanba mudansa neʼebé akontese ba sira-nia isin.” Entaun, xave neʼebé importante mak fahe informasaun neʼebé loos tuir oan sira-nia tinan.

Ba labarik preprimária: Hanorin didiʼak ba oan kona-ba naran neʼebé loos iha parte isin nian ida-idak, no fó-hatene ba sira katak ema ida labele book sira-nia oin-lulik. Inan ida husi rai-Méxiku, naran Julia, hatete: “Haʼu komesa esplika ba haʼu-nia oan-mane kuandu nia sei tinan tolu. Buat neʼebé halo haʼu hanoin tebes mak karik mestre, ema neʼebé hein labarik, ka labarik neʼebé boot liu nia bele halo aat ba nia. Nia presiza hatene oinsá atu proteje nia an husi ema seluk.”

KOKO ATU HALO IDA-NEʼE: Treinu Ita-nia oan atu hatán ho makaʼas ba ema ruma neʼebé koko atu book ninia oin-lulik. Porezemplu, Ita bele hanorin oan atu hatete: “Labele! Haʼu sei kesar ba haʼu-nia inan-aman!” Fó aten-brani ba Ita-nia oan katak nia tenkesér halo ida-neʼe, maski ema neʼe promete atu fó prezente ka ameasa nia. *

Ba labarik iha eskola primária: Buka nafatin oportunidade atu esplika liután buat neʼebé sira hatene ona. Aman ida naran Peter hatete: “Antes koʼalia ho oan, koko toʼok atu husu pergunta hodi haree se sira hatene ona ka se sira hakarak hatene liután kona-ba neʼe. Labele obriga sira atu koʼalia. Se ita sempre uza tempu hamutuk ho Ita-nia oan, sei sai fasil liu atu koʼalia ho sira kona-ba neʼe.”

KOKO ATU HALO IDA-NEʼE: Koʼalia dala barak maski badak deʼit, duké koʼalia dala ida deʼit no esplika buat hotu neʼebé Ita hanoin oan presiza hatene. (Deuteronômio [Ulangan] 6:6-9) Hodi halo nuneʼe sei ajuda oan atu simu no komprende buat neʼebé Ita koʼalia. Nuʼudar sira sai boot, Ita bele fó informasaun liután tuir sira-nia tinan.

Ba joven sira: Iha tempu joven, importante tebes ba Ita-nia oan atu hatene loloos kona-ba relasaun seksuál katak sá, no oinsá ida-neʼe envolve ema nia sentimentu, no morál. Ana, ho tinan 15, neʼebé temi tiha ona iha leten, hatete: “Iha haʼu-nia eskola, joven sira neʼebé tinan hanesan haʼu iha toman ona atu halo relasaun seksuál ho livre. Haʼu hanoin katak nuʼudar ema kristaun, haʼu presiza hatene kona-ba neʼe [atu la monu ba sala neʼe]. Maski sente moe atu koʼalia kona-ba neʼe, maibé haʼu presiza duni atu komprende.” *

Kuidadu: Joven sira karik dada an atu husu pergunta kona-ba seks tanba sira taʼuk inan-aman sei hanoin katak sira halo hahalok neʼebé la loos. Ida-neʼe mak akontese ba aman ida, naran Steven, nia hatete: “Ami-nia oan-mane lakohi duni atu koʼalia kona-ba  seks. Maibé ikusmai ami hatene katak nia sente ami deskonfia nia. Ami esplika didiʼak ba nia katak ami la koʼalia kona-ba neʼe tanba ami deskonfia nia; ami hakarak deʼit atu hatene didiʼak se nia hatene ona hodi nia bele tahan hasoru hahalok aat neʼebé akontese haleʼu nia.”

KOKO ATU HALO IDA-NEʼE: Duké husu kedas pergunta kona-ba buat seksuál nian ba Ita-nia oan joven, diʼak atu husu nia oinsá nia kolega sira-nia hanoin kona-ba seks. Porezemplu, Ita bele hatete: “Ohin loron ema barak hanoin katak book ema seluk nia oin-lulik, neʼe la dehan katak sira halo seks. Ó-nia kolega sira iha eskola mós hanoin hanesan neʼe ka lae?” Hodi husu sira pergunta hanesan neʼe, ida-neʼe sei ajuda oan joven sente diʼak atu koʼalia nakloke no hatoʼo sira-nia hanoin kona-ba neʼe.

Sente moe sei sai menus

Sin, nuʼudar inan-aman karik Ita sente katak knaar atu koʼalia ba Ita-nia oan kona-ba buat seksuál nian mak buat ida neʼebé susar tebes no halo Ita sente moe. Maibé Ita-nia hakaʼas-an sei la saugati. Inan ida naran Diane hatete: “Neineik-neineik sentimentu moe sai menus se Ita sai toman atu koʼalia, no tuir loloos koʼalia ba Ita-nia oan kona-ba buat seksuál nian bele sai nuʼudar oportunidade ida atu hametin Ita-nia relasaun ho Ita-nia oan.” Steven, neʼebé temi iha leten mós sente hanesan neʼe, no nia dehan: “Se Ita haburas toman atu koʼalia nakloke kona-ba buat naran deʼit iha família laran, Ita ladún sente moe no sai fasil liu atu koʼalia kona-ba buat seksuál nian.” Nia hatutan tan: “Karik sentimentu moe sei la lakon, maibé nuʼudar família kristaun, koʼalia nakloke mak xave neʼebé importante atu iha moris família nian neʼebé kontente.”

[Nota–rodapé]

[Kaixa pájina 14]

OINSÁ ITA BELE HATÁN?

Lee liafuan husi joven sira iha rai oioin, no koko atu hatán ba pergunta sira-neʼe.

• “Haʼu-nia inan-aman haruka haʼu atu lee informasaun kona-ba seks no hatete se haʼu iha pergunta haʼu bele husu sira. Maibé, tuir loloos haʼu hakarak sira mak esplika mai haʼu kona-ba neʼe.”—Ana, Brazíl.

Tuir Ita-nia hanoin, tansá mak importante atu koʼalia ba Ita-nia oan duké fó deʼit livru neʼebé hanorin sira kona-ba seks?

• “Haʼu rona buat barak kona-ba hahalok seksuál oioin neʼebé sala, no haʼu hanoin haʼu-nia aman la hatene buat ida kona-ba neʼe. Se haʼu husu buat ruma kona-ba hahalok seksuál hanesan neʼe, karik nia sei hakfodak.”—Ken, Kanadá.

Tansá mak Ita-nia oan karik sente taʼuk atu koʼalia ba Ita kona-ba buat neʼebé nia hanoin?

• “Ikusmai haʼu sai brani atu husu haʼu-nia inan-aman kona-ba seks, maibé sira hatete: ‘Tansá ó husu kona-ba neʼe? Ó halo buat ruma karik?’ Ida-neʼe halo haʼu sente katak sira diskonfia haʼu.”—Masami, Japaun.

Kuandu Ita-nia oan husu pergunta kona-ba seks, tansá mak Ita-nia resposta bele loke ka taka dalan atu koʼalia tan kona-ba neʼe iha tempu seluk?

• “Diʼak tebes se haʼu-nia inan-aman bele fó fiar mai haʼu katak kuandu sira tinan hanesan haʼu, sira mós husu pergunta neʼebé hanesan no la sala atu haʼu husu pergunta sira-neʼe.”—Lissette, Fransa.

Oinsá mak Ita bele ajuda Ita-nia oan atu sente kmaan, hodi nia la moe atu koʼalia ba Ita kona-ba seks?

• “Haʼu-nia inan husu mai haʼu pergunta kona-ba seks, maibé nia koʼalia ho lian neʼebé kalma. Haʼu sente katak ida-neʼe importante, atu oan la sente katak inan ka aman tesi lia ba nia.”—Gerald, Fransa.

Kuandu koʼalia ba oan kona-ba seks, Ita-nia lian oinsá? Ita presiza atu hadiʼa dalan neʼebé Ita koʼalia ka lae?

[Dezeñu iha pájina 14]