Batamela Kgaufsi le Modimo

“Ó tlo re: Ké Nna é”

1 KORONIKA 28:9

NA O tseba Modimo? Karabo ya potšišo ye ga e bonolo bjalo ka ge go bonala. Go tseba Modimo e le ka kgonthe go akaretša go tseba thato ya gagwe le ditsela tša gagwe gabotse. Ka go dira bjalo re hlagolela tswalano ya kgaufsi le yena, yeo e kgomago kudu tsela ya rena ya bophelo. Na tswalano e bjalo e a kgonega e le ka kgonthe? Ge e ba go le bjalo, re ka ba le yona bjang? Dikarabo di lemogwa keletšong ya Kgoši Dafida go morwa wa gagwe Solomone, e hwetšwago go 1 Koronika 28:9.

Akanya ka boemo bjo. Dafida o bušitše Isiraele ka nywaga e ka bago e 40, gomme setšhaba se be se atlega pušong ya gagwe. Solomone, yo a tlago go mo hlatlama kgaufsinyana, e sa le mofsa kudu. (1 Koronika 29:1) Dafida o laelana le morwa wa gagwe ka go mo fa keletšo efe?

A bolela go tšwa phihlelong ya gagwe e humilego ya go hlankela Modimo, Dafida o thoma ka gore: “Salomo Ngwan’a-ka, O fêlê Ò tseba Modimo wa tat’axo.” Dafida o swanetše go ba a bolela ka seo se fetago go fo ba le tsebo. Solomone e šetše e le morapedi wa Modimo wa Dafida, Jehofa. Go be go šetše go feditšwe mo e ka bago tee-tharong ya Mangwalo a Seheberu, gomme Solomone ka ntle le pelaelo o be a tseba seo dingwalwa tše tše kgethwa di se bolelago ka Modimo. Seithuti se sengwe se re lentšu la Seheberu leo le fetoletšwego e le “tseba” le ka šupa go “tlwaelano ya kgaufsi kudu.” Ee, Dafida o nyaka gore morwa wa gagwe a hlagolele seo yena a bego a se tšeela godimo—segwera sa kgaufsi le Modimo.

Segwera se bjalo se swanetše go kgoma pono ya Solomone le tsela ya gagwe ya bophelo. Dafida o kgothaletša morwa wa gagwe gore: “O mo [Modimo] hlankêlê ka pelo yohle le ka môya wa mafolofolo.” * Ela hloko gore keletšo e rego a hlankele Modimo e tla ka morago ga ge a kgothaleditšwe gore a mo tsebe. Go tseba Modimo e le ka kgonthe go lebiša go mo hlankeleng. Eupša ga se a swanela go hlankelwa ka pelo e sa felelago ya go dika-dika goba ka dipelo tše pedi tša boikaketši. (Psalme 12:2; 119:113) Dafida o kgothaletša morwa wa gagwe go hlankela Modimo ka pelo ka moka le ka go rata.

Ke ka baka la’ng Dafida a kgothaletša morwa wa gagwe go hlankela ka maikemišetšo le monagano o nepagetšego? Dafida o hlalosa ka gore: “Xobane Morêna ó fenyêka dipelo ka moka, ó hlaoloxanya thopa tšohle tša dikêlêlô.” Solomone ga se a swanela go hlankela Modimo e le feela gore a kgahliše tatagwe, Dafida. Modimo o nyaka bao dipelo tša bona di sekametšego go Yena.

Na Solomone o tla latela mohlala wa tatagwe gomme a batamela kgaufsi le Jehofa? Seo se ithekgile ka Solomone. Dafida o botša morwa wa gagwe gore: “Xe O mo nyaka, ó tlo re: Ké Nna é! Xe O ka mo tloxêla, xôna ó tlo Xo lahla ya ba moka.” Gore a be morapedi yo a lego kgaufsi le Modimo, Solomone o be a swanetše gore a katanele go tseba Jehofa. *

Keletšo ya Dafida bjalo ka tate e bontšha gore Jehofa o nyaka gore re batamele kgaufsi le yena. Eupša gore re batamele kgaufsi le Yena, re swanetše go “mo nyaka,” re nyakišiše Mangwalong ka maikemišetšo a go mo tseba kudu. Go mo tseba go swanetše go re tutueletša go mo hlankela ka pelo ka moka le ka go rata. Jehofa o kganyoga—e bile o swanelwa ke—gore re mo hlankele ka tsela ye.—Mateo 22:37.

[Mengwalo ya tlase]