Ceci Ci Kuatisa Apata Oku Kala Lesanju

Sapela Lomãla Vove Catiamẽla Koku Lipekela

Umãlehe umue ufeko londuko Alicia a wa popia hati: “Olonjanja vimue, nda siata oku kuata onjongole yoku kũlĩha ovina viatiamẽla koku lipekela. Pole, noke ndi sima okuti, nda nda pula olonjali viange, vi pondola oku sima okuti, nda linga cimue cĩvi.”

Ina ya Alicia londuko Inez, wa popia hati: “Nda siata oku kuata onjongole yoku sapela omõlange ukãi catiamẽla koku lipekela, pole, eye wa sakalala loku linga ovina viaye muẽle. Ka ca lelukile oku sokiya otembo yoku sapela laye, vepuluvi lina okuti ka kasi oku linga cimue.”

KOLONEKE VILO, ovina viatiamẽla koku lipekela via li sanduila kolonepa viosi violuali, kuenda via siata oku lekisiwa vo Televisão. Pole, olonjali ovio lika vi kuete osõi yoku sapela lomãla vavo catiamẽla koku lipekela. Ukuenje umue kofeka yo Kanada o tukuiwa hati, Michael, wa poia hati: “Ndi yongola okuti, olonjali vi kũlĩha okuti ci kutisa osõi oku sapela lavo catiamẽla koku lipekela. Ca leluka vali oku sapela lakamba catiamẽla kovina viaco.”

Olonjanja vimue, olonjali via siata oku kuata ohele eci vi yeva omãla vavo va sapela catiamẽla koku lipekela. Ukãi umue o longisa catiamẽla kuhayele londuko Debra W. Haffner, velivulu liaye losapi hati, Beyond the Big Talk (Olonumbi Viatiamẽla Koku Lipekela), wa popia Ndoco: “Olonjali vialua via ndi sapuila hati, via landela omãla vavo elivulu limue li lombolola catiamẽla koku lipekela, ale kapongoloko a pita vetimba osimbu omõla a kasi oku kula. Elivulu liaco va li kapa putala, pole, lalimue eteke va sapela vali catiamẽla kovina viaco.” Noke wa lombolola okuti, esapulo lieciwa komãla lia leluka poku popia hati: “Tu yongola okuti o kũlĩha ciwa etimba liove, kuenda ovina viatiamẽla koku lipekela. Pole, ka tu yongola oku vangula love catiamẽla kovina viaco.”

Nda ove unjali, o sukila oku kuata ovisimĩlo via litepa. Omo liaco, sapela lomãla vove catiamẽla koku lipekela. Tu konomuisi olonepa vitatu viatiamẽla kondaka yaco:

1. Ovisimĩlo viatiamẽla koku lipekela via pongoloka. Ukuenje umue okuete 20 kanyamo londuko James, wa popia hati: “Omanu ka va kapeleko ocisimĩlo cokuti, ulume lukãi waye ovo lika va kuete omoko yoku lipekela. Koloneke vilo, omanu vamue va kuete ocituwa coku kapa ocimatamata cavo cuyali vomẽla, ale ketundisilo liomunu ukuavo oco va tẽlise oloñeyi viavo vioku lipekela. Vakuavo va siata oku enda volonjo vioku tala omanu va lipekela, osimbu okuti, vakuavo va talela ‘ovina viaco’ votelefone.”

2. Omãla vove va ka yeva asapulo ãvi osimbu handi ka va kulile. Onjali yimue yukãi londuko Sheila, ya popia hati: “Omãla va ka yeva ovina viatiamẽla koku lipekela eci va ka fetika oku lilongisa kosikola. Ovo ka va ka tava kovina o yongola oku va sapuila.”

3. Omãla vove va kuete apulilo atiamẽla koku lipekela, pole, va kuete ohele yoku sapela love oviana viaco. Ufeko umue londuko Ana, wo kofeka yo Brasil, o kuete 15 kanyamo, wa popia hati: “Sia kũlĩhĩle  ndomo ndi fetika oku sapela lolonjali viange ovina viatiamẽla koku lipekela.”

Ove unjali o sukila oku sapela lomãla vove ovina viatiamẽla koku lipekela, momo ocikele caco, ca eciwa la Suku. (Va Efeso 6:4) Ocili okuti, oku ci linga, pamue ka ci leluka kokuove, ale komãla vove. Amalẽhe valua, va tava kolondaka via Danielle o kuete 14 kanyamo wa popia hati: “Ovina viatiamẽla koku lipekela, tu yongola okuti, tu vi lilongisa lolonjali vietu. Pole, ka tu yongola oku vi lilongisa lalongisi vo kosikola, ale vovipama vi lekisiwa vo Televisãu.” O pondola ndati oku sapela lomãla vove ovina viatiamẽla koku lipekela, vamue va tenda okuti vi kutisa osõi? b

Kapako Anyamo Vomãla

Omãla vana ka va kasi kovaimbo, va siata oku yeva ovina viatiamẽla koku lipekela osimbu ka va kulile handi. Tu sumua calua poku limbuka okuti, ‘koloneke vilo via sulako,’ omanu vakuavituwa vĩvi ‘va kasi oku amamako oku linga cĩvi.’ (2 Timoteo 3:1, 13) Omo liaco, omãla valua va siata oku yonjiwa lakulu oco va lipekele lavo.

Oku longisa omãla osimbu ka va kulile handi, ci kuete esilivilo. Onjali yimue yukãi kofeka yo Alemanya londuko Renate, wa popia hati: “Nda wa kevelela toke eci omãla vove va kula, va ka kuata osõi yoku sapela love ovina viatiamẽla kapongoloko vetimba liavo.” Omo liaco, olonjali vi sukila oku longisa omãla olonumbi vi likuata lanyamo avo.

Ceci omãla ka va fetikile oku lilongisa kosikola: Longisa omãla vove olonduko viovimatamata viuyali, kuenda va sapuila okuti, lomue ka ka kuate kovimatamata viaco. Onjali yimue yukãi kofeka yo Mesiku londuko Julia, wa popia hati: “Nda fetika oku longisa omõlange, eci a kuata lika anyamo atatu. Nda sumua calua poku limbuka okuti, alongisi vo kosikola, kuenda vakuakulela omãla, ale amalehe vana va kula, va pondola oku linga cĩvi komõlange utito. Eye o sukila oku kũlĩha ndomo a pondola oku li teyuila komanu vana ka kũlĩhĩle.”

SETEKA NDOCO: Pindisa omõla oco a tẽle oku li teyuila nda umue o seteka oku kuata kovimatamata viaye viuyali. O pondola oku longisa omõla wove oku popia ndoco: “Ku ka ndi kuate! Nda wa ci linga, ndu ku sapula!” Lomboluila komõla wove okuti, nda umue o yongola oku u yonja oco a lipekele laye, o sukila oku u sapula, ndaño omunu waco o yongola oku eca kokuaye ombanjaile yimue ale oku u lingisa usumba. c

Omãla va fetika ndopo oku lilongisa kosikola. Eci omãla va fetika oku lilongisa kosikola, amamako oku va sapuila ovina viatiamẽla koku lipekela. Isia umue londuko Peter, wa popia hati: “Osimbu kua vanguile lomãla vove, kũlĩhĩsa ovina va kũlĩha, kuenda ovina viokaliye va yongola oku kũlĩha. Ku ka kisike omãla oku vangula ovina viaco. Nda wa sapela lavo olonjanja viosi catiamẽla kondaka yaco, ci va kuatisa oku lianja love.”

SETEKA NDOCO: Yuvula oku longisa omãla ‘vokuenda kuotembo yalua.’ (Esinumuĩlo 6:6-9) Nda wa ci linga, ci ku kuatisa oku yuvula oku va longisa ovina vialua vonjanja yimosi. Osimbu va amamako oku kula, ci va kuatisa oku kuata elomboloko liovina va sukila oku kũlĩha.

Elungulo kamalẽhe: Yilo oyo otembo o sukila oku limbuka nda omõla wove wa kũlĩha ciwa apongoloko etimba liaye, kuenda ovina viatiamẽla koku lipekela. Ufeko wa tukuiwa kefetikilo liocipama cilo londuko Ana, o kuete 15 kanyamo, wa popia hati: “Akuenje lafeko kosikola, va siata oku lipekela, oco va tẽlise oloñeyi viavo vioku lipekela. Omo okuti Ndukristão, ndi sukila oku kuata ukũlĩhĩso wa suapo watiamẽla kondaka yaco. Ndaño okuti ci kutisa osõi oku sapela ovina viatiamẽla koku lipekela, pole, ndi yongola oku vi kũlĩha.” d

Elungulo: Citava okuti, amalẽhe va kuata ohele yoku linga apulilo omo lioku sokolola okuti, pamue olonjali viavo vi sima okuti, va linga cimue ka ca sungulukile. Onjali yimue yulume londuko Steven ya kuata ocisimĩlo caco. Eye wa popia hati: “Omõla wetu o kuete osõi yoku sapela ovina viatiamẽla koku lipekela. Noke tua limbuka okuti, wa kuata ohele yoku sapela ovina viaco, momo wa simĩle okuti, ka tu  kolela vali kokuaye. Noke, tuo sapuila okuti, ndaño ka tua sapelele laye catiamẽla kovina viaco, ka ci lomboloka okuti, tu kuete ohele laye. Pole, tua yonguile lika oku kũlĩha nda o tẽla oku liteyuila oco kaka kembiwe lakamba vãvi.”

SETEKA NDOCO: Omo okuti ove umalẽhe, ku ka ecelele okuti, akamba vove kosikola va ku pulisa cimue catiamẽla koku lipekela. Pole, va pulisa ndomo va tenda ovina viaco. Omo liaco, o pondola oku popia ndoco: “Omanu valua va siata oku sima okuti, oku kapa ocimatamata cuyali vomela womunu ukuavo oco va tẽlise oloñeyi viavo vioku lipekela, ka ci lomboloka ukahonga. Anga hẽ, akamba vove vo kosikola va kuete ovisimĩlo viaco?” Apulilo aco a teta onimbu, a pondola oku ku kuatisa oku yuvula osõi poku sapela. Nda wa ci linga, ci kuatisa akamba vove oku lombolola ovisimĩlo viavo viatiamẽla kondaka yaco.

Ndomo o Yula Osõi

Olonjali vimue via siata oku liyaka locitangi coku sapela lomãla vavo catiamẽla koku lipekela. Pole, vi sukila oku likolisilako. Onjali yimue yukãi londuko Diane, wa popia hati: “Nda olonjanja viosi o sapela lomõla wove catiamẽla kovina vioku lipekela, vokuenda kuotembo ci leluka oku sapela laye ovina viaco, kuenje noke o kuata ukamba laye.” Steven wa tukuiwa vocipama cilo, wa popia hati: “Ci leluka oku sapela ovina viatatama viatiamẽla koku lipekela, nda wa lianja lomãla oku sapela lavo ovina va ku lomboluila.” Eye wa amisako hati: “Ndaño osõi yaco ka yi pui pokati komãla, pole, oku ci linga, ci kuatisa epata oku kuata ocituwa coku sapela, momo ci kuete esilivilo vepata lina okuti Akristão.”

[Atosi pombuelo yamẽla]

[Okakasia Lelitalatu kemẽla 32]

NDOMO O TAMBULULA . . .

Tanga ovina amalẽhe voluali luosi va lombolola, kuenda sokolola ndomo o tambulula apulilo a kuãimo.

• “Olonjali viange via ndi vetiya oku tanga ovipama viatiamẽla koku lipekela, kuenda via ndi sapuila okuti, nda noke nda sanga etosi limue ka lia ndi lombolokele, citava oku va pula. Pole, nda yonguile okuti, ovo va ndi lomboluila ovina vitiamẽla kondaka yaco.”—Ana, ko Brasil.

•Momo lie o simĩla okuti ci kuete esilivilo oku sapela lomãla vove catiamẽla koku lipekela okuti ku va ĩha lika ovipama vioku tanga vi lombolola ulandu waco?

• “Nda kũlĩha ovina vialua ka via sungulukile viatiamẽla koku lipela. Ndi sima okuti, isia yange ka kũlĩhĩle lacimue catiamẽla kovina viaco. Nda ndo pula catiamẽla kondaka yaco, o sumua.”—Ken, ko Kanada.

Momo lie omõla wove a kuetele ohele yoku sapela love catiamẽla kovina a yongola oku kũlĩha?

• “Eci nda seteka oku pulisa olonjali viange catiamẽla kondaka yoku lipekela, etambululo liavo lia lekisa okuti, nda siata oku ci linga. Kuenje, va ndi pula ndoco: ‘Momo lie o yonguila oku kũlĩha ovina viaco? Anga hẽ, wa lipekela lomunu umue?’”—Masami, ko Japãu.

Nda omãla vove va ku pula catiamẽla koku lipekela, anga hẽ, etambululo liove li va kuatisa oku sapela love, ale li va tutuiya oku ci linga?

• “Nda olonjali viange vi ndi sapuila okuti eci via kuata utunga ndowu wange via enda oku lingavo apulilo aco, kuenda ca sunguluka oku sanga atambululo, nda ci ndi kuatisa calua.”—Lisette, ko França.

Nye o sukila oku linga oco omãla vove va lianje oku sapela love catiamẽla koku lipekela?

• “Eci ina yange a enda oku ndi pula ovina nda kũlĩha viatiamẽla koku lipekela, wa enda oku ci linga lonjila yimue ya sunguluka. Ndi sima okuti ocituwa caye ca sunguluka, ci kuatisa omãla oku yuvula oku sima okuti, va kasi oku sombisiwa.”—Gerald, ko França.

O tambulula ndati omõla wove poku sapela laye catiamẽla kondaka yoku lipekela? Anga hẽ, osima okuti o sukila oku linga apongoloko amue?