Ọyọhọ 2

Kûmen Idem Fo Udomo ye Mbon En̄wen

NSO KE BIBLE EKPEP? “Tịm nam utom fo, ndien adan̄aoro eyenyene se adatde esịt aban̄a ke idemfo. Edi kûmen idem fo udomo ye mbon en̄wen.”—Galatia 6:4, Contemporary English Version.

NSO IDI MFỊNA? Nnyịn imesima ndimen idem nnyịn n̄kodomo ye mbon en̄wen—ndusụk ini ye mbon oro mîtiehe nte nnyịn, ediwak ini ye mbon oro ẹsọn̄de odudu, ẹnyenede n̄kpọ, m̀mê ẹnyenede usọ ẹkan nnyịn. Ufọn idụhe nnyịn ndida idem nnyịn n̄kodomo ye mbon en̄wen. Nnyịn imesidue ikere ke se owo enyenede m̀mê ekemede ndinam anam ẹda owo ke n̄kpọ. Imekeme ndinam mme owo ẹdomo idem m̀mê ẹmia mbuba ye kiet eken.—Ecclesiastes 4:4.

NSO KE AKPANAM? Domo ndise idemfo nte Abasi esede fi. Yak usụn̄ nte enye esede n̄kpọ ebiere nte afo adade idemfo. “Owo ese enyịn, edi Jehovah * ese esịt.” (1 Samuel 16:7) Idịghe se mbon en̄wen ẹdide ke Jehovah ada ebiere se afo edide, edi enye ese se isịnede fi ke esịt, onyụn̄ odụn̄ọde ekikere ye uduak esịt fo. (Mme Hebrew 4:12, 13) Jehovah ọfiọk ukeme fo, ndien enye oyom fi ọfiọk ukeme fo n̄ko. Edieke afo ebierede se afo edide ke ndida idemfo n̄kodomo ye mbon en̄wen, emi ayanam fi eseri iseri m̀mê etre ndiyụhọ ye se enyenede. Ntem nen̄ede fiọk nte ke idịghe kpukpru n̄kpọ ke imọ idikeme ndinam ọfọn.—Mme N̄ke 11:2.

Nso ke afo ekpenen̄ede anam man Abasi ada fi ke n̄kpọ? Enye ama ada spirit esie anam prọfet Micah ewet ete: “O owo, enye omowụt fi se ifọnde; ndien nso ke Jehovah oyom ye afo, ke mîbọhọke ndinam se inende, nnyụn̄ mma ima Abasi, nnyụn̄ nsụk idem nsan̄a ye Abasi fo?” (Micah 6:8) Ama anam emi, Abasi eyekere aban̄a fi. (1 Peter 5:6, 7) Emi edi ata akakan n̄kpọ oro edinamde iyụhọ ye se inyenede.

[Ikọ Idakisọn̄]

[Ndise ke page 5]

Se idude nnyịn ke esịt ebiere nte Jehovah adade nnyịn