Te ʼu Puleʼaki Ki He Maʼuli Fakafāmili Fiafia

Kotou Palalau Ki Takotou Fānau ʼo ʼUhiga Mo Te ʼu Felāveʼi Fakasino

ʼE ʼui fēnei e te kiʼi finemui ko Alicia: a “ ʼI ʼihi temi ʼe au fia ʼiloʼi meʼa fuli pē ki te ʼu felāveʼi fakasino, kae ʼe au logoʼi kapau ʼe au kumi age te faʼahi ʼaia ki taku ʼu mātuʼa, pea ʼe nā manatu anai neʼe au fai he aga ʼe kovi.”

ʼE ʼui fēnei e Inez, te faʼē ʼa Alicia: “ ʼE au leleiʼia ke mā heheka muʼa taufāʼē pea ke au palalau age ki taku kiʼi taʼahine ʼo ʼuhiga mo te ʼu felāveʼi fakasino, kae ʼe maʼumaʼua fau ia. Pea kā fia palalau mai leva ia, ʼe faigataʼa te maʼu ʼo he temi ke mā fai palalau ai.”

IĀ ʼAHO nei, kua fakahāhā te ʼu felāveʼi fakasino ʼi te ʼu potu fuli pē: ʼi te televisio, ʼi te ʼu ʼata, pea ʼi te ʼu pāki ʼaē ʼe tuʼu haʼele ʼi te ala. ʼE hagē ia ko te koga meʼa pē ʼaē ʼe tapuʼi ai te faʼahi ʼaia, ʼe ko te temi ʼaē mokā felōgoi ai te ʼu mātuʼa pea mo tanatou fānau. ʼE ʼui fēnei e te tūpulaga ʼi Kanata ko Michael: “ ʼE au loto ke mahino ki taku ʼu mātuʼa ʼe faigataʼa pea mo fakaufiufi hamatou palalau age kiā nātou ʼo ʼuhiga mo te ʼu felāveʼi fakasino. ʼE faigafua age hamatou palalau ki homatou kaumeʼa.”

ʼI te agamāhani, ko te ʼu mātuʼa ohagē pē ko te ʼu fānau ʼe faigataʼa kiā nātou hanatou kamata fai palalau ki te ʼu felāveʼi fakasino. ʼI tana tohi Beyond the Big Talk, ko te fafine faiako ko Debra W. Haffner, ʼe ina ʼui fēnei: “Tokolahi te ʼu mātuʼa ʼe natou ʼui mai kiā au, neʼe natou totogi maʼa tanatou fānau he tohi ʼe talanoa ai ki te ʼu felāveʼi fakasino pea mo tanatou tuputupu fakasino, ʼo natou tuku ʼi ʼonatou koga fale, kae mole natou palalau ʼi he temi mo nātou kiai.” ʼE ʼui e Haffner, koʼenī te faʼahi ʼe mahino kiai te fānau ʼo ʼuhiga mo te manatu ʼo tanatou ʼu mātuʼa: “ ʼE matou loto ke kotou mahino ki te agaaga ʼaē ʼo tokotou sino pea mo te ʼu felāveʼi fakasino; kae ʼe mole matou fia palalau mo koutou ki te faʼahi ʼaia.”

Kapau ko koutou ko he tamai peʼe ko he faʼē, ʼe tonu ke fetogi takotou manatu ʼo ʼuhiga mo te faʼahi ʼaia. ʼE mahino ia, ʼe maʼuhiga ʼaupitō ke kotou palalau fakahagatonu ki takotou fānau ʼo ʼuhiga mo te ʼu felāveʼi fakasino. Tou vakaʼi age muʼa te ʼu tupuʼaga e tolu ʼaē ke kotou palalau ai kiā nātou:

1. Kua fetogi te manatu ʼa te mālamanei ʼo ʼuhiga mo te ʼu felāveʼi fakasino. ʼE ʼui fēnei e James ʼe taʼu 20: “ ʼE mole kei fakaʼuhiga pē e te hahaʼi ia te ʼu felāveʼi fakasino ki he tagata mo he fafine kua ʼohoana. ʼI te temi nei kua fai te ʼu felāveʼi fakasino ʼaki te gutu, mo te muli, mo te ʼu pāki ʼaē ʼe feʼāveʼaki ʼi te ʼu kiʼi telefoni peʼe ʼi te Neti.”

2. ʼE lagi feala ki takotou fānau ke natou maʼu he ʼu manatu hala ʼi tanatou kei veliveli. ʼE ʼui fēnei e te faʼē ʼe higoa ko Sheila: “ ʼE natou logo anai ki te ʼu felāveʼi fakasino ʼi tanatou kamata hū ki te faleako, pea ʼe mole natou maʼu anai te manatu lelei ʼaē ʼe kotou loto ke natou mahino kiai ʼo ʼuhiga mo te faʼahi ʼaia.”

3. ʼE ʼi ai te ʼu fehuʼi ʼo takotou ʼu fānau ki te ʼu felāveʼi fakasino kae lagi mole natou lava palalau atu. ʼE ʼui fēnei e te kiʼi finemui ʼi Pelesile ko Ana ʼe taʼu 15: “ ʼI tona fakahagatonu, ʼe mole au ʼiloʼi peʼe feafeaʼi  haku kamata palalau ki taku ʼu mātuʼa ʼo ʼuhiga mo te ʼu felāveʼi fakasino.”

ʼE mahino ia, ʼi tokotou ʼuhiga mātuʼa ʼe ko tokotou maʼua neʼe tuku atu e te ʼAtua ke kotou palalau ki takotou fānau ʼo ʼuhiga mo te ʼu felāveʼi fakasino. (Efesi 6:4) ʼE moʼoni, ʼe lagi faigataʼa kiā koutou pea mo takotou fānau hakotou palalau ki te faʼahi ʼaia. Kae ko te meʼa ʼaē ʼe lelei, tokolahi ʼi te kau tūpulaga ʼe natou manatu tahi mo Danielle ʼaē ʼe taʼu 14, neʼe ina ʼui fēnei: “ ʼO ʼuhiga mo te ʼu felāveʼi fakasino, ʼe matou loto ke akoʼi mai te faʼahi ʼaia e tamatou ʼu mātuʼa kae mole ko te hahaʼi faiako peʼe ko te televisio.” Koia, ʼe feafeaʼi hakotou lava palalau ki takotou fānau ki te faʼahi maʼuhiga ʼaia kae ʼe faigataʼa? b

ʼO Mulimuli Pē Ki Tonatou Taʼu

Ko te fānau ʼe natou logo tautonu ki te ʼu meʼa ʼaē ʼo ʼuhiga mo te ʼu felāveʼi fakasino, gata pē mo kapau ʼe natou mamaʼo mai te hahaʼi ʼe lagi mole natou logo ai anai ki te ʼu faʼahi ʼaia. Tahi ʼaē meʼa fakatupu tuʼania, heʼe ʼi te “ ʼu ʼaho fakamuli,” ʼe ʼāsili age te “kovi ʼaupitō” ʼo te hahaʼi agakovi. (2 Timoteo 3:1, 13) Meʼa fakaʼofaʼofa, heʼe tokolahi te fānau neʼe fakaʼalikiʼi e te hahaʼi lalahi.

Koia ʼe maʼuhiga kiā koutou ke kotou akoʼi takotou fānau ʼaē ʼe kei natou liliki. ʼE ʼui fēnei e te faʼē ʼi Siamani, ʼe higoa ko Renate: “Kapau ʼe kotou fakatalitali ke natou aʼu ki tonatou temi tūpulaga, ʼe lagi feala ke mole natou fia palalau faʼifaʼitaliha atu, koteʼuhi ko te ʼu fetogi ʼaē ʼe hoko kiā natou ʼi te faʼahi fakasino ʼi tanatou lahilahi ake.” Ko te puleʼaki kiai, ke fakamahino age te ʼu faʼahi ʼaia, ʼo mulimuli pē ki tonatou taʼu.

Maʼa takotou fānau ʼaē ʼe mole heʼeki natou hū ako: Kotou tokaga ʼo akoʼi te ʼu higoa ʼo te ʼu koga tapu ki takotou fānau, pea mo fakahā fakalelei age ʼe mole tonu ki he tahi kehe ke fāfā ki te ʼu koga ʼaia. ʼE ʼui fēnei e te faʼē ʼi Mekesike, ʼe higoa ko Julia: “Neʼe au kamata ako ki taku tama ʼi tana kei taʼu tolu. ʼI taku manamanatu pē ʼaē ʼe feala ke fai te ʼu aga fakalialia ʼaia kiā ia e te hahaʼi faiako, te hahaʼi taupau tamaliki, peʼe ko ʼihi tamaliki lalahi, neʼe au tuʼaniaʼi ʼosi. Neʼe tonu ke ina ʼiloʼi peʼe feafeaʼi hona puipui mai he tahi kehe.”

ʼAHIʼAHIʼI TE PULEʼAKI ʼAENĪ: Kotou akoʼi age ki te tamasiʼi ke fakafeagai fakamālohi mo kapau ʼe faiga he tahi ke gaoʼi peʼe ke fāfā ki tona ʼu koga tapu. Ohagē lā, ʼe feala ke kotou akoʼi age ke ina ʼui fēnei: “Tuku nei naʼa au ʼalu ʼo tala koe!” Kotou fakahā age ko tana tala te faʼahi ʼaia ʼe lelei tuʼumaʼu, tatau aipē pe neʼe fakapapauʼi age hana meʼa pe neʼe fakamatakuʼi ia ia. c

Maʼa takotou fānau ʼaē ʼe ʼi te faleako liliki: Kotou fakaʼaogaʼi te ʼu taʼu ʼaia ohagē ko he faigamālie moʼo hilifaki ki te tuputupu ʼo te ʼatamai mālama ʼo takotou fānau. ʼE ʼui fēnei e te tamai ʼe higoa ko Peter: “ ʼI muʼa ʼo he fai palalau, vakaʼi muʼa pe koteā te ʼu meʼa ʼaē kua ina ʼiloʼi pea mo vakaʼi peʼe ina fia ʼiloʼi he tahi age ʼu meʼa. ʼAua naʼa kotou fakakinauʼi te fai palalau. Kapau ʼe kotou fai tuʼumaʼu te faʼahi ʼaia mo takotou fānau, pea ʼe lagi natou palalau faʼifaʼitaliha atu anai.”

ʼAHIʼAHIʼI TE PULEʼAKI ʼAENĪ: Kotou fai he ʼu fai palalau fakanounou kae fai tuʼumaʼu, kae ʼaua naʼa kotou fai ‘he ʼu palalau ʼe loaloaga fau.’ (Teutalonome 6:6-9) Kapau ʼe kotou fai fēia, pea ʼe mole kotou fakafiu anai takotou fānau. Tahi ʼaē, ʼi tanatou lahilahi ake ʼe natou maʼu anai te tokoni ʼaē ʼe ʼaoga kiā nātou, ʼo mulimuli pē ki te ʼu meʼa ʼaē ʼe natou lava mahino kiai.

Maʼa te kau tūpulaga: Kua tonu leva ʼi te temi nei ke kotou ʼiloʼi papau peʼe kua maʼu e takotou fānau te ʼatamai mālama feʼauga ʼo ʼuhiga mo te ʼu felāveʼi fakasino ʼaē ʼi te faʼahi fakasino, ʼi te faʼahi ʼo te loto pea mo te aga ʼaē ʼe tonu ke fai. ʼO ʼuhiga mo Ana ʼaē ʼe taʼu 15 pea neʼe kua tou talanoa pē kiai, ʼe ina ʼui fēnei: “Ko te ʼu tama pea mo te ʼu taʼahine ʼaē ʼi toku faleako kua fakalāluvale tanatou fai te ʼu felāveʼi fakasino. ʼI taku manatu ʼi toku ʼuhiga Kilisitiano, neʼe ʼaoga ke au maʼu he ʼatamai mālama feʼauga ʼo ʼuhiga mo te ʼu felāveʼi fakasino. Logolā te faigataʼa ʼo te palalau ʼaē ki te ʼu felāveʼi fakasino, kae ko he faʼahi ʼe tonu ke au mahino kiai.” d

Te fakatokaga: ʼE feala ki te kau tūpulaga ke mole natou faifehuʼi, koteʼuhi ʼe natou tuʼania naʼa mahalohalo tanatou ʼu mātuʼa kua natou fai he aga heʼemaʼa. Ko te faʼahi ʼaia neʼe mahino kiai te tamai ʼe higoa ko Steven. ʼE ina ʼui fēnei: “Ko tamā tama ʼe mole fia palalau ki te ʼu felāveʼi fakasino. Kae ki muli age neʼe mā mahino ai leva, neʼe manatu ia ʼe feala ke mā  mahalohalo neʼe ina fai he aga ʼe kovi mo kapau ʼe palalau mai ki te faʼahi ʼaia. Neʼe mā fakamahino lelei age kā mā palalau age ki te ʼu faʼahi ʼaia, ʼe mole mā mahalohalo neʼe ina fai he aga heʼemaʼa; kae ʼe mā loto pē ke ina maʼu he ʼatamai mālama feʼauga moʼo tekeʼi te ʼu fakaneke kovi ʼaē mai ʼihi.”

ʼAHIʼAHIʼI TE PULEʼAKI ʼAENĪ: ʼAua naʼa kotou fehuʼi fakahagatonu age ki takotou fānau he faʼahi ʼo ʼuhiga mo te ʼu felāveʼi fakasino, kae ke kotou fehuʼi age pe koteā te manatu ʼo tona ʼu kaugā ako ʼo ʼuhiga mo te faʼahi ʼaia. Ohagē lā, ʼe feala ke kotou ʼui fēnei age: “Tokolahi iā ʼaho nei ʼe natou ʼui ko te ʼu felāveʼi fakasino ʼaē ʼe fai mo te gutu, ʼe mole ko he felāveʼi fakasino ia. ʼE ko te manatu koa ʼaia ʼo tokotou ʼu kaugā ako?” Ko te ʼu taʼi fehuʼi fēia, ʼe lagi feala ai anai ki takotou fānau ke palalau faʼifaʼitaliha atu pea mo fakahā atu tana manatu ʼo ʼuhiga mo te faʼahi ʼaia.

Kotou Tekeʼi Te Aga Ufiufi

ʼE mahino ia, ko te palalau ki takotou fānau ʼo ʼuhiga mo te ʼu felāveʼi fakasino, ʼe lagi ko hokotou maʼua ʼi tokotou ʼuhiga mātuʼa ʼe feala ke kotou ufiufi ʼi tona fakahoko. Kae ko he faʼahi ia ʼe fua lelei anai. ʼE ʼui fēnei e te faʼē ʼe higoa ko Diane: “ ʼAki te temi ʼe mole kei kotou ufiufi leva ʼi te palalau ki te ʼu meʼa ʼaia, pea ko takotou palalau ʼaē ki takotou fānau ʼo ʼuhiga mo te ʼu felāveʼi fakasino, ʼe liliu anai ko he faigamālie moʼo fakamālohiʼi takotou ʼu felōgoi.” Ko Steven ʼaē neʼe kua tou talanoa pē kiai, ʼe ina maʼu mo ia te manatu ʼaia. ʼE ina ʼui fēnei: “ ʼE liliu ʼo faigafua age hakotou palalau ki he ʼu meʼa faigataʼa ohagē lā ko te ʼu felāveʼi fakasino, mo kapau ʼe kotou fakamāmāhani ʼi te palalau faʼifaʼitaliha ki he ʼu meʼa pē ʼe hoko ʼi tokotou fāmili.” ʼE ina toe ʼui fēnei: “Ko he felōgoi faʼifaʼitaliha ʼe maʼuhiga ki te maʼuli fiafia ʼo he fāmili Kilisitiano, logolā ʼe ʼi ai pē anai he ʼu faʼahi ʼe mata faigataʼa hona palalauʼi ki takotou fānau.”

[ʼU nota]

[Talanoa/Paki ʼo te pasina 12]

ʼE KOTOU TALI FEAFEAʼI ANAI?

Kotou lau te ʼu fakamatala ʼaenī ʼa te kau tūpulaga ʼi te mālamanei kātoa, pea kotou fakakaukauʼi leva peʼe feafeaʼi anai hakotou tali kiai.

• “ ʼE ʼui mai e taku ʼu mātuʼa ke au lau te ʼu ʼalatike ʼo ʼuhiga mo te ʼu felāveʼi fakasino pea ke au ʼalu age leva kiā nāua mo kapau ʼe ʼi ai haku ʼu fehuʼi. Kae ʼe au loto ke lahi age tanā palalau mai ʼaē kiā au ʼo ʼuhiga mo te faʼahi ʼaia.”—Ana, ʼi Pelesile.

He koʼē ʼi takotou manatu, ʼe mole gata pē ke kotou foaki age ki takotou fānau he ʼalatike peʼe ko he tohi ke feala ai hona akoʼi ʼo ʼuhiga mo te ʼu felāveʼi fakasino?

• “Neʼe lahi te ʼu meʼa ʼo ʼuhiga mo te ʼu felāveʼi fakasino fakalialia neʼe au ʼiloʼi, pea ʼi taku manatu ʼe mole ʼiloʼi e taku matuʼa. Koia kapau ʼe au fehuʼi age anai kiā ia, pea ʼe punamaʼuli anai ia.”—Ken, ʼi Kanata.

Koteā ʼaē ʼe lagi tuʼaniaʼi e takotou fānau ʼi tana fakahā atu te ʼu meʼa ʼaē ʼe mamahi kiai?

• “ ʼI te temi ʼaē neʼe au lava palalau ai ki taku ʼu mātuʼa ʼo ʼuhiga mo te ʼu felāveʼi fakasino, pea ʼi tanā tali mai, ʼe hagē ʼe nā tukugākoviʼi au, ʼo nā fehuʼi mai: ‘He koʼē koa ʼe ke fai mai te fehuʼi ʼaia? Koteā ʼaē neʼe ke fai?’ ”—Masami, ʼi Saponia.

Kā fehuʼi atu e takotou fānau he meʼa ʼo ʼuhiga mo te ʼu felāveʼi fakasino, ʼe feala ke kotou fakafaigafua te fai palalau peʼe ke kotou fakafaigataʼa?

• “ ʼE tokoni mai anai kiā au, mo kapau ʼe ʼui mai e taku ʼu mātuʼa, ʼi tonā temi tūpulaga neʼe nā fai pē mo nāua ia te ʼu taʼi fehuʼi ʼaia pea ʼe mole kovi te ʼu fehuʼi ʼaia.”—Lisette, ʼi Falani.

ʼE feafeaʼi hakotou fakafaigafua ki takotou fānau ke natou palalau faʼifaʼitaliha atu ki te ʼu felāveʼi fakasino?

• “ ʼE fai mai e taku faʼē te ʼu fehuʼi ʼo ʼuhiga mo te ʼu felāveʼi fakasino, kae ʼe lave lelei heʼe ko tona leʼo ʼe mole fefeka. ʼE au logoʼi ʼe maʼuhiga te faʼahi ʼaia, ke feala ai ki he fānau ke ina ʼiloʼi peʼe valokiʼi ia ia.”—Gerald, ʼi Falani.

ʼE ʼaveʼave feafeaʼi takotou palalau ki takotou fānau ʼo ʼuhiga mo te ʼu felāveʼi fakasino?