Embimbiliya Li Pongolola Omuenyo Womanu

NYE ca vetiya esualali limue ongangala haeye ocimunu oku pongolola ekalo liomuenyo waye? Momo lie umue wa litumbikile komapalo yoku li tipula la vakuavo a pongoluila ekalo liomuenyo waye? Onjali yimue ya sumũlũisiwa ndati omo liekolelo liaye? Tanga ovolandu akuãimo, oco o sange etambululo.

“Ndaño sia kuatele elavoko, pole, cilo nda sanjuka.”—GARRY P. AMBROCIO

ANYAMO: 47

KOFEKA A CITIWILA: FILIPINAS

ULANDU WOMUENYO: WA KALA USUALALI

OMUENYO WANGE KOSIMBU: Nda kulila vimbo limue litito li tukuiwa hati, Vintar. Tua kala vocimbota cimue ca ñualiwa lolomunda vi kuete oviti via posoka kuenda mua kala olondui vi kuete ovava a yela, lofela yiwa. Ndaño kua kala ombembua, pole, tua kuata ovitangi vialua. Omanu va nyana ovinyama vietu, kuenda va tuiyila onjo yetu.

Eci nda kala umalẽhe, nda kuata ocituwa coku nyua kumue lakamba vange, oku sipa, kuenda oku nyana, oco ndi lande ovina viaco. Noke nda nyanavo olomota viatĩla via nyokulu yange. Kuenje, asualali vamue va simĩle okuti, nda tiamẽla Kocitundo Cimue Cokaliye Casualali okuti, (kelimi Liongelesi ci tukuiwa hati NPA). Omo liaco, va ndi tipula olonjanja vialua. Kuenje, nda nõlapo oku tiamẽla kocitundo casualali vaco. Noke, nda kala kolomunda Locitundo caco vokuenda kuanyamo vatãlo. Nda kuata ovitangi vialua komuenyo. Tua enda oku ilukila kovitumãlo vikuavo omo lioku tila asualali vakuavo. Noke ndeya oku kava calua omo lioku salama volomunda olonjanja vialua. Kuenje, nda lieca kombiali ya kala Konano yofeka yina ya ndi tambula ciwa, kuenda va ndi kuatisa oku sanga upange umue uwa. Pole, nda amamako locituwa cange coku nyana volonjo, kuenda oku punda ovina viomanu.

NDOMO EMBIMBILIYA LIA PONGOLOLA OMUENYO WANGE: Kupange wange, kua kala ukãi umue Ombangi ya Yehova otukuiwa hati, Loida. Eye, wa ndi lekisa umue o tukuiwa hati, Jovencio, okuti noke wa fetika oku ndi longisa Embimbiliya. Pole, ka ca lelukile oku siapo ovituwa viange vĩvi. Nda enda oku sipa toke owola Jovencio a pitila oco ndi lilongise Embimbiliya. Vokuenda kuotembo yaco, nda amamako oku lueya ovihandeleko viofeka. Noke, akuenje velombe va ndi kuata omo liovina viaco. Kuenje, nda kala vokayike ci soka 11 kolosãi. Vokuenda kuotembo yaco, nda likutilila ku Yehova loku pinga ekuatiso. Kuenje, nda pinga ongecelo kokuaye, oco espiritu liaye li ndi songuile loku ndi pamisa.

Eteke limue, nda nyuliwa Lombangi ya Yehova, kuenje wa nyiha Embimbiliya. Poku li tanga, nda limbuka okuti, Yehova ukuahenda, ukuacisola, kuenda ukuakuecela akandu. Nda limbukavo okuti, Yehova wa ndi kuatela ohenda poku nyiha epuluvi lioku lilongisa catiamẽla kolonjila viaye. Nda pinga kokuaye oco ndi kuate ongusu yoku  siapo ovina ka via sungulukile. Momo, olondaka nda tanga kelivulu Liolosapo 27:11, via ndi vetiya calua. Ca kala ndu okuti, Yehova wa suñamisa olondaka viaco kokuange. Ocinimbu caco ci popia hati: “Kuata olondunge amõlange, sanjuisa utima wange, oco nambulule u o njimbula.”

Noke yoku tunda vokayike, nda fetika oku lilongisa vali Embimbiliya Lolombangi Via Yehova, oku endaenda kolohongele, kuenda oku kapako ovina nda kala oku lilongisa. Lekuatiso lia Yehova, nda tẽla oku siapo ovituwa viange vĩvi. Kuenje, nda litumbika ku Yehova Suku.

NDOMO NDA KUATISIWA: Ndaño lovitangi nda liyaka lavio komuenyo wange, cilo ndi kuete esanju lialua. Ndaño nda kala upika wovituwa vĩvi, cilo nda linga omunu wokaliye. (Va Kolosai 3:9, 10) Ndi kuete esanju lialua omo lioku tiamẽla kafendeli va Yehova vakuavituwa viwa, kuenda oku kuatisa omanu oku lilongisa catiamẽla ku Suku Ukuonene Wosi.

“Nda yonguile oku nõliwa ndomunu watete ko Brasil poku linga omapalo yoku litipula lolofeka vikuavo”—JULIANA APARECIDA SANTANA ESCUDEIRO

ANYAMO: 31

KOFEKA A CITIWILA: BRASIL

ULANDU WOMUENYO: WA YULA KOLOMAPALO VIOKU LITIPULA LOMANU

OMUENYO WANGE KOSIMBU: Nda kulila volupale luo Londrina. Ndaño omanu valua va kala olohukũi, pole, olupale luaco lua yelele, kuenda mua kala ombembua. Eci nda kuata ekũi lianyamo, kota liange ulume wa ndi vetiya oku lilongisa “uloño woku litipula lomanu” u tukuiwa hati, Tae kown do, kelimi lio Korea. Eci nda fetika oku lilongisa uloño waco, isiange ka ci solele, pole, noke wa tava.

Nda pita otembo yalua loku lilongisa uloño waco, kuenda nda yula olonjanja vialua volupale luo Parana. Noke, nda yula omapalo yaco olonjanja vialua, kuenje, kunyamo wo 1993, nda nõliwa ndomunu watete vofeka yo Brasil. Nda yonguile oku lingila omapalo yaco kolofeka vikuavo. Omo okuti epata liange lia kala olohukũi, sia kuatele olombongo vioku feta opasasi yoku enda kolofeka vikuavo.

Nda yonguile okuti, omapalo yaco yi kongeliwa volomapalo vikuavo via siata oku lingiwa Kolofeka vimue voluali. Nda yonguilevo oku nõliwa ndomunu watete vofeka yo Brasil Komapalo yaco. Omo liaco, nda pita otembo yalua loku li pindisa kuloño waco, kuenje, kua moleha umue wa ndi fetelako opasasi yoku enda kolofeka vimue ndeci: Ko França, ko Vietename, ko Korea do Sul, ko Japãu, kuenda, kolofeka vi sangiwa Kombuelo yo Amerika. Ocimãho cikuavo nda kuata, coku linga omapalo yaco lolofeka vikuavo vi panga onepa Kocifuka co Amerika. Kunyamo wo 2003, tua nõliwa vatatu oco tu ende ko Santo Domingo, Kofeka yo Dominikana.

NDOMO EMBIMBILIYA LIA PONGOLOLA OMUENYO WANGE: Kunyamo wo 2001, ame kumue lukuenje wange, tua li sanga Lolombangi Via Yehova, kuenje, via fetika oku tu longisa Embimbiliya. Kefetikilo, sia kuatele onjongole. Poku lilongisa ndaenda oku suñila omo liekavo. Pole, ovina nda kala oku lilongisa via ndi vetiya calua, kuenda uvangi waco wa limbukiwa eci nda panga onepa komapalo yaco onjanja yikuavo.

Omo okuti nda nõliwile oco ndi pange onepa komapalo yolofeka vikuavo vi panga onepa Kocifuka co Amerika, alongisi vomapalo yaco, va ndi  linga oseteko ya sulako. Eci lia pitilapo epuluvi liange lioku litipula la vakuetu, sia lekisile onjongole yaco. Momo, nda ivaluka ovina nda lilongisa vi lekisa okuti, Akristão va sukila oku yuvula olomapalo viosi mua kongela oku litipula la vakuavo. Kuenje, nda ivaluka onumbi Yembimbiliya yi popia hati, tu sukila oku ‘sola vakuetu, ndeci tu lisole etu muẽle.’ (Mateo 19:19) Omo liaco, nda tunda vocila colomapalo viaco. Kuenje, omanu va ndi tulukila, kuenda va komoha calua.

Eci nda pitila konjo, nda fetika oku sokolola onjila ndi sukila oku kuama komuenyo wange. Kuenje, nda fetika oku tanga ombrochura ya sandekiwa Lolombangi Via Yehova losapi hati, Suku Oyongola Nye Kokuetu. Vombrochura yaco, nda sangamo Osamo 11:5, muna Yehova a popia hati: “Utima waye u suvuka u o sole ungangala.” Olondaka viaco via ndi kuatisa calua, kuenje nda liwepo oku panga onepa komapalo yaco.

Alongisi vange ka va sanjukilile onjila nda nõlapo. Ovo va seteka oku pongolola ovisimĩlo viange, loku popia hati, ame nda kala omunu wavelapo vofeka yetu, kuenda ndakala pomangu yatete Komapalo Yaco vofeka yetu. Pole, nda nõlapo oku siapo omapalo yaco.

Vokuenda kuotembo ame kumue lukuenje wange tua li kuela. Otembo yaco, eye wa fetika ale oku endaenda kupange woku kunda kumue Lolombangi Via Yehova. Eye waenda oku tiuka lesanju lialua, kuenda oku ndi lomboluila ovina a sapela lomanu. Nda kũlĩhĩle okuti, oco ndi pange onepa kupange waco, ndi sukila oku linga apongoloko komuenyo wange. Omo liaco, nda siapo etavo liange kuenda nda linga Ombangi ya Yehova.

NDOMO NDA KUATISIWA: Ame kumue lulume wange tua sanjuka calua omo liesumbilo li kasi pokati ketu, kuenda oku kapako olonumbi Viembimbiliya volohuela vietu. Nda sanjukavo omo lioku u kuatisa oku tẽlisa ovikele viaye vekongelo lietu. Nda yonguile oku likolisilako okuti ndi tambula ekolowa liulu oco ndi kuate ekemãlo. Pole, nda limbuka okuti, kakuli lacimue voluali lulo ci sokisiwa lesanju li tunda koku vumba Yehova Suku.

“Isiange wa amamako oku ndi kuatisa.”—INGO ZIMMERMANN

ANYAMO: 44

KOFEKA A CITIWILA: ALEMANYA

ULANDU WOMUENYO: WA KALA ONDAVULULI YONJO YOKU PILUKILA

OMUENYO WANGE KOSIMBU: Nda citiwila volupale lumue lu tukuiwa hati: Gelsenkirchen. Epata liange lia kala vatavo a litepa. Isiange wa kala Ombangi ya Yehova kuenda wa enda oku likolisilako oku ndi pindisa kumue la vamanjange kovina viatiamẽla ketavo liaye. Pole, Ina yange wa enda oku ci suvuka calua. Isiange wa enda oku talavaya ci pitahãla ekũi liolowola veteke. Olonjanja vialua wa enda oku iñila kupange kowola yavali ale yatatu komẽle. Ndaño wa kuata otembo yitito omo liupange, pole, wa enda oku likolisilako oku tu pindisa kespiritu. Pole, sia lekisile onjongole kalikolisilo aye oku ndi kuatisa.

Eci nda kuata ci soka 15 kanyamo, onjongole yange yoku endaenda kolohongele la isiange ya tepuluka. Kuenje, nda liwepo oku endaenda laye. Kunyamo wa kuamamo, nda lisonehisa kocimunga coku lilongisa uloño woku litipula lomanu. Vokuenda kuanyamo avali nda kuata ovituwa via sumuisa calua isiange. Kuenje, eci nda tẽlisa 18 kanyamo nda tunda konjo.

 Nda solele calua omapalo yoku litipula lomanu, kuenje, ndaenda oku li pindisa olonjanja epandu vosemana. Tete, ndaenda oku linga omapalo yoku litipula lomanu, noke yoku votola ovina vilema. Kesulilo liosemana, ame kumue lakamba vange, tua enda oku enda volonjo vioku piluka loku nyua kuenda oku linga upuepue. Onjanja yimue nda liyaka lulume umue wa enda oku yuvuiwa lomanu, pole, ndo yula. Eci muẽleanjo yaco a ci mõla, wa ndi laleka oco ndi talavaye kupange woku lava onjo yaco. Omo okuti wa likuminya oku ndi feta olombongo vialua, nda tava kelaleko liaco.

Asulilo osi olosemana, nda enda oku kala puvelo wonjo yaco loku nõla ava citava oku iñila kuenda ava ka ci tava oku iñila. Nda kuata upange walua, momo vonjo yaco mua enda oku iñila 1000 komanu. Omanu va enda oku ndi saluisa luta, kuenda olongalafa via tetuiwa. Omanu vana sia tavele oku iñisa kuenda vana nda tundisa vonjo, va enda oku ndi kevelela posamua oco va ndi tipule. Eci nda kuata 20 kanyamo, nda simĩle okuti, lomue o tẽla oku ndi yula. Otembo yaco, sia tẽlele oku likandangiya, momo nda kuata ocituwa coku tipula vakuetu, ocipululu, epela, kuenda nda kala ukualonamalãla.

NDOMO EMBIMBILIYA LIA PONGOLOLA OMUENYO WANGE: Isiange wa amamako oku ndi kuatisa. Eye wa enda oku nena konjo Utala Wondavululi lo Despertai!.  a Nda kuata olorevista vialua vohondo, pole, sia kuatele onjongole yoku vi tanga. Eteke limue, nda nõlapo oku tanga orevista yimue. Omo okuti ovipama nda tanga via lombolola ndomo olombiali violuali lulo, lovisoko violomĩlu, kumue latavo esanda vi ka nyõliwa, ca ndi vetiya oku vilikiya kota liange ukãi. Omo okuti eye kumue lulume waye Olombangi Via Yehova, va ndi laleka oku ndi longisa Embimbiliya, kuenje nda tava.

Olondaka nda tanga kelivulu lia Va Galatia 6:7, via ndi vetiya oku linga apongoloko komuenyo. Kuenje, nda limbuka okuti, kovaso yoloneke, tu tambula onima yiwa, ale yĩvi omo liovina viosi tu popia, levi tu linga, kuenda onjila tu nõla. Nda vetiyiwavo lelaleko lia Yehova li sangiwa Kelivulu lia Isaya 1:18 li popia hati: “Enjui, tu lisunguluisi. ‘Ndaño akandu ene a kusuka ngẽ ndonanga yohusu, a yela ndocikokoto.’” Tunde eci nda fetika oku lilongisa Embimbiliya, ocinimbu eci ca ndi kuatisa oku limbuka okuti, ndaño nda linga ovina vialua vĩvi, pole, ndi pondola oku kuata ukamba la Yehova.

Vokuenda kuolosãi epandu nda linga apongoloko alua komuenyo wange, pole, nda sukilile oku likolisilako. Omo liaco, nda siapo akamba vãvi, kuenda oku yuvula oku enda kovitumãlo kuna nda enda oku vetiyiwa oku linga ovina ka via sungulukile. Noke, nda sapuila akamba vange okuti, nda fetika oku lilongisa Embimbilkiya, kuenda nda va lomboluila ovina nda kala oku lilongisa. Omo liaco, va fetika oku yuvula oku enda lame, kuenda va popia hati, nda linga opatele. Lekuatiso lia kota liange ukãi, nda sanga upange ukuavo wa sunguluka.

Nda fetika oku endaenda kolohongele Vonjango Yusoma, kuna kota liange lulume waye va enda oku enda, ndaño Onjango yaco ya kala ocinãla ci soka (30 kolokilometulu) lonjo yetu. Omo liosõi nda kuata lomanu va ndi kũlĩha tunde vutila, sia tavele oku endaenda kolohongele Vonjango Yusoma ya kala ocipepi lonjo yetu. Nda kuatavo usumba woku kundila konjo lanjo vocikanjo cina nda kala. Nye nda ca pita lame poku li sanga la umue nda tundisile vonjo yoku piluka, ale umue nda landisile eliamba? Vuloño wange woku litipula lomanu, nda lilongisa okuti, ovina via tĩla oku vi lilongisa, ovio vi kuete esilivilo lia velapo. Omo liaco, nda taviwa lakulu vekongelo kuenje, nda fetika upange woku kunda.

Nda sukulilevo oku yula ocitangi cowesi nda kuata woku tanga Embimbiliya ale oku sokolola ovina nda tanga. Pole, nda kũlĩhĩle okuti, oco ndi pamise ekolelo liange, nda sukilile oku likolisilako oku lilongisa ocili ci sangiwa Vembimbiliya. Kuenje, nda limbuka okuti, ndeci ci pita lomunu o likolisilako oku votola ovina vilema, cimuamue haico tu sukila oku linga okuti, tu likolisilako oco tu kuate ongusu konepa yespiritu.

NDOMO NDA KUATISIWA: Ndi kuete esanju lialua omo lioku lilongisa Embimbiliya, momo cilo, nda si kasi lomuenyo! Omo liaco, ndi sukila oku lavulula oco si ka yapuisiwe lahonguo ange. Cilo nda sanjuka calua omo liovituwa viwa viukãi wange, kuenda ndi kuete akamba vawa pokati ka vamanji vana nda kolela. Pa pita ale anyamo vatãlo tunde eci isiange a kuata esanju lioku ndi tambula vali konjo.

[Atosi pombuelo yamẽla]