Pakigsuod sa Diyos

“Iyang Itugot nga Siya Imong Makaplagan”

1 CRONICAS 28:9

NAKAILA ka ba sa Diyos? Daw dili kini sayon tubagon. Ang tinuod nga pagkaila sa Diyos nagkahulogan nga ikaw nasinati pag-ayo sa iyang kabubut-on ug mga paagi. Pinaagi niini masuod kita kaniya ug dako kinig epekto sa tibuok natong pagkinabuhi. Posible ba gayod nga kita masuod kaniya? Kon mao, sa unsang paagi? Mahibaloan nato ang tubag diha sa tambag ni Haring David kang Solomon, nga mabasa sa 1 Cronicas 28:9.

Handurawa ang esena. Si David naghari sa Israel sa duolag 40 ka tuig, ug ang nasod nagmauswagon. Si Solomon, nga maoy mopuli kaniya, batan-on pa kaayo. (1 Cronicas 29:1) Sa hapit nang mamatay si David, unsay iyang gitambag sa iyang anak?

Tungod sa daghang kasinatian ni David sa pag-alagad sa Diyos, siya nagtambag: “Solomon nga akong anak, ilha ang Diyos sa imong amahan.” Iya gayong gipasabot nga dili kay taphaw lamang ang pagkaila sa Diyos. Si Solomon usa na ka magsisimba sa Diyos ni David, si Jehova. Nahuman na ang mga 33 porsiyento sa Hebreohanong Kasulatan, ug nasayod gayod si Solomon kon unsay giingon niining sagradong sinulat bahin sa Diyos. Usa ka eskolar miingon nga ang Hebreohanong pulong nga gihubad nga “ilha” mahimong magtumong sa “labing suod nga higala.” Oo, buot ni David nga ugmaron usab sa iyang anak ang suod nga relasyon sa Diyos.

Ang maong relasyon angay gayong mag-apektar sa panglantaw ug pagkinabuhi ni Solomon. Gitambagan ni David ang iyang anak: “Alagara siya uban ang bug-os nga kasingkasing ug uban ang malipayon nga kalag.” a Matikdi nga ang sugo nga alagaron ang Diyos gipahayag human sa tambag nga ilhon siya. Busa ang tinuod nga pagkaila sa Diyos magtukmod sa usa sa pag-alagad kaniya nga walay pagduhaduha o pagkasalingkapaw. (Salmo 12:2; 119:113) Gihangyo ni David ang iyang anak nga kinabubut-ong alagaron ang Diyos uban ang bug-os nga kasingkasing.

Nganong giawhag ni David ang iyang anak nga simbahon ang Diyos uban ang hustong motibo ug hunahuna? Si David miingon: “Kay ang tanang kasingkasing ginasusi ni Jehova, ug ang matag kiling sa hunahuna iyang ginaila.” Kinahanglang ang pag-alagad ni Solomon sa Diyos dili lamang aron pahimut-an ang iyang amahan. Ang gipangita sa Diyos mao kadtong sinserong moalagad Kaniya.

Mosundog ba kaha si Solomon sa iyang amahan ug makigsuod kang Jehova? Depende kana kang Solomon. Si David miingon sa iyang anak: “Kon ikaw mangita kaniya, iyang itugot nga siya imong makaplagan; apan kon ikaw mobiya kaniya, siya magsalikway kanimo hangtod sa kahangtoran.” Aron mahimong suod nga magsisimba sa Diyos, kinahanglan maningkamot gayod si Solomon nga makaila kang Jehova. b

Kining mahigugmaong tambag ni David nagpasalig kanato nga gusto ni Jehova nga kita masuod kaniya. Apan aron maugmad kana, kinahanglan tang “mangita kaniya” ug makugihong magtuon sa Kasulatan aron kita makaila pag-ayo kaniya. Ang pagkaila kaniya mopalihok gayod kanato nga alagaron siya uban ang bug-os nga kasingkasing. Mao gayod kini ang gitinguha ni Jehova kanato, ug siya takos lamang nga modawat niini.—Mateo 22:37.

[Mga footnote]