Ang Biblia Nagapabag-o sang Kabuhi

NGAA ginbag-o sang isa ka kawatan kag rebelde ang iya kabuhi? Ngaa nagbag-o ang mga handum sang isa ka kampeon sa martial arts? Ngaa wala mapaslawan ang paglaum sang isa ka amay nga magabag-o ang iya bata? Basaha ang ila mga eksperiensia.

“Sa Pihak sang Akon mga Inagihan, Malipayon Ako Subong.”—GARRY P. AMBROCIO

EDAD: 47

PUNGSOD: PILIPINAS

KABUHI SANG UNA: REBELDE

ANG AKON NAGLIGAD: Nagdaku ako sa banwa sang Vintar. Ang amon lugar ginapalibutan sang kabukiran, may matinlo nga mga suba, kag preska ang hangin. Malinong diri pero pigado ang pangabuhi. Gani ginakawat ang amon kasapatan kag ginasaka ang amon balay.

Sang tin-edyer ako, nagapahubog ako upod sa akon mga barkada, nagapanigarilyo, kag nagapangawat para may igasto ako sa akon mga bisyo. Ginkawat ko pa gani ang alahas ni Lola. Ginsuspetsahan ako sang militar nga miembro ako sang NPA kag pirme nila ako ginakastigo. Bangod sini, nag-NPA na lang ako. Lima ka tuig ako nga nag-istar sa kabukiran upod sa mga NPA. Mabudlay ang amon kabuhi. Pirme kami nagasaylo para indi madakpan sang militar. Sang ulihi, tinak-an ako sa pagpanago. Gani nagsurender ako sa gobernador sang Ilocos Norte. Gintratar niya ako sing maayo kag ginbuligan nga makakita sang disente nga obra. Pero sige gihapon ang akon pagpamahog kag pagpangawat sa mga balay.

KON PAANO GINBAG-O SANG BIBLIA ANG AKON KABUHI: Sa akon ginaobrahan, nakilala ko si Loida nga isa sa mga Saksi ni Jehova. Ginpakilala niya sa akon si Jovencio nga amo ang nagtudlo sa akon sang Biblia. Pero kabudlay gid magbag-o. Gauntat lang ako panigarilyo kon mag-abot si Jovencio para tun-an ako sa Biblia, kag may ginahimo ako gihapon nga ilegal. Sang ulihi, nadakpan ako sang mga pulis kag napriso sing 11 ka bulan. Nangamuyo ako para mangayo sing bulig kag patawad kay Jehova. Nangayo man ako sing balaan nga espiritu para maggiya kag magpabakod sa akon.

Sang ulihi, may Saksi ni Jehova nga nagkadto sa prisuhan kag gindal-an ako sing Biblia. Ginbasa ko ini kag natun-an ko nga si Jehova maluluy-on, mahigugmaon, kag mapinatawaron. Narealisar ko nga ginkaluy-an ako ni Jehova kag ginhatagan sing kahigayunan nga makilala sia. Nangayo ako sing bulig sa iya para mauntatan ko ang akon mga bisyo. Nabuligan gid ako sang Hulubaton 27:11 kay daw si Jehova gid ang nagaistorya sa akon.  Nagasiling ini: “Anak ko, magmaalam ka, kag pasadyaha ang akon tagiposoon, agud nga masabat ko sia nga nagapakahuya sa akon.”

Sang makagua ako, ginpadayon ko ang pagtuon sing Biblia upod sa mga Saksi. Nagtambong man ako sa ila pagtilipon kag ginsunod ang mga prinsipio sa Biblia. Sa bulig ni Jehova, nauntatan ko gid man ang akon mga bisyo. Gindedikar ko dayon ang akon kabuhi kay Jehova nga Dios.

MGA BENEPISYO: Sa pihak sang akon mga inagihan, malipayon ako subong. Bisan pa may mga bisyo ako sadto, nagbag-o na ako. (Colosas 3:9, 10) Subong, nalipay gid ako nga mangin bahin sang matinlo nga katawhan ni Jehova kag nagabulig sa iban nga makilala ang aton labing gamhanan nga Dios, si Jehova.

“Gusto Ko nga Irepresentar ang Brazil.”—JULIANA APARECIDA SANTANA ESCUDEIRO

EDAD: 31

PUNGSOD: BRAZIL

KABUHI SANG UNA: KAMPEON SA MARTIAL ARTS

ANG AKON NAGLIGAD: Nagdaku ako sa Londrina. Bisan pa pigado ang kalabanan diri, matinlo ini nga lugar kag malinong. Sang dies anyos ako, gin-upod ako sang akon magulang para magpraktis sing taekwondo, nga buot silingon, “ang hulag sang kamot kag tiil.” Indi sini komporme si Tatay pero sang ulihi nagpasugot sia.

Nagpraktis ako sing maayo kag pila ka beses ako nga nagdaug sa taekwondo sa Parana. Madamo pa gid ako sing gindag-an nga mga kampeonato, kag sang 1993, nangin kampeon ako sang taekwondo sa Brazil. Gusto ko mag-entra sa internasyonal nga mga kompetisyon. Pero, wala ako sing inuggasto pakadto sa iban nga pungsod kay pigado lang kami.

Nagalaum gid ako nga ang taekwondo ilakip sa Olympics, kag natabo gid ini. Gusto ko nga irepresentar ang Brazil sa Olympic Games, gani tudotudo gid ang akon praktis. May nag-isponsor man sa akon para makaentra ako sa mga kompetisyon sa Pransia, Vietnam, South Korea, Japan, kag sa South American Games. Handum ko man nga mag-entra sa Pan American Games, kag bangod sa akon performance, isa ako sa tatlo nga ginpili para sa sini nga kompetisyon nga ginhiwat sa Santo Domingo, Dominican Republic, sang 2003.

KON PAANO GINBAG-O SANG BIBLIA ANG AKON KABUHI: Sang 2001, nakilala namon sang akon nobyo ang mga Saksi ni Jehova, kag gintun-an nila kami sa Biblia. Sang primero, ginatamaran ako. Pirme ako kapoy amo nga indi ako makakonsentrar kag nagakatulugan ako kon magtuon kami. Pero ang akon natun-an nagdulot sa akon tagipusuon kag nabatyagan ko ang epekto sini sa masunod ko nga kompetisyon.

Bangod miembro ako sang team para sa Pan American Games, ginpaentra anay ako  sang mga taekwondo master sa isa ka tournament. Sang akon na turno, naurungan lang ako sa tunga nga wala na sing gana mag-away. Gulpi ko lang narealisar nga ang isa ka Cristiano indi dapat makig-away, bisan sa sports! Nadumduman ko ang siling sang Biblia nga “higugmaon mo ang imo isigkatawo subong sang imo kaugalingon.” (Mateo 19:19) Gani nagtalikod ako kag naglakat. Daw indi makapati ang mga nagatan-aw sa akon ginhimo.

Pag-abot ko sa balay, nagpungko ako kag namensar kon ano na ang akon himuon. Ginkuha ko ang brosyur sang mga Saksi ni Jehova parte sa ginapatuman sang Dios sa aton. Ginsambit diri ang Salmo 11:5 (APD) parte sa pagtamod ni Jehova nga Dios: “Ginakaugtan niya ang mga mapintas.” Naigo gid ako sini, kag nagdesisyon ako nga untatan ang taekwondo.

Naakig sa akon ang akon mga master. Ginakumbinsi nila ako nga ako ang pinakamaayo sa amon pungsod kag daku ang tsansa ko nga makaentra sa Olympic Games. Pero nakadesisyon na ako.

Sadto nga tion, kasal na kami sang akon nobyo. Nagaupod na sia sa mga Saksi sa pagwali. Kada pauli niya, malipayon gid sia kag ginasugiran niya ako parte sa iya pagpakig-istorya sa mga tawo. Nahibal-an ko nga dapat ko bag-uhon ang akon kabuhi para makaupod ako sa iya. Gani naghalin ako sa akon relihion kag sang ulihi nagpabawtismo ako subong isa ka Saksi.

MGA BENEPISYO: Malipayon gid kami kag nahiusa sang akon bana kay ginatinguhaan namon nga sundon ang mga prinsipio sang Biblia sa amon pag-asawahay. Ginasuportahan ko sia sa iya pagbulig sa amon kongregasyon. Siguro nagdaug ako sing bulawan nga medalya kag nagbantog kon ginpadayon ko ang taekwondo. Pero indi gid ini makalabaw sa pribilehiyo nga alagaron si Jehova nga Dios.

“Wala gid Mangampo si Tatay sa Akon.”—INGO ZIMMERMANN

EDAD: 44

PUNGSOD: GERMANY

KABUHI SANG UNA: GUARDIA SA KLAB

ANG AKON NAGLIGAD: Natawo ako sa Gelsenkirchen, isa ka banwa nga may minahan sang karbon. Lainlain ang relihion sang amon pamilya. Si Tatay isa ka Saksi ni Jehova, kag ginatudluan niya kami nga mag-ulutod parte sa iya relihion. Pero indi sini gusto si Nanay. Drayber sang trak si Tatay, kag nagaobra sia sing pulo ka oras ukon sobra pa kada adlaw. Mga alas dos ukon alas tres pa lang sang kaagahon nagalakat na sia. Bisan pa sini, ginatudluan gid niya kami parte sa Dios. Pero, wala ako nanamian sa iya ginahimo.

Sang 15 anyos ako, natak-an na ako magtambong sa iya relihion, kag nagrebelde ako. Isa ka tuig sang ulihi, nag-entra ako sa grupo sang mga boksingero. Daw makalbo si Tatay sa akon ginpanghimo sa nagsunod nga duha ka tuig. Nagpain ako sang mag-18 anyos ako.

 Gusto ko gid ang sports kag nagapraktis ako sing anom ka beses kada semana—una anay boksing dayon weight lifting. Kon Sabado kag Domingo naman, pirme ako sa klab upod sa akon mga barkada. Isa ka bes, nagtapungulay kami sang isa ka kostumer nga kululbaan ang hitsura, pero napierde ko sia. Nakita ini sang tag-iya sang klab kag gintanyagan niya ako nga mangin security guard. Daku ang sueldo, gani ginbaton ko ang obra.

Kon Sabado kag Domingo, nagabantay ako sa puertahan sang klab. Masako gid ako kay mga 1,000 ang nagakadto sa klab. Ako ang masunod kon sin-o ang puede kasulod, gani pirme lang ako may kontra. Ginatayaan ako sang pusil kag buka nga botelya. Ginabantayan ako sang mga wala ko ginpasulod ukon sang mga gintabog ko sa klab, para balusan ako. Beinte anyos lang ako kag abi ko wala sing makadaug sa akon. Daw indi ako mapunggan—maisog, tikalon, ambisyuso, kag tig-a ulo.

KON PAANO GINBAG-O SANG BIBLIA ANG AKON KABUHI: Wala gid mangampo si Tatay sa akon. Ginapadal-an niya ako sang Lalantawan kag Magmata! nga mga magasin. * Nagatumpok lang ini sa akon kuarto nga wala mabasa. Pero isa ka bes, ginbasabasa ko ang iban sini. Sang nabasahan ko nga ang pulitika, ekonomiya, kag relihioso nga sistema dulaon, gintawgan ko si Manang. Sia kag ang iya bana mga Saksi ni Jehova. Nagsiling sila nga tudluan nila ako sa Biblia, kag nagpasugot ako.

Ang prinsipio sa Galacia 6:7 amo ang nagpabag-o sa akon. Base sa akon inagihan, bal-an ko nga ang akon ginahimo, ginahambal, kag desisyon subong may epekto sa akon palaabuton. Napabakod gid ako sang ginsiling sa Isaias 1:18: “Kari karon, kag magbais kita sing tingub, nagasiling ang GINOO: bisan ang inyo mga sala subong sang escarlata, manginmaputi sila subong sang nieve.” Sugod sang nagtuon ako, nakabulig ini sa akon nga mabatyagan nga may balor ako kag puede pa ako makabalik.

Sa sulod sang anom ka bulan, daku ang akon ginbag-o pero ginbudlayan ako. Dapat ko biyaan ang akon mahigko nga kabuhi kag malain nga kaupdanan. Ginsugid ko sa akon mga barkada ang akon natun-an sa Biblia. Amat-amat nila ako nga ginlikawan kag ginatawag nila ako nga pari. Pero ginbuligan ako ni Manang nga makakita sang mas maayo nga obra.

Nagtambong man ako sa Kingdom Hall nanday Manang, bisan pa mga 30 kilometros ang kalayuon sini. May Kingdom Hall nga malapit lang sa amon, pero nakulbaan ako nga basi makita ako sang mga nakakilala sa akon. Nahadlok man ako magpamalaybalay kag magwali sa amon lugar. Ano abi kon makita ako sang mga gintabog ko sa klab ukon sang mga ginhatagan ko sing droga? Pero may natun-an ako sa amon praktis sa sports sang una—ang pinakamabudlay himuon amo ang pinakaimportante. Gani sang puede na ako magwali, pirme ko gid ini ginahimo.

May isa pa ako ka problema. Natak-an ako magbasa kag magtuon. Pero nabal-an ko nga para magbakod ang akon pagtuo, dapat ko disiplinahon ang akon kaugalingon nga tun-an sing maayo ang Biblia. Natun-an ko nga pareho sa weight lifting, dapat ka mangabudlay para magkusog.

MGA BENEPISYO: Buhi ako asta subong! Dapat ko gihapon batuan ang akon malain nga mga batasan. Pero malipayon kami sang akon asawa, nga may matahom nga mga kinaiya bilang isa ka Cristiano. May masaligan man ako nga mga abyan nga mga Saksi ni Jehova. Lima na ka tuig nga napatay si Tatay. Antes sia napatay, nalipay gid sia nga nagbalik ako.

[Nota]