Sekreto 2

Ayaw Itandi ang Imong Kaugalingon sa Uban

UNSAY GITUDLO SA BIBLIYA? “Ayoha ang imong pagtrabaho aron duna kay ikapasigarbo. Apan ayaw itandi ang imong kaugalingon sa uban.”—Galacia 6:4, Contemporary English Version.

UNSA ANG HAGIT? Kita dunay tendensiya nga itandi ang kaugalingon sa uban—usahay niadtong menos kay kanato, apan sagad niadtong mas impluwensiyado, mas dato, o mas abilidaran kay kanato. Bisan hain niini, kini dili maayog epekto. Gihunahuna nato nga ang bili sa tawo nagdepende sa iyang nabatonan o ikasarang. Ug tingali pinaagi sa atong gihimo ang uban masina ug makig-indig.—Ecclesiastes 4:4.

UNSAY IMONG MAHIMO? Palandonga kon giunsa ka paglantaw sa Diyos aron matabangan ka kon unsaon nimo pagtamod ang imong kaugalingon. “Ang tawo nagatan-aw sa makita sa iyang mga mata; apan alang kang Jehova, a siya nagatan-aw sa kasingkasing.” (1 Samuel 16:7) Gilantaw ka ni Jehova pinaagi sa pagsusi sa imong kasingkasing, hunahuna, pagbati, ug mga katuyoan, ug dili pinaagi sa pagtandi kanimo sa ubang mga tawo. (Hebreohanon 4:12, 13) Si Jehova nasayod sa imong mga limitasyon ug buot niyang ilhon usab nimo kini. Kon lantawon nimo ang imong kaugalingon pinaagi sa pagtandi sa uban, mahimo ka lang hinuong mapahitas-on o kanunayng dili kontento. Busa mapaubsanong ilha nga dili ka mahimong hawod sa tanang butang.—Proverbio 11:2.

Unsay imong buhaton aron ikaw mahimong bililhon sa Diyos? Iyang giinspirar ang manalagnang si Miqueas sa pagsulat: “Iyang gisulti kanimo, Oh yutan-ong tawo, ang maayo. Ug unsa ba ang gipangayo ni Jehova kanimo kondili ang pagbuhat sa hustisya ug ang paghigugma sa kalulot ug ang paglakaw nga makasaranganon uban sa imong Diyos?” (Miqueas 6:8) Kon sundon mo kini nga tambag, ang Diyos mahingawa kanimo. (1 Pedro 5:6, 7) Dili ba dako gayod kining rason nga ikaw magmakontento?

[Footnote]

[Hulagway sa panid 5]

Gilantaw kita ni Jehova pinaagi sa pagsusi sa atong kasingkasing