Ebaibol Na O Re Nwene Uzuazọ Ohwo

EME o ru ohwo jọ nọ ọ jọ omọvo elakpa otu ugbarugba gbe oji nwene edhere uzuazọ riẹ? Fikieme aye jọ nọ ọ jọ ọgba ekareti o ro nwene utee nọ o je le evaọ uzuazọ? Ẹvẹ irẹro nọ ọsẹ jọ o wo inọ ọmọ riẹ o ti nwene ẹdẹjọ i ro rugba? Se ikuigbe nana re whọ ruẹ iyo na.

“Ghelọ ekpehre uzuazọ nọ me yeri evaọ oke nọ u kpemu, enẹna mẹ be wereva.”—GARRY P. AMBROCIO

IKPE RIẸ: 47

ORẸWHO RIẸ: PHILIPPINES

IKU RIẸ: OMỌVO ELAKPA OTU UGBARUGBA

UZUAZỌ MẸ EVAỌ OKE NỌ U KPEMU: Ẹwho ọsese jọ nọ a re se Vintar mẹ jọ whẹro. Igbehru nọ e vọ avọ ẹbe-ọrọrọ, emamọ ofou, gbe ithẹ nọ ame rai ọ rrọ fuafo e wariẹ ukiekpotọ oraragha nọ ma jẹ rria na họ. Ghele epanọ okegbe na ọ fọ je woma te na, uzuazọ o jọ bẹbẹ. Ahwo a jẹ hai tho erao mai jẹ bẹre ẹthẹ ruọ uwou mai.

Nọ mẹ jọ ikpe-ikpegbọ, mẹ avọ egbẹnyusu mẹ ma jẹ hae da idi vrẹ oma, vovo isigareti, je tho igho rọ dẹ eware nana. Me tube tho ifiare oni ologbo mẹ. Ogbaẹmo egọmeti u viẹro ku omẹ wọhọ omọvo otu ugbarugba nọ a re se New People’s Army (NPA), yọ ẹsibuobu a jẹ hai kpe omẹ ukpe ẹsọ. Onana o soriẹ ze nọ me ro dhugbe kuomagbe utu ugbarugba na. Ikpe isoi me lele ogbaẹmo utu ugbarugba na jẹ rria obọ igbehru. Uzuazọ o jọ bẹbẹ gaga. Ẹsikpobi ma jẹ hae dhẹ no oria ruọ oria fiki ozọ ogbaẹmo egọmeti. Uwhremu na, ẹdhẹ-dhere evaọ obọ igbehru na o tẹ te bẹ omẹ no, mẹ ọvo mẹ tẹ rọ oma mẹ bru osu ubrotọ Ilocos Norte. Ọ rẹrote omẹ ziezi, je tube fi obọ họ gwọlọ emamọ iruo kẹ omẹ nọ me je ru. Dede na, mẹ gbẹ ruabọhọ uruemu uyoma mẹ nọ mẹ jẹ hae rọ ruọ iwou ahwo tho eware je ru ozọ mu ahwo.

EPANỌ EBAIBOL NA O RO NWENE UZUAZỌ MẸ: Aye jọ nọ a re se Loida nọ ma gbe je ru iruo evaọ oria ovona ọ jọ omọvo Isẹri Jihova. O dhesẹ omẹ kẹ ọzae jọ evaọ egagọ rai nọ a re se Jovencio, ọzae na o te mu Ebaibol họ ewuhrẹ kugbe omẹ. Rekọ o jọ bẹbẹ re me nwene uzuazọ nọ me je yeri. Taure oke nọ ma fihọ kẹ obe-uwuhrẹ Ebaibol mẹ u te ti te, mẹ jẹ hai vovo isigareti no taure Jovencio ọ tẹ te nya ze, yọ mẹ ruabọhọ iruẹru nọ e wọso izi egọmeti. Uwhremu na, iporisi a te mu omẹ fiki uzi jọ nọ mẹ thọ, mẹ tẹ jọ uwou-odi emerae ikpegbọvo. Evaọ oke yena, mẹ lẹ se Jihova kẹ obufihọ. Mẹ yare nọ ọ rọvrẹ omẹ, re ẹzi ọfuafo riẹ ọ kpọ omẹ jẹ kẹ omẹ ẹgba.

Omoke jọ o vrẹ no, omọvo Isẹri Jihova jọ o te bru omẹ ziọ uwou-odi na jẹ kẹ omẹ Ebaibol. Me te se Ebaibol na jẹ ruẹ nọ Jihova o wo ohrọ, uyoyou, gbe erọvrẹ. Me te ti vuhumu inọ Jihova o wo ohrọ kẹ omẹ, jẹ kẹ omẹ uvẹ no nọ me re ro wuhrẹ kpahe idhere riẹ. Mẹ tẹ yare iẹe nọ ọ kẹ omẹ ẹgba nọ me re ro si obọ no iruemu iyoma mẹ. Oware nọ me se evaọ Itẹ 27:11 u  duobọte omẹ udu. Me rri ikere yena wọhọ ẹsenọ Jihova ọ be ta ẹme kẹ omẹ dẹẹ. Etẹe ikere na ọ ta nọ: “Ọmọzae mẹ, wo areghẹ, re who ru omẹ eva were, re mẹ sae kẹ ọnọ ọ poviẹ omẹ uyo.”

Nọ me no uwou-odi ze, mẹ tẹ ruabọhọ uwuhrẹ Ebaibol mẹ kugbe Isẹri Jihova, mu iwuhrẹ rai họ ekpohọ, je mu ehri-izi Ebaibol họ efihiruo evaọ uzuazọ mẹ. Uwhremu na, avọ obufihọ Jihova, me te si obọ no iruemu iyoma kpobi nọ me je ru. Kẹsena mẹ tẹ rọ oma mudhe kẹ Jihova Ọghẹnẹ.

IRERE NỌ ME WO NO: Ghelọ ekpehre uzuazọ nọ me yeri evaọ oke nọ u kpemu, enẹna mẹ be wereva. Dedenọ mẹ jọ igbo iruemu iyoma, enẹna me zihe ruọ ohwo ọkpokpọ no. (Ahwo Kọlọsi 3:9, 10) Nẹnẹ, me wo uvẹ-ọghọ nọ me bi ro kuomagbe idibo Jihova nọ e rrọ fuafo, je bi fi obọ họ kẹ amọfa wuhrẹ kpahe Jihova, Ọghẹnẹ Erumeru mai na.

“Mẹ jẹ gwọlọ dikihẹ kẹ Brazil.”—JULIANA APARECIDA SANTANA ESCUDEIRO

IKPE RIẸ: 31

ORẸWHO RIẸ: BRAZIL

IKU RIẸ: ỌGBA EKARETI

UZUAZỌ MẸ EVAỌ OKE NỌ U KPEMU: Ẹwho nọ a re se Londrina mẹ jọ whẹro. Dede nọ ahwo ẹwho na buobu a jọ iyogbere, ẹkwotọ na ọ jọ fuafo, jẹ kare ozighi. Nọ mẹ jọ ikpe-ikpe, oniọvo-ọmọzae mẹ ọrọ ọkpako ọ tẹ ta udu họ omẹ awọ inọ me ku oma gbei evaọ arozaha ekareti nọ a re se tae kwon do, onọ otofa riẹ o rrọ “oghẹrẹ nọ a rẹ rọ abọ gb’awọ ru iruo.” Arozaha nana nọ me je wuhrẹ na o were ọsẹ mẹ hẹ, rekọ ọ kẹ omẹ uvẹ uwhremu na.

Me wuhrẹ ga te epanọ mẹ rọ kparobọ evaọ ohọre tae kwon do ẹsibuobu evaọ ubrotọ Parana. Mẹ kparobọ evaọ usu egba orẹwho mai ẹsibuobu, evaọ 1993, a te whowho omẹ wọhọ ọgba tae kwon do evaọ Brazil soso. O jọ isiuru mẹ re mẹ nyai w’obọ evaọ ohọre nana kugbe ahwo erẹwho efa sa-sa. Dede na, uviuwou oyogbere me no ze, ugho o jariẹ nọ mẹ sae rọ fa oma kpohọ orẹwho ofa ha.

Me te je rẹro inọ dodokọ a re fi tae kwon do ba arozaha Olympic, yọ ere o ginẹ via uwhremu na. Mẹ jẹ gwọlọ dikihẹ kẹ Brazil evaọ Arozaha Olympic, fikiere me te je wuhrẹ oma mẹ gaga je wo ahwo nọ a rọ igho fi obọ họ kẹ omẹ nọ u ru nọ mẹ sai ro kpohọ France, Vietnam, South Korea, gbe Japan kẹ ohọre ekareti na, je w’obọ evaọ South America Games. Utee ofa nọ me je le họ, epanọ me re ro w’obọ evaọ Pan American Games, me te je wuhrẹ ziezi te epanọ mẹ rọ jọ usu imasa nọ a salọ re a kpohọ ohọre na evaọ Santo Domingo, Dominican Republic, evaọ 2003.

EPANỌ EBAIBOL NA O RO NWENE UZUAZỌ MẸ: Evaọ 2001, Isẹri Jihova a tẹ ta usiuwoma kẹ omẹ avọ ọmọzae nọ ọ jọ ọse mẹ, je mu uwuhrẹ Ebaibol họ kugbe omai. Me wo ajọwha kẹ uwuhrẹ na oke ọsosuọ họ. Fikinọ oma o jẹ hae rrọ omẹ no ẹsibuobu, owezẹ o jẹ hai su omẹ evaọ etoke uwuhrẹ na, mẹ jẹ sae gaviezọ ziezi hi. O make jọ ere na, umutho eware nọ me je wuhrẹ i je te omẹ udu—yọ onana u dhesẹ oma via okenọ me kpohọ ohọre kugbe egba ekareti efa.

Fikinọ a salọ omẹ fihọ utu imasa nọ e te nyai wobọ evaọ Pan America Games na, ahwo nọ a je  wuhrẹ omai a te ru ọruẹrẹfihotọ re me wobọ evaọ ohọre oma-oruẹrẹkpahe kẹ uzedhe ohọre na. Nọ oke nọ mẹ rẹ rọ họre u te, me te dikihẹ oria ovo kpoko—ababọ ajọwha nọ mẹ rẹ rọ kpare obọ hayo owọ. Mẹ kareghẹhọ ẹsiẹvo inọ u fo re Oleleikristi ọ họre amọfa ha—makọ evaọ arozaha dede! Uzi Ebaibol nọ o ta nọ “you omọfa epanọ who you oma ra” na o ziọ omẹ iroro. (Matiu 19:19) Me te ku oma rẹriẹ nya no afe-ughe na ababọ eroro sọ mẹ te vioja owojẹ nana ode notha. Ahwo a te bi rri omẹ ọvo, avọ akpọ nọ o gbe rai unu.

Nọ me te uwou, mẹ tẹ keria totọ bi roro kpahe oware nọ mẹ te rọ uzuazọ mẹ ru. Me te gbobọhọ ibroshọ jọ nọ Isẹri Jihova a kere, onọ o ta kpahe oware nọ Ọghẹnẹ ọ gwọlọ mi omai. Mẹ jọ eva riẹ ruẹ oria nọ a jọ fodẹ Olezi 11:5, onọ o ta kpahe Jihova nọ: “Ẹzi riẹ o mukpahe ọnọ o you igbruku.” Eme yena i duobọte omẹ udu, mẹ tẹ gbaemu nọ me re si obọ no ohọre tae kwon do na.

Eva e were ahwo nọ a je wuhrẹ omẹ ohọre tae kwon do na ha. A jẹ daoma ru omẹ nwene iroro mẹ, be ta kẹ omẹ nọ mẹ họ ọgba nọ ọ karo evaọ orẹwho na yọ o joma te epanọ me ti ro kpohọ ohọre Olympic na no. Rekọ mẹ gba riẹ mu no evaọ udu mẹ.

Oke yena yọ mẹ avọ ọmọzae nọ ọ jọ ọse mẹ na ma ruọ orọo no. O te mu oma họ ekugbe Isẹri na evaọ usiuwoma ota. Eva e rẹ were iẹe gaga nọ o te no usiuwoma ota ze, ọ vẹ be vuẹ omẹ epanọ o ro lele ahwo ta ẹme. Mẹ riẹ nọ mẹ tẹ gwọlọ reawere uvẹ usiuwoma ota na, me re ru inwene evaọ uzuazọ mẹ. Me no egagọ nọ mẹ jọ vẹre, je ru inwene efa te epanọ mẹ rọ họ-ame wọhọ omọvo Isẹri Jihova.

IRERE NỌ ME WO NO: Mẹ avọ ọzae mẹ ma wo evawere je wo okugbe keme ma be daoma fi izi Ebaibol họ iruo evaọ orọo mai. O be kẹ omẹ evawere nọ mẹ be rọ thae uke nọ ọ be rẹrote ewha-iruo nọ o wo evaọ ukoko nọ ma rrọ. Mẹ hẹ sae họre gaga re me wo okẹ igoru nọ a rẹ kẹ ohwo nọ ọ kparobọ je zihe ruọ ohwo nọ ọ viodẹ. Rekọ mẹ riẹ nọ u wo uvumọ oware he nọ akpọ nana nọ ọ vọ avọ okienyẹ na ọ rẹ kẹ nọ u te uvẹ-ọghọ orọ Jihova Ọghẹnẹ nọ a rẹ gọ.

“Ọsẹ mẹ ọ kpairoro vrẹ omẹ hẹ inọ mẹ gbẹ te sai nwene he.”—INGO ZIMMERMANN

IKPE RIẸ: 44

ORẸWHO RIẸ: GERMANY

IKU RIẸ: OROIRO EVAỌ ORIA ILE-IGBE

UZUAZỌ MẸ EVAỌ OKE NỌ U KPEMU: A yẹ omẹ evaọ ẹwho nọ a re se Gelsenkirchen nọ a rẹ jọ tọ ikolu n’otọ ze, yọ ọsẹgboni mẹ a jọ egagọ evona ha. Ọsẹ mẹ ọ jọ omọvo Isẹri Jihova. Rekọ oni mẹ ọ jẹ wọso ẹe fikinọ ọ jẹ rehọ iwuhrẹ egagọ riẹ wuhrẹ omẹ, oniọvo-ọmọzae mẹ gbe inievo-emetẹ ivẹ mẹ. Ọsẹ mẹ o je ru iruo omoto ologbo ọdhẹ, yọ iruo na e jẹ hae rehọ iẹe euwa ikpe hayo viere kẹdẹ kẹdẹ. Ẹsibuobu ighọjọ ivẹ hayo esa udevie aso ọ jẹ hae rọ riọ kpohọ iruo. Ghele na, ẹsikpobi ọ jẹ hae rẹrote ẹgwọlọ abọ-ẹzi mai. Dede na, me se omodawọ riẹ na gb’oware he.

Nọ mẹ jọ ikpe 15, iwuhrẹ ukoko nọ ọsẹ mai ọ jẹ hae wha omai kpohọ e tẹ te bẹ omẹ no, mẹ tẹ jẹ wọso ẹe. Nọ ukpe ovo o vrẹ no, me te kuomagbe utu ahwo nọ a rẹ bọo-ego. Ikpe ivẹ nọ i lele i rie, uruemu mẹ u te yoma te epanọ u ro fi ọsẹ mẹ họ awa. Nọ me te ikpe 18 no, mẹ tẹ kwa no uwou.

Arozaha oma uru-jaja u si omẹ urru gaga te epanọ  me je ro wuhrẹ isia ezeza k’oka k’oka—ebọgo etehe me re ro muhọ, kẹsena mẹ vẹ wọ eware egbẹgbẹdẹ. Evaọ urere-oka, mẹ avọ egbẹnyusu mẹ ma jẹ hai kpohọ eria ile-igbe ẹsibuobu. Evaọ orọ ẹdẹjọ, mẹ avọ ọzae jọ nọ ovao riẹ u re muozọ gaga ma te je sikẹ nọ u fou omai họ ohọre, rekọ o te omẹ ro wurie unu hu, me kpe rie ukpe ẹsọ. Ohwo nọ o wuzou oria ile-igbe na ọ ruẹ epanọ mẹ goma te, o raha oke he ọ tẹ kẹ omẹ iruo inọ mẹ hai rroro oria ile-igbe na. Ọ ta nọ ọ te hwa omẹ emamọ osa, fikiere mẹ tẹ jẹ iruo na rehọ.

Urere oka kpobi, mẹ jẹ hai dikihẹ unuẹthẹ nọ a rẹ rọ ruọ oria ile-igbe na, yọ ohwo nọ mẹ kuvẹ ọvo ọ rẹ rueva. Ahwo nọ a jẹ hae ziọ oria ile-igbe na aso ọvo a jẹ hai te odu ọvo (1,000), fikiere o jẹ hai wo eriosehọ kẹ omẹ hẹ. Ẹsibuobu ohọre o jẹ hai du lahwe. A jẹ hae rọ igbeke gbe ilolo nọ a kpe guegue omẹ. Ahwo jọ nọ mẹ se kẹ inọ a rueva ha hayo otu nọ me le ruọ otafe a jẹ hae jọ otafe hẹrẹ omẹ re a ruẹsi ru omẹ kele. Oke yena yọ mẹ jọ ikpe 20, yọ me je roro nọ uvumọ ohwo ọ rẹ sai fi omẹ kparobọ họ. Rekọ uzẹme riẹ họ, mẹ jọ ọmọ nọ ọ bẹ esuo—me wo okpofu, omorro, okpiroro, gbe udu-ogaga.

EPANỌ EBAIBOL NA O RO NWENE UZUAZỌ MẸ: Ọsẹ mẹ ọ kpairoro vrẹ omẹ hẹ inọ mẹ gbẹ te sai nwene he. O ru ọruẹrẹfihotọ nọ a je ro vi emagazini Uwou-Eroro Na gbe Awake! * se omẹ evaọ obonọ mẹ jẹ rria. I kpehru n’oto duwu ehru evaọ ubrukpẹ mẹ—ababọ ese nọ me je se ai. Rekọ ẹdẹjọ mẹ tẹ ta inọ jọ mẹ fake dao rri ejọ rai. Izoẹme nọ me se kpahe epanọ egọmeti gbe egagọ akpọ na gbe uyero ekọ inẹnẹ na i ti ro kuhọ i duobọte omẹ udu te epanọ mẹ rọ tọlọ ifonu se oniọvo-ọmọtẹ mẹ. Tei te ọzae riẹ yọ Isẹri Jihova. A tẹ ta nọ a re ru uwuhrẹ Ebaibol kugbe omẹ, mẹ tẹ rọwo.

Ehri-uzi nọ o rrọ obe Ahwo Galesha 6:7 o wọ omẹ nọ me ro ru inwene evaọ uzuazọ mẹ. Rono eware nọ e via kẹ omẹ no ze, mẹ riẹ inọ oware kpobi nọ me ru, ta, hayo jiroro riẹ nẹnẹ u re ti kpomahọ uzuazọ mẹ odẹnotha. Uzizie nọ o rrọ obe Aizaya 1:18 o ta udu họ omẹ awọ gaga re, onọ o ta nọ: “Wha nyaze, ma jẹ iroro kugbe, enẹ ỌNOWO na ọ tae: dede nọ izieraha rai e ware wọhọ azẹ, e rẹ te fo wọhọ ukpoiwo.” No emuhọ uwuhrẹ Ebaibol mẹ ze, oria ikere yena u fi obọ họ kẹ omẹ whaha iroro me-fioka-ha hayo inọ mẹ sai gbe si obọ no idhere iyoma mẹ hẹ.

Evaọ oware wọhọ emerae ezeza, me ru inwene ilogbo evaọ uzuazọ mẹ, dede na o jọ bẹbẹ kẹ omẹ. O gwọlọ nọ me re si oma no eria nọ ogbekuo ọ dafia gbe ikpehre usu nọ mẹ jẹ nya. Fikiere me te mu egbẹnyusu mẹ họ ẹvuẹ inọ me mu Ebaibol họ ewuhrẹ no jẹ vuẹ ae eware nọ me je wuhrẹ. A te je si oma no omẹ je bi se omẹ ukọ-Ọghẹnẹ. Oniọvo-ọmọtẹ mẹ o fi obọ họ kẹ omẹ gwọlọ emamọ iruo efa.

Me te je mu iwuhrẹ ukoko họ ekpohọ evaọ obọ Ọgwa Uvie nọ oniọvo-ọmọtẹ mẹ avọ ọzae riẹ a jẹ hai kpohọ, dede nọ o rehọ emaele 19 thabọ no oria nọ mẹ jẹ rria. Ọgwa Uvie ọ kẹle oria nọ mẹ jọ, rekọ udu u je bru omẹ inọ ẹsejọhọ mẹ te jọ etẹe ruẹ ahwo nọ a riẹ omẹ no emaha ze. Ozọ nọ me ti ro kpohọ usiuwoma ota nuwou ruọ uwou evaọ oria nọ mẹ jẹ rria u je mu omẹ re. Enọ jọ nọ e jẹ hae ziọ omẹ iroro họ, Kinọ mẹ tẹ nyaku ohwo jọ nọ me le no oria arozaha ile-igbe na kẹle, hayo ohwo jọ nọ mẹ kẹ imu egaga no ẹdẹjọ? Dede na, mẹ kareghẹhọ oware jọ nọ me wuhrẹ no arozaha oma uru-jaja mẹ ze—eghẹrẹ arozaha oma uru-jaja nọ e rẹ mae bẹ họ enọ e mai wuzou kpaobọ. Fikiere nọ mẹ nwani te ohwo nọ o re kpohọ usiuwoma ota no, me te mu usiuwoma họ ẹta te epanọ o rẹ lọhọ te kpobi.

Use-abọ ofa jọ o jariẹ nọ mẹ rẹriẹ ovao dhe—me wo isiuru kẹ obe-uwuhrẹ hayo isase he. Rekọ mẹ riẹ inọ mẹ tẹ gwọlọ wo ẹrọwọ ọgaga, o gwọlọ nọ mẹ rẹ ta họ oma mẹ obọ kiẹ uzẹme Ebaibol na didi. Mẹ ruẹ vuhumu inọ o gwọlọ omodawọ mi ohwo nọ ọ tẹ gwọlọ wo ẹgba, wọhọ epanọ o rẹ jọ evaọ arozaha oma uru-jaja orọ eware egbẹgbẹdẹ ewọ na.

IRERE NỌ ME WO NO: Mẹ gbẹ rrọ uzuazọ! O gbẹ gwọlọ omodawọ ẹsikpobi mi omẹ re mẹ seba ekie kẹ omoyẹlẹ iwo mẹ. Rekọ enẹna, mẹ avọ aye mẹ nọ o wo uvi iruemu Oleleikristi ma be reawere uzuazọ uviuwou mai. Mẹ jọ udevie Isẹri Jihova wo uvi egbẹnyusu nọ mẹ rẹ sai fi eva họ riẹriẹriẹ. Ọsẹ mẹ o whu ikpe isoi nọ i kpemu, rekọ taure o te ti whu o wo evawere nọ o ro dede ọmọzae riẹ zihe ze.

[Oruvẹ-obotọ]