Bayibolu Yahimpaña Yihandilu Yawantu

CHUMANYI chaletesheli mushidika wadikañili nawa ikombi kuhimpa chihandilu chindi? Muloñadi muntu wakuluka yitembi mukuzuña kalati chahimpililiyi yikonkwanyi yindi? Wulokwinyi watambwililiyi tata yawantu hamuloña wakumukuhwelela mwanindi? Tañenu iyi nsañu kulonda muwani ñakwilu.

“Hela chakwila chihandilu chami chakunyima chadiña chatama, ichi nidi namuzañalu.”—GARRY P. AMBROCIO

YAAKA: 47

ITUÑA KWAFUMAYI: PHILIPPINES

KUHANDA KWINDI: MUSHIDIKA WADIKAÑILI

CHIHANDILU CHAMI CHAKUNYIMA: Nakulilili mumbaka yanyanya yaVintar. Muchinekineki mutwashakamineña mwadiña mwamuwahi nawa kunsa kwanyeñumukili jimpidi, mwadiña tuloña twatuwahi, nimpepela yawunda. Hela chakwila, idi iluña mutwashakamineña dadiña dadiwahi, chihandilu chadiña chakala. Antu eyileña yimuna yetu, nikutwiyila yuma mwitala.

Hinachidiñi kampululu, nanwineña walwa nankashi nawamabwambu jami nikunwa makanya, nikwiya mali akulanda nachu yuma yinakeñeleña. Namwiyilili ninkaka wamumbanda yingelingeli yindi. Amashidika afwikijileña nawu nadiñi mwizanvu dadikañili dateneneñawu nawu New People’s Army (NPA) nawa añenteleña chatama. Muloña wakunmwesha kañalaña kudi amashidika, nafukwiluhu kudibomba nezanvu dadikañili. Nashakamini mujimpidi hamu nawamashidika aNPA, hadi yaaka yitanu. Chihandilu chadiña chakala. Mpinji yejima twadiña nakutemoka amashidika. Nkumininaku nazeyeli nakuswamujoka mujimpidi, nadilubwili kudi nguvulu wakuIlocos Norte. Watambwilili chachiwahi nawa wankwashiluku kuwana mudimu wawuwahi. Hela chochu, natwalekeluhu nayililu yami yatama, yakubuwa mumatala awantu nikuyichinisha.

BAYIBOLU CHIYAHIMPILI CHIHANDILU CHAMI: Kumudimu kunazatileña kwadiña mumbanda wejina daLoida Chinsahu chaYehova. Diyi waletesheli tudiluki naJovencio, nawa watachikili kundizisha Bayibolu. Ilaña dinu chankalilili kuhimpa yililu yami. Nadiña nakunwa makanya henohu Jovencio kanda yenzi nakundizisha Bayibolu, nelileña yuma yakaanishawu munshimbi. Kutwala muna, akapokola ankwantili muloña nafumpili nshimbi, nawa ankasili mukaleya hadi tukweji 11. Hampinji yankasiluwu, nalombeleña kudi Yehova nakumulembelela nami yankwashi. Nalombeli nami yañanakeni nawa nami yanyinki spiritu yindi yilomboli nikukolesha.

Ifuku dimu, Chinsahu chaYehova wanhempwili mukaleya nawa wanyikeli Bayibolu. Chinatañili muBayibolu nadizili nami Yehova wukweti luwi nikukeña nawa wanakenaña nshidi. Nelukili nami Yehova wantiyilaña luwi nawa nanyinki kukooleka kwakumwiluka. Nalombeli nami yanyinki ñovu yakuleka yililu yami yatama. Nsañu yinadizili hamukanda waYishimu 27:11 yanshikili hamuchima. Namweni iyi vasi  neyi kwiji Yehova nakuhosha nanami. Iyi vasi yahosha nawu: “Eyi mwanami, ikalaku mukwamaana, wutiyishaña muchima wami kuwaha, kulonda nakatweshi kwakula muntu wukunsawula.”

Chinafumini mukaleya, natachikili cheñi kudiza Bayibolu nawaYinsahu, natachikili kupompa nawu, nawa natachikili kuzatisha nshimbi jamuBayibolu muchihandilu chami. Nkumininaku, Yehova wakwashili, nalekeli yililu yami yatama. Dichi nadihanini kudi Yehova Nzambi.

CHINAHETELUMU: Hela chakwila chihandilu chami chakunyima chadiña chatama, ichi nidi namuzañalu. Hela nadiñi nduñu hamuloña wakudiñija munyidimu yatama, ichi navwali dehi wuntu wawuha. (Akolose 3:9, 10) Makonu, natiyaña kuwaha kudikunda nawantu jaYehova awunyonji nikukwasha amakwawu kudiza hadi Yehova Nzambi yetu watwesha yejima.

“Nakeñeleña kwimenaku ituña daBrazil.”—JULIANA APARECIDA SANTANA ESCUDEIRO

YAAKA: 31

ITUÑA KWAFUMAYI: BRAZIL

KUHANDA KWINDI: WAKULUKILI YITEMBI MUKUZUÑA KALATI

CHIHANDILU CHAMI CHAKUNYIMA: Nakulilili munkambi yaLondrina. Hela chakwila, antu amavulu munidi iluña adiña atuzweñi, munkambi mwenimu mwadiña mwawunyoji nawa mwawunda. Chinadiña nayaaka ikumi yakuvwalika, yayami weyala walejeli nindi yandizisheña chisela chakuzuña kalati chatenañawu nawu tae kwon do chayamukwila nawu “kuzatisha makasa ninyendu.” Atata akaanini nawu hinateli kudiza ichi chiselaku, nkumininaku etejeli.

Nelukili chikupu chisela chatae kwon do, nahitili mukuzuña kwakuvula nawa yami nadiña wakuluka yitembi mumusumba waParana. Nkumininaku nashindili mukuzuña kwetuña dejima, nawa muchaaka cha 1993, nayili mpuhu muchisela chatae kwon do mwituña daBrazil. Nakeñeleña kuzuña mukudibecha kwamukaayi kejima. Hela chochu, chisaka chami chadiña chahutwa nawa akañenyi kunfwetela mali akwendela.

Nafwilileña nami chisela chatae kwon do chikekali Muyisela yakudibecha, nawa chumichi chamwekeni. Nakeñeleña kwimenaku ituña daBrazil muYisela Yakudibecha, dichi nadizili nankashi nawa anyinkeli mali akwendela hakuya kuyisela yakudibecha yadiña kwituña daFrance, Vietnam, South Korea, Japan, niyisela yadiñi kuSouth America. Nemikili cheñi chikonkwanyi chakudibecha muyisela yadiñi mwituña daAmerica, nawa nazatili chiwahi chakwila atondeli kwikala hakachi kawantu asatu atondeluwu kudibecha muchisela chadiñi muMusumba waSanto Domingo, muchaaka cha 2003.

BAYIBOLU CHIYAHIMPILI CHIHANDILU CHAMI: Muchaaka cha 2001, twadibulakeni nawaYinsahu jaYehova nawa atachikili kutudizisha Bayibolu hamu nakajila kami. Hakusambila, hinashileñaku muchimaku. Natiyileña kuzeya mpinji yejima nawa nanooñokeleña hakudiza. Hela chochu, yuma yinadizileña yanshikili hamuchima, chumichi chamwekeneni hakudibecha kweneni kwalondeleluhu.

Muloña wakwila antondeli kuya nakudibecha muyisela yadiñi kwituña daAmerica, akulumpi  achisela chatae kwon do akeñeleña nikali watachi muchisela chakudibecha. Chashikili mpinji yami yakuzuña, nemeni nzo-o, hinadiña nachizaku chakuzuñaku. Chakadi kumba mpinji, nanukili nami mukwaKristu hatela kuzuña nawakwawuku, hela tuhu muyisela. Nanukili kufumba kwaBayibolu kwakwila nawu, “keñaku mukwenu neyi chiwadikeña eyi aweni.” (Matewu 19:19) Nedikilumu chakadi kuzuña nawa hinaditoñesheluku. Antu ahayamini nankashi.

Chinashikili kwitala, nashakamini nakutoñojoka chuma chinatela kwila muchihandilu chami. Nanoneli buloshuwa yasonekawu kudi aYinsahu yahosha hachuma chakeñañayi Nzambi kudi etu. Muniyi buloshuwa nawaninumu nsona yaMasamu 11:5 yahosha hadi Yehova nawu: ‘Muchima windi wahela . . muntu wakeña madombu.’ Awa mazu anshikili hamuchima nawa nafuukwiluhu kuleka chisela chatae kwon do.

Akulumpi achisela chatae kwon do ahilili. Esekeli kundimbeka nawu nihimpi yitoñojoka yami kuhitila mukuleja nawu mwituña detu yami nadiñi wabadika ejima nawa kwashili hohu kwantesha nakuhema muYisela Yakudibecha. Ilaña nadiñi nahimpa dehi yitoñojoka yami.

Iyi mpinji, twadiña twadisumbula dehi nakajila kami. Wadiña watachika dehi kuya mumudimu wakushimwina nawaYinsahu. Hakufunta kwitala wazañaleleña nankashi nawa wanlejeleña yuma yejima yahanjekawu nawantu. Nelukili nami hakwila nitachiki kuzata iwu mudimu, natela kuhimpa chihandilu chami. Nafumini munsakililu munayileña hatachi, nkumininaku nekalili Chinsahu wapapatishewa.

CHINAHETELUMU: Ami namfumwami twekala anuñañana nankashi nawa twekala namuzañalu muloña twazatishaña nshimbi jamuBayibolu mumaluwi etu. Natiyaña kuwaha kumukwashaku hampinji yazatañayi nyidimu yamuchipompelu. Nadi kuyanda chikupu hakwila nawu nitambuli palata yawuru (gold medal) nikuya mpuhu. Ilaña neluka nami kanu kaayi katama hikanateli kunyinka chuma chikwesekana nakukooleka kwakumukalakela Yehova Nzambuku.

“Tata yami halekeli kunkwashaku.”—INGO ZIMMERMANN

YAAKA: 44

ITUÑA KWAFUMAYI: GERMANY

KUHANDA KWINDI: KALAMA WAKWITALA DAKUNWINA WALWA NIKUHAÑANA

CHIHANDILU CHAMI CHAKUNYIMA: Navwalikilili muchisaka chadiñi chambuka munsakililu mumbaka mwekala mumugoti wamakala muGelsenkirchen. Atata adiña aChinsahu chaYehova. Amama adiña nakuyidimbulula atata hampinji yatudizishileñawu wejima wetu, ami niyaya weyala nianyikijami awambanda ayedi nshimbi jamunsakililu yawu. Azatileña mudimu wakwendesha nyotoka yamaneni hadi maora ikumi hela kubadikahu ifuku dimu. Kakavulu atachikileña kuzata nampinji ya 2 koloku hela 3 koloku yabudidi. Hela chochu, atata azatileña nañovu kulonda atukwashi twikali nawulunda naNzambi. Ami kwami hinashiluku muchimaku.

Chinashikijili yaaka 15, natiyileña wuudi kuya nakupompa kunsakililu kutwayileña nakupompa nawa nadikañili. Chimwahitili chaaka chimu, nadibombeli nezanvu dawakwakwasa jinkonyi. Hadi yaaka yiyedi, nakoñeleña yuma yatama yaleñeleli atata kwakamena. Chinashikijili yaaka 18 nafumini hetala.

 Neñijili mutu muyisela nawa nadizileña kapampa katanu nakamu mumulungu, natachikileña kwasa jinkonyi kuhiñahu kunyamuna yikuñu yalema. Kunsa yamulungu, twayileña nakuhañana mumatala akunwina walwa nawamabwambu jami. Ifuku dimu, twazuñili namuntu wenjili kwitala dakuhañena wamwekeneña wubanji, ilaña namweteli chakubula nikumba mpinji. Mwini itala dakunwina walwa chamweniyi namweti dehi ona muntu, wañiñijili mudimu wawukalama kwitala dakunwina walwa nikuhanaña. Wanlejeli nindi wukunfwetaña mali amavulu, dichi netejeli kuzata iwu mudimu.

Kunsa yamulungu wudi wejima, nemeneña hachisu chetala dakunwina kulonda nitalaña antu atela kwiñila niakubula kwiñila. Mwitala dakunwina mweñilileña antu akushika ku 1,000 dichi nadiña nanyidimu yayivulu. Antu avulileña kuzuña. Anchinishileña namata nijinchumpa jabaloka. Antu inakaanishileña kwiñila hela inahañileña mwitala dakunwina ambelemeneneña nawu añeti. Nadiña nayaaka 20 nawa natoñojokeleña nami kwosi watela kuñeta. Hela chochu, hinatiyileñaku, nadiñi wazuwa, wadinka wanta, wadikita, nawa wachinchika.

BAYIBOLU CHIYAHIMPILI CHIHANDILU CHAMI: Tata yami halekeli kunkwashaku. Adiña nakutemeshela Kaposhi Kakutalila niAwake! * kunashakamineña. Hinadiña nakuyitañaku, yalumbamineña mwitala. Ifuku dimu nafukwiluhu kutaña mumagazini amakwawu. Yibaaba yinatañili yadiña nakuhosha chakakuma kaayi kamakonu mudi, jipolitiki, maheta, ninsakililu yanletesheli nimutemesheli muhelami nshiña. Yena hamu nimfumwindi adiña aYinsahu jaYehova. Anlejeli nawu adizisheña Bayibolu nawa netejeli.

Nshimbi jasonekawu haAŋalija 6:7 yansañumwini kuhimpa chihandilu chami. Nadizililili kuyuma yinahitilumu nami chuma chinukukoña, chinukuhosha hela chinukufuukula lelu, chikuleñela chihandilu chami chakumbidi chikekali chachiwahi hela chatama. Chuma chikwawu chankolesheli himutambi wekala haIsaya 1:18, hahoshayi Yehova nindi: “Inzenu tutiyañanenu hela neyi nshidi jenu jichinana, jakatooka to-o neyi mpeza.” Iwu mukanda wankwashili kufuma tuhu hampinji yinatachikili kudiza Bayibolu kubula kutoñojoka nami hinashikilamoku hela nami hinatelela kufunta cheñi kudi Yehovaku.

Mutukweji tutanu nakamu hohu, nahimpili chihandilu chami, ilaña dinu nakabakeni. Nateleleli kuleka chihandilu chatama niantu amukunkulwayi inadikundili nawu. Dichi natachikili kuleja amabwambu jami nami inakudiza Bayibolu nawa nayilejeleña nsañu yinadizileña. Anheleli nakutachika kuntena nawu kapristu. Muhelami wakwashiluku kuwana mudimu wawuwahi.

Natachikili kuya kukupompa Hetala daWanta hapompeleleña muhelami ninfumwindi, hela chakwila hadiña makilomita 30. Kwadiñi Itala daWanta kwakwihi netala dami, ilaña natiyileña woma kudimona nawantu inelukili kufuma kuwansi. Natiyileña woma wakuya nakushimwina kwitala nikwitala mwiluña munashakamineña. Nadihwileña nami, indi neyi niwana muntu wunahañili mwitala dakunwina hela muntu inenkeli yitumbu yashetana nikwila ñahi? Hela chochu, nazatishili lushimbi lunadizili hakukolesha mujimba, lwakwila nawu yuma yamwekanaña neyi yakala diyakeñekaña hakukolesha mujimba. Dichi chinekalili mukwakushimwina, nashimwinineña hakumina ñovu jami.

Nadiña nakukala kukwawu kunateleleli kumanisha, hinakeñeleña kutaña hela kudizaku. Ilaña nelukili nami neyi inakukeña kukolesha chikuhwelelu, natela kushaku kashinshi kulonda nidizeña yuma yakunama yekala muBayibolu. Nelukili nami, kunyamuna yikuñu yalema kwakeñekaña kukola, dichi nateleli kuzata nañovu hakwila nawu nikali nañovu yakudiza.

CHINAHETELUMU: Nichidi wamumi. Niyinu mpinji natela kwikala wasoñama kulonda kuzeyazeya kwami kubuli kufuntisha hanyima. Ilaña nazañalalaña muchihandilu chami, chineli nindi namumbanda wukweti yililu yayiwahi yawakwaKristu. Nikweti amabwambu alala inatela kukuhwelela chikupu, hakachi kawaYinsahu jaYehova. Munahiti dehi yaaka yitanu kufuma hafwiluwu atata, ilaña henohu kanda afwi azañaleli hakwiluka nawu mwanawu nadizi chalala.

[Tumazu twaheshina]