E haafatata ˈtu i te Atua

“E itea ˈtu oia e oe”

PARALEIPOMENO 1, 28:9

UA ITE anei oe i te Atua? E ere iho â i te mea ohie ia pahono i teie uiraa. Ia mataro maitai tatou i te hinaaro e te mau eˈa o te Atua e ite mau ai tatou ia ˈna. Mea na reira ïa tatou e piri roa ˈtu ai ia ˈna, a ohipa ˈi te reira i roto i to tatou oraraa taatoa. E nehenehe anei? E nafea? E itehia te pahonoraa i roto i ta te arii Davida aˈoraa ia Solomona ta ˈna tamaiti i roto i te Paraleipomeno 1, 28:9.

Teie te tupuraa. Fatata e 40 matahiti to Davida faatereraa ia Iseraela, e ua ruperupe te nunaa. Mea apî roa Solomona o te fatata i te mono ia Davida. (Paraleipomeno 1, 29:1) Eaha te aˈoraa hopea a Davida i ta ˈna tamaiti?

Ma te faahiti i to ˈna oraraa î maitai i te taviniraa i te Atua, ua omua mai oia: “E tau tamaiti, e Solomona, ia ite hua oe i te Atua o to metua.” Aita oia i parau e e ite rii noa i te Atua. Te haamori ra Solomona ia Iehova, te Atua o Davida. Ua hope i te papaihia te toru o te tuhaa o te mau Papai Hebera, e ua ite iho â Solomona eaha ta teie mau papai moˈa e parau ra no nia i te Atua. Ia au i te hoê aivanaa, “e matau maitai roa” te auraa o te taˈo Hebera tei hurihia ei “ite.” Ua hinaaro iho â Davida ia atuatu ta ˈna tamaiti i te taairaa piri roa e te Atua, ta ˈna iho i poihere.

Ia ohipa roa teie taairaa piri roa i nia i to Solomona huru feruriraa e oraraa. Ua faaitoito Davida i ta ˈna tamaiti: ‘A haamori i te Atua ma te aau mau e ma te tia roa.’ A tapao e e na mua te aˈoraa e ite i te Atua, e i muri iho te titauraa e haamori ia ˈna. Ia ite mau tatou ia Iehova e tavini ai tatou ia ˈna. Eiaha râ ma te aau feaapiti aore ra aau piti haavarevare. (Salamo 12:2) Ua onoono Davida ia tavini ta ˈna tamaiti i te Atua ma te aau tae taatoa.

No te aha Davida i aˈo ai i ta ˈna tamaiti ia haamori ma te aau e manaˈo tia? Ua faataa oia: “E imi hoi Iehova i te mau aau atoa ra, e te ite ra oia i te mau manaˈo atoa.” Eiaha Solomona e haamori i te Atua no te faaoaoa ia Davida to ˈna metua. E imi Iehova i te feia e hinaaro mau ra e tavini ia ˈNa.

E pee anei Solomona i te hiˈoraa o to ˈna metua ma te haafatata ˈtu ia Iehova? Tei ia ˈna noa. Ua na ô Davida i ta ˈna tamaiti: “Ia imi oe ia ˈna ra, e itea ˈtu oia e oe; a faarue râ oe ia ˈna, e faarue roa mai oia ia oe.” No te haafatata ˈtu i te Atua, ia tutava maite ïa Solomona i te ite maitai ia Iehova. a

Te haapapu maira ta Davida aˈoraa ei metua tane e te hinaaro nei Iehova ia haafatata ˈtu tatou ia ˈna. No te faatupu râ i teie taairaa piri roa, ia ‘imi ïa tatou ia ˈna’ ma te faahohonu i te mau Papai no te ite hua ia ˈna. E hinaaro ïa tatou e tavini ia ˈna ma te aau tae taatoa. Ta Iehova ïa e titau ra i ta ˈna mau tavini e mea tano iho â.—Mataio 22:37.

[Nota i raro i te api]