Seken Stamba Rod

Yu No Mas Skelem Yu Wetem Ol Narafala

?BAEBOL I TIJIM WANEM? “Olgeta man wanwan oli mas traem ol wok we olgeta nomo oli mekem. Nao oli save makem we oli kam man olsem wanem from ol wok blong olgeta nomo, i no from wok blong sam narafala man.”—Galesia 6:4.

?WANEM I SAVE TRAEM YUMI? Maet yumi stap skelem wok blong yumi wetem wok blong ol narafala. Samtaem, yumi skelem yumi wetem ol man we oli no gat samting olsem yumi, mo samtaem wetem ol man we oli gat moa paoa long yumi, oli gat plante samting, mo oli gat gudhan i bitim yumi. Be nomata se yumi skelem wok blong yumi wetem wanem kaen man, frut blong fasin ya i nogud. Yumi mekem mastik nomo taem yumi ting se samting we man i gat no samting we hem i naf blong mekem, hemia nao samting we i mekem hem i harem gud. Mo tu, yumi mas sakemaot tingting ya blong wantem samting blong narafala man, mo blong wantem winim narafala man.—Prija 4:4.

?YU SAVE MEKEM WANEM? I gud blong traem luk yu wan olsem we God i stap luk yu. Yu mas kasem save gud tingting blong God long saed blong man, nao hemia i save pulum yu blong gat gudfala tingting long yu wan. “Man i stap lukluk long bodi blong man nomo, be mi [Jehova *] mi stap lukluk long tingting blong hem.” (1 Samuel 16:7) Jehova i no stap skelem yu wetem narafala blong luk se yu wanem kaen man, be hem i lukluk long hat blong yu, i skelem ol tingting, mo ol samting we yu wantem long hat blong yu. (Hibrus 4:12, 13) Jehova i kasem save se i gat sam samting we yu yu no naf blong mekem, mo hem i wantem we yu tu yu luksave samting ya. Sipos yu skelem yu wetem narafala blong luk se yu wanem kaen man, bambae yu save kam flas, no bambae yu harem nogud oltaem. Taswe yu mas luksave se yu no naf blong mekem sam samting, mo se bambae yu no mekem evri samting long nambawan fasin.—Ol Proveb 11:2.

?Wanem samting we yu mas mekem blong God i tinghae long yu? Jehova i pulum profet Maeka blong raetem se: “Ol samting we i gud blong mekem, Hae God i talemaot finis long yumi. Hem i God blong yumi, mo hem i wantem blong yumi stap mekem ol fasin we i stret gud, mo blong yumi stap soemaot we yumi lavem ol man tumas, mo blong yumi stap fren gud wetem hem long evri haf blong laef blong yumi, we tingting blong yumi i stap daon.” (Maeka 6:8) Sipos yu folem advaes ya, God bambae i tingbaot yu, mo bambae hem i mekem i gud long yu. (1 Pita 5:6, 7) I no gat wan samting we i save mekem yu yu harem gud moa i bitim hemia.

[Futnot]

[Tok blong pija long pej 5]

Jehova i stap lukluk long hat blong yumi blong skelem yumi se yumi wanem kaen man