Akaa A Van A Msaanyol Hen Tsombor

Lamen a Ônov Ou sha Kwagh u Yaven a Or

Wanyekwase ugen u lun anyom pue-kar, u i yer un ér Alicia * yô kaa ér: “Ashighe agen ka i gba saren mo u fan ma kwagh sha kwagh u yaven a or tsô, kpa m cia u pinen mbamaren av mer me pine yô, vea hen ér mo m saa ishe.”

Inez, ngô u Alicia kaa ér: “A doom u teman lamen vea wan wam u kwase sha kwagh u yavaor, kpa hanma shighe yô ngu a lu a kwagh u eren. Lun a shighe u se tema se lam sha won ga.”

NYIAN ne ufoto mba ijimbagh dumbur—mba tesen ve sha televishen man ken ufiim kua sha ikpande i yôôn kasua kpaa. Ka inja er hegen yô, ka mbamaren man mbayev vev tseegh ve soon u lamen imôngo sha kwagh u yavaor ga nahan. Wan ugen u ken tar u Kanada, u lun anyom pue-kar, u i yer un ér Michael yô kaa ér: “M tôm mer mbamaren ma ve fe er ka i cieryol kpishi shi i lu kwagh u kunya kpaa u lamen a ve sha kwagh u yaven a kwase shin nomsoor yô. Ka i hemba lun zange u lamen a ma ijende yase sha itinekwagh ne.”

Mbamaren kpa, ashighe kpishi ka i taver ve u lamen a mbayev vev sha itinekwagh ne. Kwase ugen u a tesen ior kwagh u mkpeyol yô, mba yer un ér Debra W. Haffner, yange nger ken takerada na u i yer ér Beyond the Big Talk la ér: “Mbamaren kpishi kaa a mo ér, ve yam wan ve takerada u ú er kwagh u yaven a kwase shin nomsoor, shin kwagh u vian or shin hian kwase yô, ve ver u ken ruum-iyou u wan ve, kpa ve kera lam sha kwagh shon ma shighe môm ga.” Haffner kaa ér, mbamaren ka vea er nahan yô, ieren ve la i tese ér mba kaan a mbayev vev ér: “Se soo ser fa alegh a iyolough a ou man kwagh u yaven a kwase shin nomsoor; kpa se soo u lamen a we sha kwagh ne keng ga.”

Aluer u ngu ormaren yô, doo u mnenge wou una lu kposo sha kwagh ne. Sha kpôô yô, u̱ lamen a ônov ou sha kwagh u yavaor ka kwagh u injaa kpen kpen. Nenge atôakaa atar a i doo u ú eren nahan yô:

1. Kwagh u yaven a kwase shin nomsoor la gema hegen. Gumor ugen u lun anyom 20, u i yer un ér James yô kaa ér: “Taver hegen kpishi u pasen or inja i u yaven a kwase—ka a ôron kwagh ne yô mba kera ôron kwagh u nom yaven a kwase u nan tseegh ga. Hegen ne ka i yav a kwase sha zwa man shin ityô kpaa, shi ijimba ngi sha Intanet kpaa—sha hanseeti je kpa i gema tindin ior a ufoto man ilyoho i ijimbagh.”

2. Alaghga a tsugh ônov ou shighe u ve lu iyev la je. Ngô ugen, u i yer un ér Sheila yô kaa ér: “Ka vea hiin a hii makeranta nahan, i gba ôron akaa a ijimbagh sha ato a ve, maa ve hingir u lun a mnenge u ú soo wer ve lu a mi ga la.”

3. Ônov ou mba a mbampin mba vea soo u pinen we sha kwagh u yavaor yô, kpa alaghga vea hii iliam a we sha itinekwagh ne ga. Wankwase ugen ken tar u Brazil, u lun anyom 15, u i yer un ér Ana yô,  kaa ér: “Sha mimi yô, m fa er me hii iliam a mbamaren av sha kwagh u yaven a kwase shin nomsoor ga.”

Sha kpôô yô, er u lu ormaren yô, u lamen a ônov ou sha kwagh u yavaor la ka môm ken ityom i Aôndo a we u yô. (Mbaefese 6:4) Sha mimi yô, alaghga a taver we kua ônov ou u lamen sha kwagh ne. Nahan kpa, kwagh u dedoo u a gem a lu sha kwagh ne yô, agumaior kpishi lumun a kwagh u Danielle, wankwase u lun anyom 14 a er ne, a kaa ér: “Se soo u fan kwagh u yaven a or sha ikyev i mbamaren asev, ka hen ma tica shin ma kwagh u i tesen sha televishen ga.” Nahan yô, u lam a ônov ou sha itinekwagh i hange hange, i ka i taver u lamen sha mi yum ne nena? *

Pase Ve Akaa a a Kom sha Anyom a Ve Yô

Saa di aluer mbayev mba ve tseegh, or môm biishi a ve ga di je, gayô ka ve hii u ungwan akaa a ijimbagh er ve lu cuku la je. Kwagh ugen u a hembe zan iyol sha kwagh ne je yô, ka kwagh u udangmbaiorov ve lu hemban “vihin a vihi kwagh” ken “ayange a masejime” ne la. (2 Timoteu 3:1, 13) Kwagh er vihi yô, mbayev kpishi mbaganden kighir ve yav a ve sha apera.

Nahan yô, doo u ú hii u tesen ônov ou er ve lu iyev la je. Ngô ugen ken tar u Jamani, u i yer un ér Renate yô, kaa ér: “Aluer ú de zan zan ônov ou hemba anyom pue yô, alaghga vea kera soo u lamen sha kwagh ne gbar gbar ga, sha ci u mciem shin kunya u wanye ka nana hii u hian ve nan gema lun a mi la.” Kwagh u vesen u una wase u yô, ka u ôron ve akaa a a kom sha anyom a ve vough yô.

Mba ve lu a hii makeranta ga la: Kwagh a̱ hemba gban we u pasen ve ati a alegh a yaven a or la, shi pase ve wer or môm tsô nana de benden alegh ve ne ave ga. Ngô ugen ken tar u Mexico, u i yer un ér Julia yô kaa ér: “Yange m hii u tesen wan wam u nomso shighe u lu anyom atar la. Er m fa mer atica shin oryese shin mbayev mbagenev mba ve lu tamen a na vea fatyô u bulan un yô, ishima zam iyol kpishi. Nahan gba u una fa u kuran iyol na sha ikyev i ior mba a fe ve yum ga la.”

KAR KWAGH NE: Tese wan wou wer shighe u or nan soo u zan nan uwegh hen ikyum yô, nana venda a nan wanger wanger. U tesen ikyav yô, u fatyô kaan a wan wou wer nana kaa ér: “Dem! M ngu yilan we ijir keng keng!” Pase wan wou wer doo u nana yila or la ijir kpee, aluer nan tôndo zwa u eren nan iyua shin nan ta nan mciem iyol je kpaa. *

Mbayev mba ken makeranta u peramari: Tese wan wou akaa agen kpaa ken anyom a nan lu ken makeranta u peramari ne sha er u seer mfe u nan kure kure yô. Orya ugen u i yer un ér Peter yô, kaa ér: “Cii man u lam a mbayev ou yô, hii karen ve nenge. Kav kwagh u ve vande fan yô, shi nenge aluer ve soo u seer fan yô. Iliam ne ia za ve zwa ga yô de kighir ve ga. Aluer u ngu lun vea ônov ou hanma shighe yô, iliam ne ia gba van iyol i í tsô.”

KAR KWAGH NE: De lamen nen gôgônan sha ikyaa ne ga, hemba doon u lamen tiônôô, kpa i̱ nôngo u lun hanma shighe. (Duteronomi 6:6-9) Aluer u er nahan yô, u kumbur a ve sha u ôron ve akaa kpishi ga. Heela tseegh ga, er ve lu vesen la vea seer zuan a mkaanem ma ma kom sha anyom a ve vough yô.

Sha ci u agumaior: Shighe u wan wou a lu hian or ne ka shighe u i doo u una zua a mfe tsembelee sha kwagh u yaven a or man asaren na a ken ishima a sha kwagh ne kua inja i dedoo kpaa je ne. Ana, wanyekwase u lun anyom 15 u se vande ôron kwagh na la kaa ér: “Mbayevnomso man mbayevkasev mba ken makeranta wam hii u yaven ayol a ve kera kpaa. M hen mer er m lu Orkristu yô, gba u me zua a mfe tsembelee sha kwagh ne. Shin er i lu kwagh u kunya kpishi u lamen sha itinekwagh ne nahan kpa, ka kwagh u i gbe u me fa keng yô.” *

Ver ishima: Alaghga mbayev mba ve lu hian a hia la vea soo u pinen mbamaren vev mbampin ga, sha ci u vea cia ér mbamaren vev vea hen ér mba eren dang. Ka kwagh u ter ugen, u i yer un ér Steven yô, yange va mase kaven je ne. A kaa ér: “Wan wase u nomso yange kera soon u lamen a vese sha kwagh u yavaor ga. Kpa se va mase kaven ser á hen ér inja na wanger se ga. Nahan se pase un wanger wanger ser se  mba lamen a na sha akaa ne sha ci u se hen ser ngu eren dang ga; kpa se soo ser, se wa un a wa ago iyol sha er una fatyô u palegh aeren a dang aa a nengen a mi hanma ijiir la tsô.”

KAR KWAGH NE: Er ma u pin wan wou u nan lu hian or shin nan lu hian kwase la mbampin jighilii sha ma ikyaa i ijimbagh yô, hemba doon u ú pine nan mnenge u mbakov mba nan mba ken makeranta sha kwagh ne. U tesen ikyav yô, u fatyô u pinen nan wer: “Ior kpishi nyian hen ér u yaven a kwase sha zwa la ka idya shin ijimba keng ga. Kape mbakov wou mba ken makeranta kpa ve henen laa?” Aluer u pine wan wou u nan lu hian or la mbampin sha kwagh u nan iyol i nan ga, kpa u pine er i pin sha heen nahan yô, alaghga nana hemba lamen a we gbar gbar shi nana pase u mnenge u nan kpaa.

Er U Hemba Mtaver u A Lu ken Kwagh Ne Yô

Sha kpôô yô, alaghga u lamen a ônov ou sha kwagh u yaven a or shin kwase la á lu kwagh u a hembe taver we ken akaa a i gbe u ú er sha ian you i ormaren la cii yô. Kpa aluer u nôngo yô, iniôngon you la ia saa gbilin ga. Ngô ugen u i yer un ér Diane yô, kaa ér: “Shighe ka una karen yô, mtaver la a bee, nahan iliam i lamen a wan wou sha kwagh u yaven a or la i̱ wase ne ne hemba lun kôôsôô cii.” Steven, u se vande ôron kwagh na la lumun ér ka mimi. A kaa ér: “Aluer hanma shighe ne mba lamen gbar gbar hen tsombor wou, sha hanma itinekwagh je kpaa yô, a kera lu u ican ga u lamen sha atôakaa a taver u lamen sha mi, er kwagh u yaven a or la nahan.” Shi a kaa ér: “Mtaver la been kera gbindigh gbindigh ga, kpa iliam i gbar gbar ka kwagh u hange hange hen tsombor u Mbakristu u ú lu ken mzough yô.”

[Ngeren mba shin kpe]

[Ngeren u kiriki/Foto u sha peeji 14 la]

U NA MLUMUN SHA MBAMPIN MBAN NENA?

Ôr kwagh u i nger shin heen, u agumaior kposo kposo sha tar á ôr ne, nahan hen er u na mlumun sha mbampin mba dondon mbara yô.

• “Mbamaren av ka ve kaa a mo ér m ôr ngeren mba ve er kwagh u yaven a or yô, mea ôr yô m va pine ve mbampin aluer kwagh ngum u pinen yô. Kpa luun er vea lamen a mo sha itinekwagh ne hanma shighe nahan ma i hembe doon mo.”—Kwaghôron u Ana, ken tar u Brazil.

Er nan ve u hen wer hemba doon u ú lamen a wan wou sha itinekwagh ne aa u gban di nan un ityakerada tsô wer a̱ za ôr iyol na laa?

• “M fa kwagh u igbenda kposo kposo i ior ve yaven ayol a ve yô, man m na jighjigh mer terem fa igbenda ne cuku ga. Me pine un kwagh sha mi nahan, a cier un iyol kpishi.”—Kwaghôron u Ken, ken tar u Kanada.

Alaghga wan wou nana cia u lamen a we sha akaa a zan nan iyol sha kwagh u ijimba man idya sha ci u nyi?

• “Yange cier mo iyol, kpa m va kende sha ishimataver m pine mbamaren av mpin sha kwagh u yavaor la, kpa ve gema ve ôr kwagh a mo inja er m er kwaghbo nahan; ve pinem ér, ‘Er nan u pin kwagh nahana? Kanyi i ere?’”—Kwaghôron u Masami, ken tar u Japan.

Aluer wan wou pine u mpin sha kwagh u yavaor yô, kwagh u ú ôr a nan la una bugh gbenda u kper ken hemen kpa nana soo u lamen a we sha kwagh ne shin una cir gbenda nena?

• “Aluer mbamaren av kaa a mo ér shighe u ve lu er mo nahan la, ve kpa ve pinen mbampin amba ne, nahan kwaghbo ngu sha akaa a m pinen ve la ga yô, ishima ia hemba taver mo u pinen ve kwagh.”—Kwaghôron u Lisette, ken tar u France.

U er nan ve ishima ia hemba taver wan wou u lamen a we sha kwagh u yaven a or shin kwasa?

• “Ngôm ngu a pinem mbampin sha kwagh u yavaor, kpa ngu a pinem sha ikyenge i kundu kundu. M hen mer u eren nahan la ka kwagh u dedoo sha er wanye nana hen ér mba nan nan ibo ga yô.”—Kwaghôron u Gerald, ken tar u France.

Ka wea lamen a wan wou sha kwagh u yavaor nahan, ka sha ikyenge i nyi nahan ka u lam a nanaa? U nenge wer doo u ú nyôôso ikyenge i u lamen a nan laa?