Ivyo Tikusambira kwa Yesu

Umo Tikukhwaskikira na Vilengiwa Vyauzimu

Yesu wakakhalanga na Ŵadada ŵake kucanya “pambere caru cindaŵeko.” (Yohane 17:5) Ntheura, ndiyo wangazgora makora mafumbo ghakulondezgapo agha.

Kasi ŵangelo ŵakunweka nase?

▪ Kwa Yesu tikusambirako kuti ŵangelo ŵakunweka nase comene. Iyo wakati: ‘Pakuŵa cimwemwe pakati pa ŵangelo ŵa Ciuta pa wakwananga yumoza uyo wapera.’—Luka 15:10.

Yesu wakalongora kuti ŵangelo ŵali na mulimo wa kupwelelera umoyo wauzimu wa ŵateŵeti ŵa Ciuta. Lekani apo Yesu wakacenjezganga ŵasambiri ŵake za kukhuŵazga ŵanji wakati: “Woneseskani imwe mwaŵanthu kuti mukwelura yumoza wa ŵacoko aŵa cara; pakuti nkhumuphalirani kuti ŵangelo ŵawo kucanya nyengo zose ŵakulaŵiska cisko ca Ŵadada awo ŵali kucanya.” (Mateyu 18:10) Pakuyowoya mazgu agha, Yesu wakang’anamuranga kuti waliyose wali na mungelo uyo wakumuvikilira yayi. Kweni wakang’anamuranga kuti ŵangelo, awo ŵakuteŵetera lumoza na Ciuta mbakunweka comene na ŵanthu awo ŵali mu mpingo wa Ŵakhristu ŵaunenesko.

 Kasi Satana wangatipweteka wuli?

▪ Yesu wakacenjezga ŵanthu awo ŵakamulondezganga kuti Satana wakukanizga ŵanthu kusambira unenesko wakuyowoya za Ciuta. Iyo wakati: “Peneapo munthu wakupulika mazgu gha ufumu kweni wakumanya ng’anamuro lake cara, muheni wakwiza na kupoka ico caseŵeka mu mtima wake.”—Mateyu 13:19.

Kwizira mu ntharika ya munthu uyo wakaseŵa tirigu mu munda wake, Yesu wakavumbura nthowa yimoza iyo Satana wakupuluskira ŵanthu. Munthu wakimiranga Yesu, tirigu wakimiranga Ŵakhristu ŵaunenesko. Kweni Yesu wakati mulwani wakiza na “kuseŵamo duru mukati mu tirigu.” Duru wakwimira Ŵakhristu ŵatesi. “Mulwani uyo wakaliseŵa ni Dyabulosi.” (Mateyu 13:25, 39) Nga umo duru wakuwonekera nga ni tirigu, Ŵakhristu ŵatesi nawo ŵangawoneka nga mbasopi ŵaunenesko. Visopa ivyo vikusambizga visambizgo vyautesi vikupusika ŵanthu kuti ŵaleke kupulikira Ciuta. Satana wakugwiliskira nchito cisopa cautesi kuti watimbanizge ubwezi wa ŵanthu na Yehova.

Tingamukanizga wuli Satana kuti waleke kutipweteka?

▪ Yesu wakati Satana ni “muwusi wa caru.” (Yohane 14:30) Apo Yesu wakalombanga kwa Ciuta, wakazunura nthowa ya umo tingakanizgira Satana kuti waleke kutipweteka. Pakuyowoya za ŵasambiri ŵake, Yesu wakalomba kuti: “Muŵavikilire cifukwa ca muheni. Ŵali ku cigaŵa ca caru cara, umo ine niliri ku cigaŵa ca caru cara. Ŵatuŵiskani na unenesko; mazgu ghinu mbunenesko.” (Yohane 17:15-17) Kumanya Mazgu gha Ciuta kungatovwira kuti tileke kupuluskika na caru ico Satana wakuwusa.

Kasi ŵangelo ŵakutovwira wuli mazuŵa ghano?

▪ Yesu wakati: “Mu umaliro wa mgonezi: ŵangelo ŵazamuluta na kupatura ŵaheni kufuma pa ŵarunji.” (Mateyu 13:49) Sono tili mu nyengo ya “umaliro wa mgonezi,” ndipo ŵanthu ŵanandi ŵakuzomera makani ghawemi gha Ufumu wa Ciuta.—Mateyu 24:3, 14.

Kweni ni wose yayi awo ŵakusambira Mazgu gha Ciuta awo mbakuzomerezgeka. Ŵangelo ŵakulongozga mulimo wa ŵateŵeti ŵa Yehova, ndipo ŵanthu awo ŵakutemwa nadi Ciuta ŵakupatukako ku awo ŵakukhumba yayi kulondezga ivyo ŵakusambira. Pakuyowoya za ŵanthu awo Ciuta wakukondwa nawo, Yesu wakati: “Aŵa mbeneawo ŵati ŵapulika mazgu na mtima uwemi comene, ŵakughasunga na kupambika cipambi pamoza na cizizipizgo.”—Luka 8:15.

Kuti mumanye vinandi wonani cipaturo 10 mu buku ili, Kasi Baibolo Likusambizgaci Comenecomene? ilo likupharazgika na Ŵakaboni ŵa Yehova.

[Cithuzithuzi pa peji 16]

Ŵangelo ŵakovwira pa mulimo wa kuguzira ŵanthu ŵa mitima yiwemi ku mpingo wa Ŵakhristu ŵaunenesko