I TEIE mahana, tei te mau vahi atoa te mau hohoˈa e haamaramaramaraa no nia i te taatiraa pae tino, i roto i te afata teata, hohoˈa teata e te mau parau tiani. E ere râ i te mea ohie no te mau metua e te mau tamarii ia tauaparau no nia i te reira. Te na ô ra Michael, te hoê taurearea no Kanada: “Te hinaaro nei au ia ite to ˈu na metua e mea fifi e te haama no ˈu ia aparau e o ratou no nia i te taatiraa pae tino. E mea ohie râ ia aparau i te hoê hoa.”

E pinepine e taiâ atoa te mau metua i te haamata i te aparau no nia i te taatiraa pae tino i ta ratou tamarii. Te parau ra Debra Haffner, orometua i te pae haapiiraa aupuruora, i roto i ta ˈna buka (Beyond the Big Talk): “E rave rahi metua o tei parau mai e ua hoo ratou i te hoê buka no nia i te taatiraa pae tino e te taurearearaa no ta ratou tamarii, e ua vaiiho atu i roto i to ˈna piha ma te ore roa e paraparau faahou atu.” Te na ô ra Haffner e tera ïa ta te tamarii e taa: “Te hinaaro nei mâua ia ite oe no nia i to oe tino e te taatiraa pae tino; aita râ mâua e hinaaro nei e tauaparau atu.”

Ei metua, eiaha e na reira. Mea faufaa roa ia aparau oe i ta oe mau tamarii no nia i te taatiraa pae tino. Teie e toru tumu:

1. Ua taui te manaˈo no nia i te taatiraa pae tino. Te parau ra James 20 matahiti: “Aita te taata e manaˈo faahou ra i te taatiraa te hoê tane faaipoipo i ta ˈna vahine. I teie nei, te vai ra te ai mero taatiraa, te taatiraa na te tiho, te mau poroi e te mau hohoˈa taatiraa atoa maoti te roro uira, te niuniu afaifai e te tahi atu mau ravea.”

2. E faaroo iho â te tamarii i te mau parau tano ore i to ratou nainairaa. Te na ô ra Sheila te hoê mama: “E faaroo ratou i te parau o te taatiraa pae tino i te fare haapiiraa, eiaha râ mai ta outou e hinaaro ra.”

3.   E uiraa ta te tamarii no nia i te taatiraa pae tino e taiâ râ ratou i te aparau atu. Te na ô ra Ana 15 matahiti no Beresilia: “Aita roa ˈtu vau i ite e nafea ia haamata i te aparau i to ˈu na metua no nia i te taatiraa pae tino.”

Ei metua, e hopoia no ǒ mai i te Atua ra ia paraparau oe no nia i te taatiraa pae tino i ta oe mau tamarii. (Ephesia 6:4) E ere iho â i te mea ohie no oe e no ratou atoa. Te vahi maitai râ, e rave rahi taurearea e farii nei i te parau a Danielle 14 matahiti e na ô ra: “Te hinaaro nei matou e na to matou metua e haapii mai no nia i te taatiraa pae tino eiaha râ na te tahi orometua haapii aore ra porotarama afata teata.” E nafea ïa oe e nehenehe ai e aparau i ta oe mau tamarii no nia i tera mea fifi, faufaa râ? b

Te ora nei hoi te tamarii i te vahi taata ma te faaroo iho â i te parau o te taatiraa pae tino mai to ratou nainairaa. Ma te peapea, i teie “anotau hopea” e ‘rahi atu â te ino’ o te mau taata iino. (Timoteo 2, 3:1, 13) Hau atu â, e rave rahi tamarii tei hamani-ino-hia e te mau taata paari no te mau opuaraa faufau.

E mea faufaa roa ia haapii oe i ta oe mau tamarii mai to ratou nainairaa mai. Te na ô ra Renate te hoê mama no Heremani: “Ia tiai oe ia taurearea mai ratou, eita paha ratou e paraparau no to ratou mamahu.” Ia haamaramarama ïa te metua i ta ratou mau tamarii ia au i to ratou matahiti.

Tei te fare haapiiraa tamahou:

A haapii atu i te mau iˈoa tano o te mau mero taatiraa. A faaara eiaha roa te hoê taata ia hauti i te reira. Te na ô ra Julia te hoê mama no Mehiko: “Ua haamata vau i te haapii i ta ˈu tamaiti i te toruraa o to ˈna matahiti. Ua peapea roa vau i te manaˈoraa e e nehenehe te mau orometua haapii, haapao tamarii, aore ra tamarii paari e hamani ino ia ˈna. Ia ite ïa oia e nafea ia paruru ia ˈna.”

Tei te fare haapiiraa tuatahi:

A haafaufaa i teie mau matahiti no te haapii maite atu â i ta oe tamarii. Te faaitoito ra Peter te hoê papa: “A fafa i to te tamarii manaˈo hou e paraparau ai. A feruri i ta ratou i ite aˈena e ta ratou e hinaaro ra e ite atu â. Eiaha e faahepo. E paraparau mai iho â ratou mai te peu e e horoa tamau oe i te taime.”

No te mau taurearea:

Teie te taime no te haapapu e mea navai anei to ˈna ite no nia i te mau tuhaa rau, to te tino, to te aau e to te pae morare o te taatiraa. Te parau ra Ana tei faahitihia na: “I ta ˈu fare haapiiraa, ua matau te tamaroa i te taoto i te tamahine hoê noa taime e taui atu ai i te apiti. Te manaˈo nei au ei Kerisetiano, ia maramarama maitai au no nia i teie tumu parau. Mea huru haama ia tauaparau no nia i te taatiraa pae tino, ia ite râ vau i te reira.” d

Faaararaa: Eita paha te mau taurearea e  uiui mai no to ratou taiâ ia manaˈo ino to ratou mau metua ia ratou. Tera ta Steven te hoê papa i ite. Te na ô ra oia: “Ua taiâ ta mâua tamaiti i te paraparau no nia i te taatiraa pae tino. I muri iho to mâua iteraa i to ˈna manaˈo, oia hoi te feaa ra mâua i to ˈna haerea. Ua haapapu râ mâua e aita roa ˈtu, te hinaaro noa nei mâua e ite e ua ineine oia i te patoi i te mau faahemaraa.”

Mea haama no te mau metua ia paraparau i ta ratou mau tamarii no nia i te taatiraa pae tino. E hoona râ ta ratou tutavaraa. Te na ô ra Diane te hoê mama: “I te roaraa o te taime, e pee rii tera haama e ia tauaparau oe i ta oe tamarii no nia i te taatiraa pae tino e piri atu â ˈi to orua taairaa.” Tera atoa te manaˈo o Steven, tei faahitihia na. Te na ô ra oia: “Ia matau te utuafare i te paraparau no nia i te mau mea atoa, e ohie ïa no te taatiraa pae tino. Eita te haama e moe roa, mea faufaa râ ia aparau noa te utuafare Kerisetiano no to ratou maitai.”