Si Kẹle Ọghẹnẹ

“Whọ rẹ te Rue Riẹ”

1 IRUẸRU-IVIE 28:9

KỌ WHỌ riẹ Ọghẹnẹ? Ẹsejọhọ whọ sai roro nọ uyo onọ nana o lọhọ gaga, rekọ ere o nwane rrọ họ. Re a ginẹ riẹ Ọghẹnẹ, u dhesẹ nọ ohwo ọ rẹ riẹ oreva riẹ gbe idhere riẹ ziezi. Ma rẹ rọ ere wo usu okpekpe kugbei, onọ u re kpomahọ k’abọ k’abọ uzuazọ uyero mai. Kọ usu okpekpe utioye o ginẹ lọhọ? O tẹ rrọ ere, ẹvẹ ma sai ro woi? Ma rẹ sae ruẹ iyo enọ nana evaọ ohrẹ nọ Devidi ovie na ọ kẹ ọmọ riẹ Solomọn, onọ ma rẹ ruẹ se evaọ obe 1 Iruẹru-Ivie 28:9.

Roro kpahe uyero na. Devidi o su Izrẹl enwenọ ikpe 40 no, yọ eware i kiehọ kẹ orẹwho na evaọ otọ esuo riẹ. Solomọn nọ ọ be te rehọ ẹta riẹ kẹlena ọ gbẹ maha gaga. (1 Iruẹru-Ivie 29:1) Didi ohrẹ Devidi ọ kẹ ọmọ riẹ taure o te ti whu?

Fikiọ ewoma nọ ọ rọ ẹro ruẹ evaọ Ọghẹnẹ ọgọ, Devidi o mu ohrẹ riẹ họ inọ: “Sọlomọn ọmọ mẹ, riẹ Ọghẹnẹ ọsẹ ra.” Oware nọ Devidi ọ be ta na u vi eriariẹ uzou gheghe nọ ọmọ na o re wo kpahe Ọghẹnẹ. Solomọn ọ rrọ odibo Jihova, Ọghẹnẹ Devidi no vẹre. Oke yena yọ a kere enwenọ abọvo ọrọ abasa Ikereakere Hibru na no, yọ u muẹro inọ Solomọn ọ riẹ oware nọ ikere nana e ta kpahe Ọghẹnẹ. Ọgba-uwuhrẹ jọ ọ ta inọ ẹme ẹvẹrẹ Hibru nọ a fa nọ “riẹ” na o rẹ sai dhesẹ “usu okpekpe nọ ohwo o re wo kugbe omọfa.” Ẹhẹ, Devidi ọ gwọlọ nọ ọmọ riẹ o wo oware oghaghae nọ ọyomariẹ o wo na—usu okpekpe kugbe Ọghẹnẹ.

U fo nọ usu okpekpe utioye na u re kpomahọ eriwo Solomọn gbe uzuazọ uyero riẹ. Devidi ọ hrẹ ọmọzae riẹ nọ: “Rehọ eva ra kpobi gọ [Ọghẹnẹ], gbe ẹgwọlọ ra kpobi.” Muẹrohọ inọ ọ kake ta kpahe ẹriẹ nọ a rẹ riẹ Ọghẹnẹ taure ọ tẹ ta ẹme te ẹgọ nọ a rẹ gọe. Ẹriẹ nọ a rẹ riẹ Ọghẹnẹ ziezi u re su kpohọ ẹgọ nọ a rẹ gọe. Rekọ Ọghẹnẹ ọ rẹ jẹ egagọ nọ i no eva ze he rehọ họ, onọ a rẹ do ohwo họ gọ hayo orọ eva-ivẹ, onọ a rẹ rọ gọ avọ eviẹhọ. (Olezi 12:2; 119:113) Devidi ọ ta udu họ ọmọ riẹ awọ inọ ọ rọ udu kpobi gọ Ọghẹnẹ no eva ze.

Fikieme Devidi ọ rọ ta udu họ ọmọ riẹ awọ inọ ọ rọ emamọ eva gbe iroro gọ Ọghẹnẹ? Devidi ọ ta oware nọ o soriẹ, inọ: “Keme ỌNOWO ọ rẹ kiẹ otọ eva ahwo kpobi, ọ vẹ riẹ oma gbe iroro ahwo.” U fo ho re Solomọn ọ rọ fikiọ eva nọ ọ gwọlọ ru were Devidi, ọsẹ riẹ gọ Ọghẹnẹ. Ahwo nọ a rẹ gọe avọ unevaze, ae Ọghẹnẹ ọ be gwọlọ.

Kọ Solomọn o ti lele oriruo ọsẹ riẹ re o si kẹle Jihova? Obọ Solomọn oyena o rrọ. Devidi ọ ta kẹe nọ: “Otẹrọnọ whọ gwọle riẹ, whọ rẹ te rue riẹ; rekọ otẹrọnọ whọ se riẹ, o re ti ku owhẹ fiẹ bẹdẹ.” Re Solomọn ọ ruẹse jọ odibo Ọghẹnẹ nọ o bi kẹle iẹe, o gwọlọ nọ ọ rẹ daoma riẹ Jihova ziezi. *

Ohrẹ nọ Devidi ọ kẹ ọmọ riẹ na o kẹ omai imuẹro inọ Jihova ọ gwọlọ nọ ma si kẹle iẹe. Rekọ re ma sai wo usu okpekpe yena, o gwọlọ nọ ma rẹ ‘gwọlọ iẹe,’ kiẹ Ikereakere na re ma ruẹse riẹ Ọghẹnẹ ziezi. Ma tẹ riẹe ziezi, o rẹ wọ omai rọ udu kpobi gọe no eva ze. Oware nọ Jihova ọ gwọlọ mi idibo riẹ oye, yọ o gine te Ọnọ ma rẹ rọ eva kpobi gọ.—Matiu 22:37.

[Oruvẹ-obotọ]