“Oyokụt Enye”
San̄a Kpere Abasi
“Oyokụt Enye”
NDI afo ọmọfiọk Abasi? Ibọrọ mbụme emi imemke utom nte mme owo ẹsikerede. Nditịm mfiọk Abasi abuana ndinen̄ede mmehe ye uduak ye mme usụn̄ esie. Ntem ke nnyịn idisan̄a ikpere enye ke usụn̄ emi edinen̄erede itụk kpukpru se inamde. Ndi imosụk ikeme ndisan̄a n̄kpere enye ntre? Edieke ikemede, didie ke idinam oro? Imekeme ndikụt ibọrọ mbụme emi ke item oro Edidem David ọkọnọde Solomon eyen esie, emi ẹwetde ke 1 Chronicles 28:9.
Nam nte ke ama odu ini oro. David ada ukara ke Israel ke se ikperede ndisịm isua 40, ndien uforo odu ke ofụri ini emi enye akarade. Solomon emi edidade itie esie ke mîbịghike osụk edi eyenọwọn̄. (1 Chronicles 29:1) Nso akpatre item ke David ọnọ eyen esie?
David eti nte enye akanamde n̄kpọ Abasi, ndien enye ọtọn̄ọ item esie ntem: “Solomon eyen mi, fiọk Abasi usọ.” Ikọ David ikaban̄ake ifiọk ibuot kpọt. Solomon ama okpokpono Jehovah Abasi David. Ẹwet se ibede n̄wed duop ẹma ke N̄wed Abasi Usem Hebrew, ndien Solomon ọfiọk se mmọ ẹtịn̄de ẹban̄a Abasi. Eyen ukpepn̄kpọ kiet ọdọhọ ete ke ikọ Hebrew oro ẹkabarede nte “fiọk” ekeme ndiwọrọ “ndinyene ata n̄kpet n̄kpet itie ebuana ye owo.” Ih, David oyom eyen esie enyene se enye ke idemesie adade ke ọsọn̄urua n̄kpọ—ata n̄kpet n̄kpet ọkpọkpọ itie ebuana ye Abasi.
Utọ n̄kpet n̄kpet itie ebuana oro ekpenyene nditụk nte Solomon adade n̄kpọ onyụn̄ odude uwem. David ọdọhọ eyen esie ete: “Nam n̄kpọ [Abasi] ke ofụri esịt, ye ke ima ukpọn̄.” * Tịm fiọk nte ke ẹdọhọ ẹnam n̄kpọ Abasi ke ẹma ẹkedọhọ ẹfiọk enye. Ndinen̄ede mfiọk Abasi esinam ẹnam n̄kpọ esie. Edi inaha ida ifu inam n̄kpọ esie ke ubak esịt m̀mê ndida mbubịk nnam n̄kpọ esie ke esịt iba. (Psalm 12:2; 119:113) David ọdọhọ eyen esie ete anam n̄kpọ Abasi ke ofụri esịt.
Ntak emi David ọdọhọde eyen esie atuak ibuot ọnọ Abasi ke ofụri esịt ye ekikere? David ọbọrọ ete: “Koro Jehovah odụn̄ọde kpukpru esịt owo, onyụn̄ etịm ọfiọk kpukpru se ekikere obotde.” Iyomke Solomon anam n̄kpọ Abasi ke ntak David ete esie. Abasi ama mbon oro ẹyomde ndinam n̄kpọ esie ke ofụri esịt mmọ.
Ndi Solomon eyetiene uwụtn̄kpọ ete esie onyụn̄ asan̄a ekpere Jehovah? Oro akana ọnọ Solomon ndibiere. David ọkọdọhọ eyen esie ete: “Afo ama oyom enye, oyokụt enye; edi ama ọkpọn̄ enye, enye eyemen fi ọduọk tutu amama.” Man Solomon edi asan̄autom Abasi emi ekperede Abasi, akana enye esịn ata ukeme esie ọfiọk Jehovah. *
Item oro David ọkọnọde mi nte ete anam inen̄ede ifiọk ke Jehovah oyom nnyịn isan̄a ikpere enye. Edi man ekeme ndinam emi, ana afo “oyom enye,” enen̄ede esịn idem ekpep N̄wed Abasi man etịm ọfiọk enye. Akpana iyak ifiọk oro inyenede iban̄a enye anam nnyịn inyịme ndinam n̄kpọ esie ke ofụri esịt. Se Jehovah oyomde mme asan̄autom esie ẹnam edi oro, ndien enye odot se ẹkponode ntre.—Matthew 22:37.
[Mme Ikọ Idakisọn̄]
^ ikp. 7 Ndusụk Bible ẹkabade itie emi ntem: “Nam n̄kpọ esie ke ofụri esịt ye imaesịt.”
^ ikp. 9 Edi, kpa ye oro Solomon ọkọtọn̄ọde anam n̄kpọ Abasi ke ofụri esịt, enye ikakaha iso inam ntre isịm utịt.—1 Ndidem 11:4.