Ivyo Vingapangiska Mbumba Kuŵa Yacimwemwe

Dumbiskanani na Ŵana Ŵinu Nkhani za Kugonana

Alicia, * uyo ni muwukirano wakuti: “Nyengo zinyake nkhuŵa na mafumbo ghakukhwaskana na nkhani za kugonana, kweni nkhuwona kuti para ningafumba ŵapapi ŵane mbwenu ŵaghanaghanenge kuti nkhucita vinthu viheni.”

Inez, anyina ŵa Alicia ŵakuti: “Nkhukhumba nga ningadumbiskana na mwana wane nkhani za kugonana, kweni kanandi wakuŵa wakutangwanika comene. Nyengo yikusoŵa yakudumbiskana nayo.”

MAZUŴA ghano, vithuzithuzi vya nkhani za kugonana vili palipose, pa TV, mu mafilimu ndiposo mu vinthu vyakupharazgira malonda. Vikuwoneka kuti mu mbumba mwekha ndimo ŵanthu ŵakucita soni kudumbiskana nkhani za kugonana. Muwukirano munyake wa ku Canada, zina lake Michael wakuti: “Ningatemwa kuti ŵapapi ŵamanye kuti taŵawukirano cikutiŵira cinonono ndiposo cakukhozga soni kudumbiskana nawo nkhani za kugonana. Cikuŵa cipusu kudumbiskana nkhani izi na mubwezi wako.”

Mwakuyana na ŵana, ŵapapi nawo kanandi ŵakucita soni kwambiska cidumbirano ca nkhani izi. Mu buku lake lakuti Beyond the Big Talk, Debra W. Haffner, uyo wakasambizganga vya umoyo, wakalemba kuti: “Ŵapapi ŵanandi ŵaniphalirapo kuti ŵali kugulirapo mwana wawo buku lakuyowoya za kugonana panji umo thupi likusinthira, na kuliŵika waka ku cipinda ca muwukirano kwambura kudumbiskana nayo.” Haffner wakuti kucita nthena vikuyana waka na kuphalira ŵana kuti: “Tikukhumba kuti mumanyenge za thupi linu ndiposo za kugonana, kweni tikukhumba yayi kudumbiskana namwe nkhani izi.”

Usange ndimwe mupapi, cingaŵa ciwemi kuleka kuyiwona nthena nkhani iyi. Nchakuzirwa comene kudumbiskana na ŵana ŵinu nkhani za kugonana. Wonani vifukwa vitatu.

1. Ŵanthu ŵasintha umo ŵakuwonera kugonana. James, uyo wali na vilimika 20 wakuti: “Ŵanthu ŵaleka kughanaghana kuti kugonana nkhwa pakati pa mfumu na muwoli pera. Pasono pali kugonana kwa mu mulomo, ku matako, kwa pa Intanet, kweniso kwa pa foni.”

2. Ŵana ŵinu ŵaphalirikenge vinthu vyautesi. Mama munyake, zina lake Sheila wakuti: “Para ŵamba waka sukulu ŵamwamba kupulika za kugonana, ndipo ŵamwamba kuwona kugonana nga umo imwe mukukhumbira kuti ŵawonerenge yayi.”

3. Ŵana ŵinu ŵali na mafumbo ghakukhwaskana na kugonana, kweni nchakuwonekerathu kuti ŵakucita soni kumufumbani. Muwukirano munyake wa vilimika 15, wa ku Brazil, zina lake Ana, wakuti: “Kuyowoya unenesko, nkhumanya yayi umo ningambira kudumbiskana na ŵapapi ŵane nkhani za kugonana.”

Kudumbiskana na ŵana ŵinu nkhani za kugonana  ngumoza mwa milimo iyo Ciuta wali kumupani pakuŵa mupapi. (Ŵaefeso 6:4) Mbunenesko kuti mose, imwe na ŵana ŵinu, mungacita soni kudumbiskana nkhani izi. Kweni cakukondweska nchakuti ŵawukirano ŵanandi ŵakukolerana na Danielle, wa vilimika 14, uyo wakuti: “Tikukhumba kuti tisambirenge nkhani za kugonana kufuma ku ŵapapi ŵithu, ku ŵasambizgi panji pa TV yayi.” Ipo pera, mungacita wuli kuti mudumbiskanenge na ŵana ŵinu za nkhani yakuzirwa iyi nangauli njakusuzga? *

Mwakuyana na Msinkhu Wawo

Ŵana ŵakwamba kupulika nkhani za kugonana ŵacali ŵanici. Ŵangaleka kupulika pekha para ŵakukhala na ŵanthu yayi. Kweniso, cakudandawuliska comene nchakuti mu “mazuŵa ghaumaliro” ghano, ŵanthu ŵaheni ‘ŵalutilira kuhenipa.’ (2 Timote 3:1, 13) Cacitima nchakuti ŵana ŵanandi ŵakugoneka na ŵalara.

Ipo nchakuzirwa comene kuti mwambe kusambizga ŵana ŵinu ŵacali ŵanici. Mama munyake, zina lake Renate, uyo wakukhala ku Germany wakuti: “Para mukulindilira kuti muzamusambizga ŵana ŵinu para ŵafika pa unyamata panji umwali, panji ŵangazakatemwa yayi kudumbiskana namwe cifukwa pa nyengo iyi ŵakwamba kuŵa na soni.” Cakuzirwa nchakuti ŵapapi ŵasambizge ŵana ŵawo mwakuyana na msinkhu wawo.

Ŵana awo ŵandambe sukulu: Ŵasambizgani mazina ghakwenelera gha viŵaro vyakubisika, ndipo didimizganipo comene kuti munthu wangavikoranga yayi. Mama munyake, zina lake Julia, uyo wakukhala ku Mexico wakuti: “Nkhamba kusambizga mwana wane apo wakaŵa na vilimika vitatu. Nkhamba kumusambizga cifukwa ca kufipa mtima kuti ŵasambizgi, ŵanchito, panji ŵana ŵanyake awo mbalalarako kwa iyo ŵangacita nayo viheni. Wakeneranga kumanya umo wangajivikililira.”

YEZGANI KUCITA ICI: Sambizgani mwana winu kuti wakanenge comene para munthu munyake wakukhumba kuseŵereska viŵaro vyake vyakubisika. Mwaciyelezgero, mungamusambizga kuti para munthu wakukhumba kuseŵeleska viŵaro vyake wayowoyenge kuti: “Leka! Namukuphara!” Musimikizgirani kuti nyengo zose nchakwenelera kuphara nanga munthu wangamofya panji kumuphalira kuti wamupenge cinthu cinyake. *

Ŵana awo ŵakusambira ku pulayimare: Pa nyengo iyi ŵasambizgani vinthu vinyake vyakukhwaskana na kugonana kusazga pa ivyo mukaŵasambizgapo kale. Dada munyake zina lake Peter wakuti: “Pambere mundadumbiskane nawo, wonani dankha ivyo ŵakumanya kale pa nkhani iyi ndiposo usange ŵangakhumbikwira kuŵasambizgaso vinyake. Kuŵacicizga kudumbiskana nawo yayi. Para mukusanga nyengo yakucezgera nawo, ciŵenge cambura kusuzga kudumbiskana nawo.”

YEZGANI KUCITA ICI: Yezgani kudumbiskana nawo vicoko waka nyengo na nyengo, m’malo mwa kuŵasambizga vinandi nyengo yimoza. (Duteronome 6:6-9) Para mungacita nthena, muŵazotofyenge yayi. Apo ŵakukura, ŵakurenge uku ŵakumanya kale vinthu vyakukhumbikwa.

Ŵawukirano ŵalarako: Pa nyengo iyi nchakwenelera kuti ŵana ŵinu ŵamanyenge mwakukwana vinthu vyakukhwaskana na kugonana. Ŵamanye umo thupi lawo lisinthirenge, maghanoghano agho ŵangamba kuŵa nagho, ndiposo nkharo iyo ŵakwenera kugega pa nkhani ya kugonana. Ana, msungwana wa vilimika 15 uyo wazunulika kale wakuti: “Ŵasungwana na ŵanyamata ku sukulu kwithu ŵali kwamba kale kugonana. Ine pakuŵa Mkhristu, nkhuwona kuti nchakwenelera kuti nimanye mwakukwana nkhani ya kugonana. Nangauli nchakukhozga soni kudumbiskana za kugonana, kweni nchakwenelera nipera kuti nimanye vinandi pa nkhani iyi.” *

Cenjezgo: Nyengo zinyake ŵawukirano ŵangatondeka kufumba mafumbo cifukwa ca kopa kuti ŵapapi ŵawo ŵaghanaghanenge kuti ŵakucita viheni. Ndivyo dada munyake, zina lake Steven wakasanga. Iyo wakuti: “Mwana withu munyamata wakacitanga soni  kudumbiskana nase nkhani za kugonana. Pamasinda tikawona kuti cikaŵa cifukwa cakuti wakaghanaghananga kuti tikakayikiranga nkharo yake. Tikamuphalira makora comene kuti tikadumbiskananga nayo nkhani izi cifukwa ca kumukayikira yayi, kweni cifukwa cakuti tikakhumbanga wamanyenge umo wangajivikililira ku mikhaliro yiheni.”

YEZGANI KUCITA ICI: M’malo mwa kumufumba mwakudunjika nkhani za kugonana, mufumbani umo ŵanyake ku sukulu ŵakuwonera nkhani iyi. Panji mungamufumba kuti: “Ŵanandi mazuŵa ghano ŵakuwona kuti kugonana mu mulomo nkhugonana kwanadi yayi. Kasi ndimo ŵanyako ku sukulu nawo ŵakuwonera?” Muwukirano wangaŵa wakufwatuka comene usange mungamufumba mafumbo ghanthena, ndipo wangafwatuka kuyowoya maghanoghano ghake.

Kumazga Soni

Mbunenesko kuti kudumbiskana na mwana winu nkhani za kugonana ungaŵa umoza mwa milimo yakusuzga comene pa nkhani ya kulera ŵana. Kweni kucita nthena nkhwakuzirwa comene. Mama munyake, zina lake Diane wakuti: “Para pajumpha nyengo, soni zikucepako, ndipo kudumbiskana nkhani izi kukukhozga ubwezi winu na ŵana ŵinu.” Steven, uyo wazunulika kale mu nkhani iyi nayo wakuzomerezga, wakuti: “Para mukufwatuka kudumbiskana nkhani yiliyose mu mbumba, cikuŵa cipusu kudumbiskana nkhani yakusuzga nga nja kugonana.” Iyo wakutiso: “Soni zikumalirathu yayi, kweni kudumbiskana mwakufwatuka nkhwakuzirwa comene mu mbumba Yacikhristu.”

[Mazgu ghamusi]

[Bokosi/Cithuzithuzi pa peji 32]

JIFUMBANI KUTI . . .

Ŵazgani mazgu ghakulondezgapo agha, agho ŵawukirano ŵa mu vyaru vyakupambanapambana ŵayowoya, ndipo jifumbani mafumbo ghakulondezgapo.

• “Ŵapapi ŵane ŵakuniphalira kuti niŵazge nkhani zakukhwaskana na kugonana, ndipo usange nili na fumbo niŵafumbe. Kweni nkhuwona kuti cingaŵa ciwemi ŵadumbiskanenge waka nane.”—Ana, Brazil.

Mukughanaghana kuti cifukwa wuli nchakuzirwa kudumbiskana na mwana winu nkhani za kugonana kuluska kumupa waka mabuku kuti waŵazge yekha?

• “Nkhumanya tumaluso tunandi comene twambura kwenelera twakukhwaskana na kugonana uto nkhughanaghana kuti adada ŵakutumanya yayi. Ŵangachizuka comene para ningaŵafumba za tumaluso utu.”—Ken, Canada.

Kasi mwana winu wangaleka kumufumbani mafumbo ghanyake cifukwa ca kopa vici?

• “Apo nkhacita cikanga kufumba ŵapapi ŵane fumbo lakukhwaskana na kugonana, pakuzgora ŵakaŵa nga ŵakunikalipira, ŵakanifumba kuti, ‘Wafumbiraci? Pali cinyake ico cacitika?’”—Masami, Japan.

Para mwana winu wamufumbani fumbo lakukhwaskana na kugonana, kasi kacitiro kinu kangapangiska wuli kuti wazakamufumbaniso kunthazi panji yayi?

• “Cingaŵa cakovwira usange ŵapapi ŵane ŵanganisimikizgira kuti apo ŵakaŵa pa msinkhu wane nawo ŵakafumbanga mafumbo ghakuyana waka na ghane ndiposo kuti nchacilendo yayi kufumba mafumbo agho nkhufumba.”—Lisette, France.

Kasi mungacita wuli kuti mwana winu waleke kukakika kudumbiskana namwe nkhani za kugonana?

• “Amama ŵakunifumba mafumbo ghakukhwaskana na kugonana, kweni ŵakunifumba mu nthowa yiwemi. Nkhuwona kuti kucita nthena nkhuwemi comene cifukwa mwana wakuwona kuti ŵakumweruzga yayi.”—Gerald, France.

Kasi mazgu ghinu ghakupulikikwa wuli para mukudumbiskana na mwana winu nkhani za kugonana? Kasi mungakhumbikwira kusintha?