Jesuspa yachachiykunasnin

¿Ima ruwaykunamantaq ángeles tanqawanchik?

“Manaraj kay pacha ruwakushajtin”, Jesusqa, janaqpachapi Tatanwan kawsakurqaña (Juan 17:5). Chayraykutaq Jesuslla kay tapuykunasman kutichiwasunman.

Ángeles ruwasqasninchikpi, ¿interesakunkuchu?

▪ Jesusqa, ángeles ñuqanchikmanta mayta interesakusqankuta willawanchik. Pay nirqa: “Kusiy kasqanta Diospa angelesnimpa ñawpaqempi, juchasapa runaqa Diosman kutirikojtin” (Lucas 15:10).

Chantapis ángeles Diospa kamachisninta yanapanankupaq churasqa kasqankuta sutʼincharqa, nisunman Dioswan allinpi kanankupaq. Jesusqa discipulosniman nirqa, hermanosniykichikta mana ima saqratapis ruwaychikchu, mana pantachinaykichikpaq, imaptinchus “paykunaj angelesninkoqa qhawashankupuni janaj pachapi kaj Tataypa uyanta”, nispa (Mateo 18:10). Kayta nispaqa mana sapa jukta, juk angel jarkʼachkasqatachu nichkarqa. Astawanqa ángeles Diospa kamachiyninpi kachkanku, chayraykutaq chiqa cristianosmanta interesakunku.

 ¿Imaynamantá Kuraq Supay ñakʼarichiwasunman?

▪ Jesusqa, runas Diosta mana riqsinankupaq tukuy imata Satanás ruwananta discipulosninman sutʼincharqa. Nirqataq: “Pipis janaj pacha reinomanta Palabrata uyarishaspa mana entiendejtin, Kuraj Supay jamuspa, sonqompi imachus tarpusqa kajta qhechun”, nispa (Mateo 13:19).

Chantapis imaynatachus Satanás runata chʼawkiyasqanta, juk rikchʼanachinapi trigota tarpuq runawan kikincharqa. Tarpuq runaqa Jesús, trigotaq chiqa cristianos janaq pachapi Jesuswan khuska, kamachiqkuna kanku. Biblia nisqanmanjina enemigoqa, “cizaña nisqa qhora mujuta trigo tarpusqaman tʼakayku[rqa]”. Cizaña nisqa qura llulla cristianoswan kikinchakun, “enemigoqa Kuraj Supay” (Mateo 13:25, 39). Imaynatachus cizaña qura trigowan khuska wiñachkaspa rikchʼakunku, llulla cristianosqa chiqa cristianosman rikchʼakullankutaq. Chiqa cristianosman rikchʼakuptinkupis, llulla yachachiykunasta runasman yachachinku, jinamanta Diosta mana kasukunankupaq. Satanasqa llulla religionta apaykachan, runasta Jehovamanta karunchananpaq.

¿Imaynatá Satanasmanta jarkʼakusunman?

▪ Jesusqa, kay Juan 14:30 pʼitipi, Satanás ‘kay pachata kamachiq’ kasqanta nirqa. Chantapis imaynatachus paymanta jarkʼakunata yachachirqa. Discipulosninpi yuyaspa Tatanmanta jinata mañakurqa: “Mañakuni paykunata sajra kajmanta waqaychanaykita. Paykunaqa mana kay pachajtachu kanku; noqapis manallataj kay pachajtachu kani. Paykunata qampaj tʼaqay cheqa kajnejta; nisqasniykeqa cheqapuni kanku” (Juan 17:15-17). Satanás kay pachata kamachisqanrayku, Diospaq Palabranta riqsinanchik tiyan jarkʼakunanchikpaq.

¿Imaynatá kay tiempopi ángeles yanapawanchik?

▪ Jesús nirqa: “kay tiempoj tukukuynimpi; angeles llojsimuspa, juchasapasta tʼaqanqanku cheqan runasmanta”, nispa (Mateo 13:49). Ñuqanchiktaq “kay pachaj tukukuynin[pi]” kawsachkanchik, mayqinpichus achkha runas Diospa Reinomanta willayta japʼikuchkanku (Mateo 24:3, 14).

Bibliata yachakuyta qallariqkunaqa, mana tukuychu Diospa ñawpaqinpi allin qhawasqa kanku. Jehovaqa, angelesta, Diospa kamachisninta yanapananpaq apaykachan, chantapis Diospaq kamachiykunasninta mana uyarikuqkunamanta tʼaqanawanchikpaq. Jesús, Diospaq allin qhawasqa kaqkunamanta jinata nirqa: “Pikunachus sumaj sonqowan, cheqan yuyaywantaj Diospa Palabranta uyarinku, chaykunawan. Sonqonkupi Diospa Palabranta japʼikuspataj, pacienciawan kawsayninkupi sumaj poqoyta rikuchinku” (Lucas 8:15).

Astawan yachakuyta munaspaqa, kay librop, ¿Imatapunitaq Biblia yachachin?, 10 yachaqananta ñawiriy. Kaytaqa, Jehovamanta sutʼinchaqkuna urqhunku.

[16 paginapi dibujo/foto]

Angelesqa, Bibliata sunqumantapacha yachakuyta munaqkunata yanapanku