Bibele Yi Hundzula Vutomi Bya Vanhu

I YINI lexi susumeteleke khale ka socha leri xandzukeke tlhelo khamba leswaku ri cinca vutomi bya rona? I yini lexi pfuneke mutlangi wa karati la nga ni vutshila leswaku a cinca tipakani takwe? Xana jaha rin’wana ri vuyeriwe njhani hikwalaho ka ripfumelo ra tata wa rona? Hlaya hi vutomi bya vona leswaku u kuma tinhlamulo ta swivutiso leswi.

“Ku Nga Khathariseki Mahanyelo Ya Mina Ya Khale, Sweswi Ndzi Tsakile.”—GARRY P. AMBROCIO

MALEMBE: 47

TIKO: PHILIPPINES

MATIMU YAKWE: SOCHA LERI XANDZUKEKE

VUTOMI BYA MINA: Ndzi kulele exidorobanini xa Vintar. Doroba rero a ri rhendzeriwe hi tintshava ta rihlaza, milambu leyi nga ni mati lama baseke ni moya wo tenga. Hambileswi a ku rhurile, vutomi a byi tika. Vanhu a va yiva swifuwo swa hina va tlhela va tshova ekaya.

Loko ndza ha ri muntshwa, a ndzi nwa byala ni vanghana va mina, ndzi dzaha fole ni ku yiva mali leswaku ndzi ta kota ku xava swilo leswi. Ndzi kale ndzi yiva ni swin’wetsin’wetsi swa kokwa wa mina wa xisati. Masocha a ma tshamela ku ndzi bukutela hikwalaho ko ehleketa leswaku ndzi wela eka ntlawa lowu vuriwaka New People’s Army (NPA). Leswi swi endle leswaku ndzi hetelela ndzi joyina ntlawa wolowo. Ndzi hete malembe ya ntlhanu ndzi ri karhi ndzi tshama etintshaveni ni ntlawa wolowo. Vutomi a byi tika swinene. A hi tshama hi ri karhi hi baleka masocha. Swi kale swi ndzi karharisa ku hanya hi ku tumbela, hiloko ndzi ya tinyiketa eka ndhuna-nkulu ya le Ilocos Norte. Yi ndzi khome kahle ni ku ndzi pfuna leswaku ndzi kuma ntirho wun’wana. Hambiswiritano, mahanyelo ya mina yo biha a ndzi nga ma tshikanga naswona ndzi ye emahlweni ndzi tshova tiyindlu ni ku chavisa vanhu.

NDLELA LEYI BIBELE YI HUNDZULEKE VUTOMI BYA MI-NA HA YONA: Wansati un’wana loyi a ndzi tirha na yena la vuriwaka Loida a a ri Mbhoni ya Yehovha. U ndzi hlanganise na Jovencio leswaku a dyondza na mina Bibele. Kambe a swi ndzi tikela ku cinca mahanyelo ya mina. Loko Jovencio a nga si fika leswaku hi ta dyondza Bibele, a ndzi rhanga hi ku dzaha naswona a ndza ha tikatsa eka swiendlo leswi nga riki enawini. Ndzi hetelele ndzi khomiwile hikwalaho ko tlula nawu naswona ndzi tshame ekhotsweni tin’hweti ta 11. Hi nkarhi wolowo, ndzi khongele eka Yehovha leswaku a ndzi pfuna. Ndzi kombele leswaku a ndzi rivalela naswona a ndzi chululela moya wakwe lowo kwetsima leswaku wu ndzi kongomisa ni ku ndzi tiyisa.

Hi ku famba ka nkarhi, Mbhoni yin’wana ya Yehovha yi ndzi endzele ekhotsweni kutani yi ndzi nyika Bibele. Loko ndzi yi hlaya ndzi dyondze leswaku Yehovha u ni tintswalo, rirhandzu naswona wa rivalela. Ndzi xiye leswaku Yehovha u ndzi kombe tintswalo naswona u ndzi nyike lunghelo ro dyondza hi yena. Ndzi n’wi kombele leswaku a ndzi nyika matimba yo hlula mikhuva yo biha. Leswi ndzi swi hlayeke eka Swivuriso  27:11 swi ndzi khumbile swinene. Ndzi teke ndzimana yoleyo onge hiloko Yehovha a vulavula na mina hi ku kongoma. Yi ri: “N’wananga, tlhariha u tsakisa mbilu yanga, leswaku ndzi ta angula loyi a ndzi tlhontlhaka.”

Loko ndzi huma ekhotsweni, ndzi ye emahlweni ndzi dyondza Bibele ni Timbhoni, ndzi ya eminhlanganweni ya tona naswona ndzi sungule ku tirhisa leswi Bibele yi swi dyondzisaka. Hikwalaho ka mpfuno wa Yehovha, ndzi swi kotile ku hlula mikhuva yo biha. Endzhaku ka sweswo, ndzi tinyiketele eka Yehovha Xikwembu.

NDLELA LEYI NDZI VUYERIWEKE HA YONA: Ku nga khathariseki mahanyelo ya mina ya khale, sweswi ndzi tsakile. Ndzi tshike mahanyelo ya mina yo biha. (Vakolosa 3:9, 10) Namuntlha ndza tiphina hileswi ndzi tihlanganisaka ni vanhu va Yehovha lava baseke emahanyelweni ni leswi ndzi pfunaka van’wana ku dyondza hi Yehovha, Xikwembu xa matimba hinkwawo.

“A Ndzi Lava Ku Yimela Tiko Ra Brazil.”—JULIANA APARECIDA SANTANA ESCUDEIRO

MALEMBE: 31

TIKO: BRAZIL

MATIMU YAKWE: MUTLANGI WA KARATI

VUTOMI BYA MINA: Ndzi kulele eLondrina. Hambileswi ndhawu leyi a yi ri evuswetini, a yi basile naswona a yi rhurile. Loko ndzi ri ni malembe ya khume, buti wa mina loyi a a ri mutlangi wa karati u ndzi khutaze leswaku ndzi n’wi joyina. Tatana a a nga swi tsakeli kambe hi ku famba ka nkarhi u sungule ku ndzi seketela.

A ndzi tikarhata swinene loko ndzi endla vutiolori naswona ndzi wine swidlodlo swo tala etikweni ra Parana. Hi 1993 ndzi ve nghwazi etikweni hinkwaro ra Brazil. A ndzi lava ku phikizana ni vanhu va le matikweni man’wana. Kambe ndyangu wa ka hina a wu nga ri na mali yo ndzi hakelela leswaku ndzi ya ematikweni wolawo.

A ndzi navela leswaku ntlangu wa karati wu katseka eka Tiolimpiki naswona leswi swi endlekile. Leswi a ndzi lava ku yimela tiko ra Brazil eka Mintlangu ya Tiolimpiki, ndzi tikarhate swinene loko ndzi endla vutiolori naswona ndzi kume vuseketeri bya swa timali lerova ndzi swi kotile ku ya phikizana ni vanhu va le Furwa, Vietnam, Korea Dzonga, Japani ni le Amerika Dzonga. Pakani ya mina a ku ri ku ya nghenela Mintlangu ya Pan American naswona ndzi endle kahle lerova ndzi va un’wana wa vanhu vanharhu lava hlawuriweke ku ya nghenela mintlangu leyi a yi ta khomeriwa eSanto Domingo, le Dominican Republic hi 2003.

NDLELA LEYI BIBELE YI HUNDZULEKE VUTOMI BYA MINA HA YONA: Hi 2001, mina ni jaha ra mina hi hlangane ni Timbhoni ta Yehovha kutani ti sungula ku dyondza na hina Bibele. Eku sunguleni a ndzi nga ri na mhaka na swona. Minkarhi yo tala a ndzi khomiwa hi vurhongo loko hi ri karhi hi dyondza lerova swo tala a swi tihundzela. Nilokoswiritano, leswi a ndzi swi dyondza a swi fikelela mbilu ya mina, sweswo swi vonake kahle eka mphikizano lowu nga landzela.

Leswi a ndzi hlawuriwe ku nghenela Mintlangu ya Pan American, varhangeri va hina va ndzi kombele leswaku ndzi nghenela mphikizano wo sungula. Loko nkarhi wa mina wu fika, ndzi suke ndzi yima kambe a ndzi nga ri na matimba. Ndzi tsundzuke leswaku Mukreste a nga fanelanga a  lwa ni vanhu van’wana, hambi ku ri emintlangwini! Ndzi tsundzuke nawu wa Bibele lowu vulaka leswaku “rhandza warikwenu kukota loko u tirhandza.” (Matewu 19:19) Ndzi hume ndzi famba naswona a ndzi khomiwanga hi tingana. Vanhu a va swi tshembanga leswi va swi voneke.

Loko ndzi fika ekaya, ndzi sungule ku anakanyisisa hileswi ndzi lavaka ku swi endla hi vutomi bya mina. Ndzi teke broxara leyi kandziyisiweke hi Timbhoni leyi vulavulaka hi leswi Xikwembu xi swi languteleke eka hina. Eka yona ndzi hlangane ni tsalwa ra Pisalema 11:5, leri nge: “Moya-xiviri [wa Yehovha] wa n’wi venga un’wana ni un’wana la rhandzaka madzolonga.” Marito wolawo ya mupisalema ma ndzi khumbile swinene, lerova ndzi tshika ku va mutlangi wa karati.

Varhangeri va mina va karati a va nga tsakanga. Va ringete ku ndzi cinca miehleketo hi ku ndzi byela leswaku a ndzi ri nghwazi etikweni hinkwaro naswona a ndzi ri ekusuhi ni ku nghenela Mintlangu ya Tiolimpiki. Kambe se a ndzi xi endlile xiboho.

Hi nkarhi wolowo, mina ni jaha ra mina se a hi catile. Nuna wa mina se a a sungule ku chumayela ni Timbhoni. A a vuya ekaya a tsakile naswona a a ndzi chumbutela hi mabulo lawa a veke na wona ni vanhu. A ndzi swi tiva leswaku loko na mina ndzi lava ku tiphina hi ndlela leyi fanaka, ndzi fanele ndzi cinca vutomi bya mina. Ndzi tshike vukhongeri bya mina kutani ndzi khuvuriwa ndzi va Mbhoni.

NDLELA LEYI NDZI VUYERIWEKE HA YONA: Mina ni nuna wa mina hi tsakile naswona hi ni vun’we hileswi hi tikarhatelaka ku tirhisa leswi Bibele yi swi dyondzisaka evukatini bya hina. Ndza n’wi seketela loko a endla mintirho ya le vandlheni. A ndzi ta va ndzi tikarhatele ku wina mendlele ya nsuku ni ku va la dumeke. Kambe ndzi ehleketa leswaku emisaveni leyi yo homboloka a xi kona lexi nga ringanisiwaka ni lunghelo ro tirhela Yehovha Xikwembu.

“Tatana A Nga Ndzi Lan’wanga.”—INGO ZIMMERMANN

MALEMBE: 44

TIKO: JARIMANI

MATIMU YAKWE: MURINDZI WA NDHAWU YO CINELA EKA YONA

VUTOMI BYA MINA: Ndzi velekeriwe edorobeni ra malahla ra Gelsenkirchen endyangwini lowu a wu avanile hi vukhongeri. Tatana a a ri Mbhoni ya Yehovha. Manana a a nga swi lavi leswaku mina na buti swin’we ni vasesi va mina vambirhi hi va Timbhoni. Tatana a a tirha tiawara ta khume kumbe ku tlula hi siku a ri karhi a chayela tilori. Hakanyingi a a sungula ku tirha hi awara ya mbirhi kumbe ya nharhu nimixo. A a tikarhatela ku hi pfuna leswaku hi va ni vuxaka ni Xikwembu. Kambe mina a ndzi nga ri na mhaka na swona sweswo.

Loko ndzi ri ni malembe ya 15, ndzi sungule ku ka ndzi nga ha yi tsakeli minhlangano ya Timbhoni ta Yehovha, hiloko ndzi tshika. Endzhaku ka lembe, ndzi sungule ku ba xibakele. Emalembeni mambirhi lama landzeleke, ndzi sungule ku hanya hi ndlela leyi a yi dyisa Tatana mbitsi. Loko ndzi ri ni malembe ya 18 ndzi rhurhe ekaya.

A ndzi yi rhandza ngopfu mintlangu naswona a ndzi endla vutiolori ka tsevu hi vhiki—a ndzi rhanga hi ku ba xibakele ivi endzhaku ndzi ya tlakula tinsimbi. Hi mahelo-vhiki, mina ni vanghana va  mina a hi tshamela ku ya endhawini yo cinela eka yona. Siku rin’wana ndzi holove ni un’wana wa lava a va te eku hlaleleni, hiloko hi sungula ku lwa kutani ndzi n’wi hlula. N’wini wa ndhawu yoleyo a ndzi langutile hiloko a namba a ndzi thola leswaku ndzi va murindzi. U ndzi tshembise mali yo tala, hiloko ndzi amukela ntirho wolowo.

Hi mahelo-vhiki man’wana ni man’wana a ndzi yima enyangweni wa ndhawu yo cinela eka yona naswona hi mina a ndzi endla xiboho xa leswaku i mani la faneleke a nghena ni la nga fanelangiki ku nghena. Vanhu va kwalomu ka 1 000 a va ta endhawini yoleyo naswona leswi a swi endla leswaku ndzi tshama ndzi khomekile. Vanhu a va tshama va ri eku lweni. A ndzi xungetiwa hi swibalesa ni hi mabodlhela lama fayekeke. Vanhu van’wana lava ndzi va aleleke ku nghena kumbe lava ndzi va hlongoleke endhawini yo cinela eka yona a va ndzi rindze hala handle leswaku va ta rihisela. A ndzi ri ni malembe ya 20 naswona a ndzi tibyela leswaku a ku na munhu la nga ndzi hlulaka. A ndzi tsandzeka ku tilawula loko ndzi hlundzukile, ndzi ri ni madzolonga ni ku tikukumuxa naswona a ndzi nga lavi ku byeriwa nchumu.

NDLELA LEYI BIBELE YI HUNDZULEKE VUTOMI BYA MINA HA YONA: Tatana a nga ndzi lan’wanga. U endle malunghiselelo ya leswaku ndzi tiseriwa timagazini ta Xihondzo xo Rindza ni Xalamuka! * laha a ndzi tshama kona, kambe a ndzi nga ti hlayi. Kutani siku rin’wana ndzi teke tin’wana ta tona ndzi ti hlaya. Swihloko leswi ndzi swi hlayeke a swi vulavula hi ndlela leyi tipolitiki leti nga kona sweswi, ikhonomi ni vukhongeri swi nga ta herisiwa ha yona naswona sweswo swi endle leswaku ndzi bela sesi wa mina riqingho. Yena ni nuna wakwe a va ri Timbhoni ta Yehovha. Va kombele ku dyondza na mina Bibele naswona ndzi pfumerile.

Nawu lowu nga eka Vagalatiya 6:7 wu ndzi susumetele ku cinca vutomi bya mina. A ndzi swi tiva leswaku xin’wana ni xin’wana lexi ndzi xi endlaka ni ku xi vula xi ta khumba vumundzuku bya mina. Ndzi tlhele ndzi khutaziwa swinene hi xirhambo lexi nga eka Esaya 1:18 lexi nge: “Yehovha u ri: ‘Tanani, sweswi, a hi lulamiseni timhaka exikarhi ka hina. Hambiloko swidyoho swa n’wina swo va swa ribungu, swi ta endliwa swi basa ku fana ni gamboko.’” Ku sukela loko ndzi sungule ku dyondza Bibele, tsalwa leri ri ndzi pfune leswaku ndzi nga titwi ndzi ri xikangalafula kumbe ndzi twa onge Yehovha a nge he ndzi amukeli.

Endzhaku ka tin’hweti ta tsevu, ndzi endle ku cinca lokukulu evuton’wini bya mina hambileswi a ka ha ri ni swin’wana leswi a swi sele. A ndzi fanele ndzi tihambanisa ni vanghana va mina lava nga ni mahanyelo yo biha. Kutani ndzi sungule ku va byela leswaku se ndzi dyondza Bibele ni ku va byela leswi ndzi swi dyondzaka. Va sungule ku tihambanisa na mina va tlhela va ndzi vitana mufundhisi. Sesi wa mina u ndzi pfunile leswaku ndzi tlhela ndzi kuma ntirho wun’wana.

Ndzi sungule ku ya eminhlanganweni leyi a yi khomeriwa eHolweni ya Mfumo leyi sesi wa mina ni nuna wakwe a va hlanganyela eka yona, hambileswi a swi teka tikhilomitara ta 30 ku ya kona. A yi ri kona Holo ya Mfumo ekusuhi ni laha ndzi tshamaka kona, kambe a ndzi chava ku hlangana ni vanhu lava a va ndzi tiva ku sukela loko ndza ha ri ntsongo. Nakambe a ndzi chava ku ya chumayela hi yindlu ni yindlu endhawini leyi a ndzi tshama eka yona. A ndzi tivutisa leswaku ndzi ta endla yini loko ndzo hlangana ni munhu loyi ndzi n’wi hlongoleke endhawini yo cinela eka yona kumbe loyi ndzi n’wi nyikeke swidzidziharisi? Hambiswiritano, loko ndzi endla vutiolori a ndzi swi tiva leswaku leswi swi nga ndzi oloveliki ku swi endla, hi swona swa nkoka. Kutani loko se ndzi fanelekela ku chumayela, ndzi sungule ku wu hisekela swinene ntirho lowu.

A ku ri ni xiphiqo xin’wana lexi a ndzi fanele ndzi xi hlula, a ndzi nga swi rhandzi ku hlaya kumbe ku dyondza. Kambe a ndzi swi tiva leswaku loko ndzi lava ku va ni ripfumelo leri tiyeke, ndzi fanele ndzi hisekela ku dyondza ntiyiso lowu nga eBibeleni. Ndzi xiye leswaku ku fana ni ku tlakula tinsimbhi, swi lava leswaku u endla matshalatshala leswaku u va ni vutivi.

NDLELA LEYI NDZI VUYERIWEKE HA YONA: Nchumu wun’wana lowu ndzi vuyeriweke ha wona hileswaku ndzi pone ku fa. Ndza ha lwa hi matimba leswaku ndzi nga tlheleli eka mikhuva ya mina ya khale. Sweswi mina ni nsati wa mina loyi a nga ni timfanelo letinene hi ni ndyangu lowu tsakeke. Enhlengeletanweni ya Yehovha ndzi ni vanghana va xiviri lava ndzi va tshembaka. Tata wa mina u fe eka malembe ya ntlhanu lama hundzeke, kambe a a tsakile leswi a nga fa ndzi ri Mbhoni.

[Nhlamuselo ya le hansi]